Kol 2 - Ndebele Bible (iBhayibhili Elingcwele) 1978

1Ngoba ngithanda ukuba lazi ukuthi ngilizamela ngokungakanani lina kanye labaseLawodikeya, labo bonke abangakaze bangibone.

2Inhliziyo zabo kaziduduzeke; kabahlanganiswe othandweni; kababe lenotho yonke yokuqedisisa okupheleleyo, bazisise imfihlakalo kaNkulunkulu enguKristu,

3okufihlwe kuye inotho yonke yokuhlakanipha leyokwazi.

4Ngilitshela lokhu ukuze lingakhohliswa muntu ngamazwi ayengayo.

5Ngoba lanxa ngingekho ngokomzimba, kanti ngikhona kini ngokomoya, ngithokoza lapho ngibona ukulungelana kwenu lokuqina kokukholwa kwenu kuKristu.

Ukuhlala kuKristu

6Ngakhoke njengalokho limamukele uKristu Jesu iNkosi, hlalani kuye,

7ligxilile, lakhiwe kuye, liqiniswe ekukholweni njengokufundiswa kwenu, lande ekubongeni.

8Xwayani funa kube khona olithumbayo ngokuhlakanipha langokukhohlisa okuyize, okungokwemvelo yabantu langokwempi yemimoya yalumhlaba, kungesikho ngokukaKristu.

9Ngoba kuhlala kuye ngomzimba ukuphelela konke kobuNkulunkulu;

10liphelelisiwe kuye. Uyinhloko yokubusa konke lamandla.

11Lasokelwa kuye ngokusoka okungenziwanga ngezandla, kodwa okulikhulula emandleni omzimba; lokhu kuyikusoka kukaKristu.

12Lambelwa kanye laye ngobhaphathizo, ngalo futhi lavuswa kanye laye ngokukholwa ngamandla kaNkulunkulu amvusa kwabafileyo.Roma 6:4

13Lanike, lanxa belifile ngeziphambeko langokungasoki kwenyama yenu, uNkulunkulu ulenze laba ngabaphilayo kanye loKristu. Usithethelele iziphambeko zethu zonke;Efe 2:1–5

14uyicimile incwadi yemilandu emelana lathi ngemilayo yayo; wayisusa ngokuyibethela esiphambanweni;Efe 2:15

15wabamuka izikhali ababusi labalamandla, wabaveza obala ebayangisa, wabanqoba ngesiphambano.

16Ngakho kakungabi khona umuntu olilahla ngokudla langokunatha, loba langemikhosi, loba ngokuthwasa kwenyanga, loba ngeSabatha.Roma 14:1–6

17Lezizinto ziyisithunzi nje salokho okuzayo; kodwa umzimba oyiwo ngokaKristu.

Ukuxwayisa ngezifundiso zamanga(Efe 5:22—6:9)

18Kakungabi khona umuntu olamuka umvuzo wenu, ethanda ukuzenza othobileyo lokukhonza izithunywa, ebambelela phezu kwemibono yakhe, ezikhukhumeza ngeze ngemicabango yakhe emibi.

19Lowo kabambeleli kuKristu oyinhloko, okondliwa ngaye wonke umzimba, uhlanganiswa ngamalunga lemisipha, ukhula ngokukhula kukaNkulunkulu.Efe 4:16

20Uba lafa kanye loKristu, lakhululwa kuyo impi yemimoya yalumhlaba, kungani ukuba kungathi lisaphila ngokomhlaba na? Kungani lithobela imithetho yokuthi:

21Ungaphathi, ungezwa ngolimi, ungathinti?

22Limithetho imayelana lezinto ezigugiswa yikusetshenziswa, ilandela imilayo lezifundiso zabantu.

23Yona ikhanya injengokuhlakanipha, ngoba kuvela ngayo ukukhonza lokuzithoba lokuphatha kanzima umzimba; kodwa kayisizi lutho mayelana lokuzithinta.