Dute 1 - Ndebele Bible (iBhayibhili Elingcwele) 1978

UMose ulandisa ngokwenzekayo ekuhambeni kwabakoIsrayeli enkangala

1La ngamazwi kaMose awakhuluma kubo bonke abakoIsrayeli enkangala ngaphetsheya kweJordani, esihotsheni saseAraba maqondana loLwandle oluBomvu, phakathi kweParani leTofeli leLabani leHazerothi leDizahabi.

2— Kuluhambo lwensuku ezilitshumi lanye kusukela eHorebe kusiva eKadeshi‐Barneya ngendlela yasentabeni yaseSeyiri. —

3Ngomnyaka wamatshumi amane, ngosuku lokuqala lwenyanga yetshumi lanye uMose wakhuluma labakoIsrayeli njengokulaywa kwakhe yiNkosi,

4esenqobile uSihoni inkosi yamaAmori owayehlala eHeshiboni, loOgi inkosi yaseBashani owayehlala eAshitarothi laseEdreyi.Nani 21:21–35

5Ngaphetsheya kweJordani, elizweni laseMowabi, uMose waqala ukubachasisela lumlayo wathi:

6INkosi uNkulunkulu wethu yathi kithi eHorebe: Sekuyisikhathi eside lihlale kulintaba;

7sukani lapha, liye entabeni zamaAmori, lakubo abakhileyo eAraba, lasezintabeni, lasezikhinsini, laseNegebi, laselizweni elingasolwandle, liye elizweni lamaKanani laseLebanoni kuze kube semfuleni omkhulu iYufrathi.

8Khangelani, ngilivulele ilizwe phambi kwenu. Ngenani, lilithumbe ilizwe iNkosi eyafunga kubokhokho benu, oAbrahama loIsaka loJakobe, ukubanika lona lenzalo yabo emva kwabo.

9Ngalesosikhathi ngalitshela ukuthi: Kangilamandla okulithwala mina ngedwa.

10INkosi uNkulunkulu wenu ilandisile, lamhla lingangezinkanyezi zaphezulu ngobunengi.

11INkosi, uNkulunkulu wabokhokho benu, kayilandise njalo lize libe ngabaphindwe kankulungwane, ilibusise, njengokulithembisa kwayo.

12Mina ngedwa ngingathwala kanjani ukukhathaza kwenu lokuswela kwenu lenkani yenu na?

13Khethani kuleso laleso isizwe senu amadoda ahlakaniphileyo, aqondileyo, alolwazi, ngiwabeke abe zinhloko zenu.

14Laselingiphendula lisithi: Kuhle ukuba sikwenze lokho okutshoyo.

15Ngakhoke ngasengithatha izinhloko zezizwe zenu, amadoda ahlakaniphileyo, alolwazi, ngawabeka aba zinhloko zenu, izinduna zezinkulungwane lezinduna zamakhulu, lezinduna zamatshumi amahlanu, lezinduna zamatshumi, leziphathamandla zezizwe zenu.

16Futhi ngabalaya abahluleli benu ngalesosikhathi ngathi: Zwanini izindaba zabafowenu, lahlulele ngokulunga phakathi komuntu lomfowabo, lowezizweni alaye.

17Ekwahluleleni kwenu lingabi labandlululo, kodwa zwanini omncinyane njengomkhulu: lingesabi muntu, ngoba ukwahlulela kungokukaNkulunkulu. Lethani kimi indaba ezilahlulayo ukuba ngizizwe.

18Ngalesosikhathi ngalilaya ngakho konke okufanele ukuba likwenze.

19Sasuka eHorebe, sadabula phakathi kwaleyonkangala enkulu leyesabekayo elayibonayo; sahamba ngendlela eya ezintabeni zamaAmori, njengokusilaya kweNkosi, safika eKadeshiBarneya.

20Ngasengisithi kini: Selifikile entabeni zamaAmori eyasinika zona iNkosi uNkulunkulu wethu.

21Khangelani, iNkosi uNkulunkulu wenu ilivulile ilizwe phambi kwenu; hambani lilithumbe, njengokulilaya kwayo iNkosi, uNkulunkulu wabokhokho benu; lingesabi, lingakhathazeki.

22Laselisondela kimi lina lonke lathi: Asithume amadoda ngaphambi kwethu ukuba asihlolele ilizwe, abuye asibikele indlela esimele sihambe ngayo, lemizi esizakungena kuyo.

23Lokho kwaba kuhle kimi; ngakho ngathatha kini amadoda alitshumi lambili, kwaba yindodanye kuleso laleso isizwe.

24Wona ahamba, akhwela ezintabeni aze afika esihotsheni saseEshikoli, asihlola.

25Abutha ezinye izithelo zalelolizwe, aziletha kithi; asibikela athi: Yilizwe elihle esinika lona iNkosi uNkulunkulu wethu.

26Kanti lala ukuhamba, lahlamuka emlayweni weNkosi uNkulunkulu wenu,Dute 9:23; Heb 3:16

27lasola emathenteni enu lathi: Kungoba iNkosi yayisizonda, ngakho yasikhupha elizweni laseGibithe ukusinikela ezandleni zamaAmori ukuba isibhubhise.

28Sizakuya ngaphi? Abazalwane bethu basithelele ubugwala ngokuthi: Labobantu bakhulu, bade kulathi; lemizi mikhulu, ibiyelwe ngemithangala efika ezulwini; futhi sibonile khona amadodana amaAnaki.

29Ngasengisithi kini: Lingatshaywa luvalo, lesabe.

30INkosi uNkulunkulu wenu ehamba phambi kwenu izakulilwela njengalokhu eyalenzela khona eGibithe phambi kwenu,

31lasenkangala, lapho libone khona ukuthi iNkosi uNkulunkulu wenu yalithwala njengomuntu ethwala indodana yakhe, kuyo yonke indlela elahamba ngayo laze lafika lapha.Seb 13:18

32Kodwake, lanxa kunjalo, kalikholwanga iNkosi uNkulunkulu wenuHeb 3:19

33eyahamba phambi kwenu endleleni ukulidingela indawo ukuba limise kuyo amathente enu; yahamba ngomlilo ebusuku, ukuba ilitshengise indlela elifanele lihambe ngayo, langeyezi emini.

34INkosi yawezwa amazwi enu yathukuthela, yafunga yathi:Heb 3:18

35Impela kakukho loyedwa wabantu balesisizukulwana esibi ozabona ilizwe elihle engafunga ukulinika okhokho benu,

36ngaphandle kukaKalebi indodana kaJefune; yena uzakulibona. Ngizamnika yena labantwana bakhe ilizwe anyathela kulo, ngoba ulandele iNkosi ngokupheleleyo.

37INkosi yangithukuthelela lami ngenxa yenu, yathi: Laweke kawuzukungena kulo;

38uJoshuwa indodana kaNuni oma phambi kwakho uzakungena; mqinise, ngoba uzakwenza uIsrayeli ukuba alithumbe.

39Labantwana benu elacabanga ukuthi bazakuba yimpango, abangaziyo okuhle lokubi, bazangena kulo; ngizabanika lona libe ngelabo.

40Kodwa lina phendukani, liqonde enkangala ngendlela eya oLwandle oluBomvu.

41Laseliphendula lisithi: Sonile eNkosini; sizahamba siyekulwa, njengokusilaya kwayo iNkosi, uNkulunkulu wethu. Laselihloma lonke izikhali zenu zokulwa; lacabanga ukuthi kulula ukuhlasela ezintabeni.

42INkosi yathi kimi: Batshele uthi: Lingahambi ukuyakulwa, ngoba kangikho phakathi kwenu, ngakho lizanqotshwa yizitha zenu.

43Ngakhuluma lani sibili, kodwa kalilalelanga; lahlamuka elizwini leNkosi, laziqhenya, laya ezintabeni.

44Kwathi amaAmori ayehlala ezintabeni lezo aphuma alihlasela, alixotsha njengezinyosi, alinqoba eSeyiri, kwaze kwaba seHorma.

45Labuya, lakhala phambi kweNkosi, kodwa iNkosi kayikulalelanga ukukhala kwenu, kayilizwanga.

46Laselihlala eKadeshi insuku ezinengi.