Nani 23 - Ndebele Bible (iBhayibhili Elingcwele) 1978

1UBalami wathi kuBalaki: Ngakhela lapha ama‐altare ayisikhombisa, ungilungisele inkunzi eziyisikhombisa lenqama eziyisikhombisa.

2UBalaki wenza njengokutsho kukaBalami, wanikela kulelo lalelo ialtare ngenkunzi lenqama.

3UBalami wathi kuBalaki: Mana ngasemnikelweni wakho wokutshiswa, ngihambe mina; mhlawumbe iNkosi izafika ukungihlangabeza; lokho engitshengisa khona ngizakukutshela. Waya entabeni eligceke.

4UNkulunkulu wahlangana loBalami; uBalami wathi kuye: Sengilungisile ama‐altare ayisikhombisa, nganikela kulelo lalelo ialtare ngenkunzi lenqama.

5INkosi yafaka ilizwi emlonyeni kaBalami, yathi: Buyela kuBalaki, ukhulume lokhu kuye.

6Wabuyela kuye, wambona emi ngasemnikelweni wakhe wokutshiswa kanye lazo zonke izikhulu zaseMowabi.

7UBalami waseqala ukuhuba ihubo lakhe wathi:

UBalaki ungilandile eAramu,

inkosi yaseMowabi ezintabeni zasempumalanga;

wathi: Woza ungiqalekisele uJakobe,

woza ungithukele uIsrayeli.

8Ngingamqalekisa kanjani ongaqalekiswanga nguNkulunkulu na?

ngingamthuka kanjani ongathukwanga nguNkulunkulu na?

9Ngoba ngisengqongeni yezintaba ngiyambona,

ngisezintabeni ngiyambona.

Khangela, bangabantu abahlala bodwa,

abangabalwayo phakathi kwezizwe.

10Ngubani ongabala amabandla kaJakobe,

abale izimpi zikaIsrayeli na?

Kangife ukufa kolungileyo,

lokuphela kwami kube njengokwakhe!

11UBalaki wathi kuBalami: Wenzeni kimi na? Ngikuthethe ukuba uqalekise izitha zami, kodwa uzibusisile kakhulu.

12Waphendula wathi: Kakufanelanga yini ukuba ngiqaphele ukukhuluma lokho iNkosi ekufaka emlonyeni wami na?

13UBalaki wathi kuye: Akungilandele, siye kwenye indawo ukuba ubabone; uzakubona labo abaseduze kuphela, ungaboni bonke; ungiqalakisele bona kuleyondawo.

14Wamusa eNsimini yabalindi, engqongeni iPisiga; wakha amaaltare ayisikhombisa, wanikela ngenkunzi lenqama phezu kwalelo lalelo ialtare.

15UBalami wathi kuBalaki: Mana lapha ngasemnikelweni wakho wokutshiswa, mina ngihlangane leNkosi laphayana.

16INkosi yasihlangana loBalami, yafaka ilizwi emlonyeni wakhe, yathi: Buyela kuBalaki, ukhulume lokhu kuye.

17UBalami wabuyela kuye, wambona emi ngasemnikelweni wakhe wokutshiswa kanye lazo zonke izikhulu zaseMowabi. UBalaki wathi kuye: INkosi itheni?

18UBalami waseqala ukuhuba ihubo lakhe wathi:

Vuka, Balaki, uzwe,

ungilalele, wena ndodana kaZipori.

19UNkulunkulu kafanani lomuntu ukuba aqambe amanga,

kasuye umuntu ukuba azisole.

Utshilo, kanti kayikukwenza na?

Ukhulumile, kanti kayikukuphelelisa na?

20Khangela, ngilayiwe ukubusisa;

ngizabusisa, kangilamandla mina okukubuyisa.

21Ububi kabufunyaniswanga kuJakobe,

lokuhlupheka kakubonakalanga kuIsrayeli.

INkosi uNkulunkulu wabo ilabo,

kumenyezelwa phakathi kwabo ukuthi iyinkosi.

22UNkulunkulu wabakhupha eGibithe,

kubo ulamandla njengenyathi.

23Kakulamilingo kuJakobe,

kakulakuvumisa kuIsrayeli.

Khathesi kuzakutshiwo ngoJakobe

langoIsrayeli ukuthi:

Khangela ukuthi uNkulunkulu wenzeni!

24Khangela, nampa abantu abavukayo njengesilwane esisikazi,

abaquthayo njengesilwane;

kasilali singakadli impango,

singakanathi igazi lababuleweyo.

25UBalaki wasesithi kuBalami: Kulungile, ungabaqalekisi; kodwa ungababusisi njalo.

26Kodwa uBalami wathi kuBalaki: Kangikutshelanga yini ukuthi konke iNkosi ekutshoyo, ngimele ukukwenza na?

27UBalaki wathi kuBalami: Woza khathesi, ngizakukusa kwenye indawo; mhlawumbe lapho kungaba kuhle kuNkulunkulu ukuba ungiqalekisele bona.

28UBalaki wamkhwelisa uBalami engqongeni iPeyori ekhangele ngasenkangala.

29UBalami wathi kuBalaki: Ngakhela lapha ama‐altare ayisikhombisa, ungilungisele inkunzi eziyisikhombisa lenqama eziyisikhombisa.

30UBalaki wenza njengokutsho kukaBalami, wanikela kulelo lalelo ialtare ngenkunzi lenqama.