Nani 11 - Ndebele Bible (iBhayibhili Elingcwele) 1978

INkosi ithembisa ukubapha inyama

1Abantu basebesola eNkosini ngenxa yobunzima babo. INkosi isikuzwile yathukuthela, lomlilo wayo wavutha phakathi kwabo, waqothula abanye abasemkhawulweni wezihonqo.

2Abantu basebekhala kuMose; wakhuleka eNkosini, umlilo wadeda.

3Ngakhoke indawo leyo yathiwa yiTabera, ngoba umlilo weNkosi wavutha phakathi kwabo.

4Ududu lwabantu olwaluphakathi kwabo lwaqala ukukhanuka izinto ezinhle, labantu bakoIsrayeli baphinde bakhala, bathi: Ngubani ozakusipha inyama ukuba sidle na?

5Siyazikhumbula inhlanzi esasizidlela zona eGibithe, lamakhomane, lamakhabe, lamaliki, lesandindima, lebhobola.

6Kodwa khathesi siyafa yindlala, kakulalutho esingalubona ngaphandle kwalimana.

7 Imana yayinjengenhlanyelo emhlophe, lokukhangeleka kwayo kwakunjengokwenhlaka.

10UMose wezwa abantu bekhala emizini yabo, bonke bemi ngaseminyango yamathente abo. INkosi yathukuthela kakhulu; kwaba kubi kuMose.

11UMose wathi eNkosini: Wenzeleni okubi encekwini yakho? Kungani ngingafumananga umusa emehlweni akho ukuze ungisindise ngomthwalo walababantu bonke na?

12Yimi unina walababantu na? Yimi engabazalayo ukuze ngibasingathe esifubeni sami njengomlizane esingatha abantwana bakhe, ngibase elizweni owafunga ukulinika oyise na?

13Ngizazuza ngaphi inyama ukuba ngibaphe bonke lababantu? Ngoba bayakhala phambi kwami besithi: Siphe inyama ukuba sidle.

14Kangilamandla okuthwala bonke lababantu ngedwa, ngoba kuyangisinda.

15Uba ufuna ukwenza njalo kimi, ngibulale masinyane, uba ngifumene umusa emehlweni akho, ukuze ngingaboni ukuhlupheka kwami.

16INkosi yathi kuMose: Buthanisa abangamatshumi ayisikhombisa babalisa bakoIsrayeli, owaziyo ukuthi bangabalisa babantu lezinduna zabo, ubalethe ethenteni lokuhlangana ukuba beme khona lawe.

17Ngizakwehla, ngikhulume lawe khona; ngizakuthatha ingxenye yomoya okuwe ngiyifake kibo; bazakuthwala umthwalo wabantu kanye lawe, ukuze ungawuthwali wedwa.

18Tshono ebantwini uthi: Zihlambululeleni ikusasa, ngoba lizakudla inyama; ngoba likhalile eNkosini lathi: Ngubani ozakusipha inyama ukuba sidle? Kwakukuhle kithi eGibithe. Ngakhoke iNkosi izakulipha inyama ukuba lidle.

19Kaliyikuyidla usuku lube lunye, loba insuku ezimbili, loba insuku ezinhlanu, loba insuku ezilitshumi, ingabe insuku ezingamatshumi amabili,

20kodwa inyanga yonke, ize iphume ngamakhala enu, ilitshiphele, ngoba liyilahlile iNkosi ephakathi kwenu, lakhala phambi kwayo lathi: Saphumelani eGibithe na?

21Kodwa uMose wathi: Abantu engiphakathi kwabo bazinkulungwane ezingamakhulu ayisithupha abahamba ngenyawo; wena uthe: Ngizabanika inyama ukuze badle inyanga yonke.

22Kambe bazakuhlatshelwa izimvu lezinkomo ukuze basuthe na? Loba bazakubanjelwa yini inhlanzi zonke zolwandle ukuba basuthe na?

23INkosi yathi kuMose: Isandla seNkosi siyehluleka ukusiza na? Khathesi usuzakubona ukuthi ilizwi lami lizagcwaliseka kuwe yini.

24UMose wasephuma, wabatshela abantu amazwi eNkosi; wabutha abangamatshumi ayisikhombisa babalisa babantu, wabamisa ngasethenteni lokuhlangana.

25INkosi yehla ngeyezi, yakhuluma kuye, yathatha ingxenye yomoya okuye, yayifaka kubalisa abangamatshumi ayisikhombisa. Kwathi lapho umoya usehlela phezu kwabo, batshumayela. Kodwa kabaphindanga ukutshumayela.

26Amadoda amabili ayesalele ezihonqweni, uElidadi loMedadi; umoya wehlela laphezu kwabo. Amabizo awo ayephakathi kwalabo abalotshiweyo, kodwa kawayanga ethenteni; atshumayela esezihonqweni.

27Kwagijima ijaha elithile ukuyabika kuMose ukuthi: UElidadi loMedadi bayatshumayela ezihonqweni.

28UJoshuwa indodana kaNuni, inceku kaMose, omunye wabakhethiweyo, wathi: Nkosi yami, Mose, banqabele.

29Kodwa uMose wathi kuye: Ulomona ngenxa yami na? Kungathi bonke abantu beNkosi bangaba ngabaprofethi, ukuba iNkosi ifake umoya wayo kibo!

30UMose labalisa bakoIsrayeli babuyela ezihonqweni.

INkosi ibapha izagwaca

31Kwavuka umoya ovela eNkosini, waletha izagwaca zivela olwandle, wazehlisela ezihonqweni; zazikhona inxa zonke okulingana lohambo losuku kusukela ezihonqweni; lenqumbi yazo phezu komhlabathi yaba zingalo ezimbili.

32Abantu babephuma lonke lolosuku, lobusuku bonke, losuku lonke olulandelayo, bebamba izagwaca. Lowo owabamba ezilutshwana kulabanye wabamba amahomeri alitshumi azo; bazichaya ngasezihonqweni inxa zonke.

33Inyama isesemilonyeni yabo, iNkosi yabathukuthelela abantu, yabehlisela umkhuhlane omkhulu kakhulu.

34Ngakhoke leyondawo yathiwa yiKibirothi‐Hathava, ngoba bangcwaba khona abantu ababeyizihwaba zenyama.

35Abantu basuka eKibirothi‐Hathava baya eHazerothi; bahlala khona eHazerothi.