Jobe 10 - Ndebele Bible (iBhayibhili Elingcwele) 1978

UJobe ukhala ngokuphila kwakhe

1Ngiyanengwa yikuphila kwami;

ngizakhuluma ngokukhululeka ngokusola kwami,

ngikhulume ngokudabuka emoyeni wami;

2ngithi kuNkulunkulu: Ungangilahli;

ungazise ukuba kungani uphikisana lami,

3kambe kuhle yini kuwe ukucindezela,

lokudelela umsebenzi wezandla zakho,

uvume amacebo ababi na?

4Ulamehlo omuntu na?

Ubona njengomuntu na?

5Insuku zakho zinjengensuku zomuntu,

leminyaka yakho injengeminyaka yomuntu yini,

6ukuba udinge ububi bami,

uhlole isono sami,

7lanxa usazi ukuthi kangilacala,

lokuba kakho ongangikhulula esandleni sakho na?

8Izandla zakho zangenza, zangibumba mina,

kanti khathesi usuphenduka ungichithe.

9Ake ukhumbule ukuba wangenza ngebumba nje.

Phoke, uzangibuyisela othulini na?

10Kawungithululanga njengochago,

wangijiyisa njengolaza na?

11Ungembesile ngesigogo langenyama,

wangihlanganisa ndawonye ngamathambo langemisipha.

12Unginikile ukuphila lothando olungapheliyo,

ukunanzelela kwakho kulondolozile umoya wami;

13Kanti lokhu ukufihlile enhliziyweni yakho;

ngiyazi ukuba yikho lokho okuqondileyo.

14Uba ngisona, wena ungiqaphele,

kawuyikuthethelela ukona kwami.

15Uba ngimubi, maye mina!

Uba ngilungile, ngingeke ngiphakamise ikhanda lami,

ngoba ngigcwele ihlazo,

ngidakwe yibuhlungu bami.

16Loba ngiziphakamisa mina,

uzangizingela njengesilwane,

ubuye wenze okumangalisayo kimi.

17Uyavuselela ukungihlasela kwakho,

langokwanda kokuthukuthela kwakho

uyaletha amaxuku amatsha ukungihlasela.

18Wangikhuphelani esiswini na?

Kungathi ngabe ngafa ngingakabonwa,

19ngasuka esiswini, ngaya elibeni,

njengokungathi kangizalwanga.

20Kazilutshwana yini insuku zokuphila kwami?

Ake ungiyekele ukuba ngithokoze kancinyane,

21ngingakayi lapho ngingasayikubuya khona,

elizweni lomnyama lethunzi lokufa,

22elizweni lomnyama lesivubevube

lapho ukukhanya kunjengomnyama.