Eks 39 - Ndebele Bible (iBhayibhili Elingcwele) 1978

Ukwenziwa kwezambatho zabapristi

1Ngelembu eliluhlaza leliyibubende lelibomvu benza izambatho ezinhle zokukhonza endaweni engcwele lezambatho ezingcwele zikaAroni, njengalokhu iNkosi ibimlayile uMose.Eks 28:1–43

2Wayenza ingubo yamahlombe ngelembu elihle lentambo ephothiweyo yegolide leluhlaza leyibubende lebomvu.

3Balikhanda igolide laba yizicantalala, balisika laba yizincingwana ukuba zalukwe lelembu elihle lentambo eluhlaza leyibubende lebomvu, kube ngumsebenzi wengcitshi.

4Bayenzela izichibi zamahlombe ezihlanganisiweyo; yahlanganiswa emaceleni ayo womabili.

5Ibhanti elalukiweyo elikuyo elokuyibopha okhalweni lenziwa ukuba lifanane layo, ngelembu elihle lentambo ephothiweyo yegolide leluhlaza leyibubende lebomvu, njengalokhu iNkosi ebimlayile uMose.

6Babaza amatshe angamaonikse, bawabeka ukuba azingelezelwe ngezinto ezitshiliweyo zegolide, babhala kuwo amabizo abakoIsrayeli ngokubhalwa kwendandatho.

7Bawathungela ezichibini zengubo yamahlombe, abe ngamatshe ezikhumbuzo ebantwini bakoIsrayeli, njengokutsho kweNkosi kuMose.

8Wayenza ingubo yesifuba njengengubo yamahlombe, yaba ngumsebenzi wengcitshi, ngelembu elihle lentambo ephothiweyo yegolide leluhlaza leyibubende lebomvu.

9Ingubo yesifuba yayilingana inxa zonke, iphindwe kabili, ubude bayo babungangengxenye yengalo, ububanzi bayo babungangengxenye yengalo.

10Bayifaka imizila emine yamatshe amahle; umzila wokuqala waba lesardikisi letopazi lerubi;

11umzila wesibili waba le‐emeraldi lesafire lendayimana;

12umzila wesithathu waba lejasinte leagate leametiste;

13umzila wesine waba leberila leonikse lejaspi; amatshe la ayezingelezelwe ngezinto ezitshiliweyo zegolide.

14Kwakukhona amatshe alitshumi lambili elamabizo amadodana kaIsrayeli; ilelo lalelo ilitshe lalilebizo lesinye sezizwe ezilitshumi lambili libhaliwe njengokubhalwa kwendandatho.

15Benza engutsheni yesifuba amaketane egolide elihle anjengamagoda aphothiweyo.

16Benza izinto ezimbili ezitshiliweyo ngegolide lamasongo amabili egolide, bawathungela womabili emaceleni womabili engubo yesifuba,

17bawabeka amaketane amabili egolide emasongweni amabili asemaceleni engubo yesifuba.

18Izihloko zamaketane womabili bazihlanganisa lezinto ezimbili ezitshiliweyo zegolide, bawabeka ngaphambili ezichibini zengubo yamahlombe.

19Benza amasongo amabili egolide, bawathungela emaceleni womabili engubo yesifuba, emphethweni wayo oseduze lengubo yamahlombe.

20Benza amasongo amabili egolide, bawathungela ngaphambili ngaphansi kwezichibi zengubo yamahlombe, ekuhlanganeni kwazo, phezu kwebhanti elalukiweyo lengubo yamahlombe.

21Bawabophela amasongo engubo yesifuba emasongweni engubo yamahlombe ngentambo eluhlaza, ukuba ingubo yesifuba ibe phezu kwebhanti elalukiweyo, ingakhumuki engutsheni yamahlombe; njengokutsho kweNkosi kuMose.

22Wasenza lesambatho esiyingubo yamahlombe ngelembu eliluhlaza elalukiweyo;

23isambatho saba lesikhala ngaphakathi sinjengesikhala sesigqoko, silomphetho owalukiweyo osizingelezayo ukuba singadabuki.

24Emiphethweni yaso benza umfanekiso wezithelo zamapomegranati ngelembu eliluhlaza leliyibubende lelibomvu, ilembu eliphothiweyo.

25Benza izinto ezikhencezayo zegolide elihle, bazifaka phakathi kwezithelo emiphethweni yesambatho,

26esinye lesinye isithelo sasilandelwa yinto ekhencezayo yegolide, emiphethweni yesambatho sokukhonza, njengokutsho kweNkosi kuMose.

27Basebebenzela oAroni lamadodana akhe amabhatshi elembu elihle elalukiweyo,

28leqhiye lelembu elihle, lezingowane ezinhle zelembu elihle, lamabhulugwe elembu elihle lentambo ephothiweyo,

29lebhanti lelembu elihle lentambo ephothiweyo eluhlaza leyibubende lebomvu, kube ngumsebenzi womthungi, njengokutsho kweNkosi kuMose.

30Benza incence yomqhele ongcwele ngegolide elihle, babhala kuyo njengokubhalwa kwendandatho ukuthi: Wahlukaniselwe iNkosi.

31Babophela kuyo intambo eluhlaza ukuba ibotshelwe eqhiyeni ngaphezulu; njengokutsho kweNkosi kuMose.

Izinto zeTabernakeli ziyalethwa

32Waphelake wonke umsebenzi weTabernakeli lethente lomhlangano; abakoIsrayeli bakwenza konke njengokutsho kweNkosi kuMose.Eks 35:10–19

33Baletha iTabernakeli kuMose, lethente, lempahla yalo yonke, lengwegwe zalo, lamapulanka alo, lemithando yalo, lensika zalo, lenyawo zalo,

34lesifulelo sezikhumba ezibomvu zezinqama, lesifulelo sezinzwezwe, leveli elilikhetheni,

35umtshokotsho wobufakazi lemijabo yawo lesihlalo somusa,

36itafula, lazo zonke izitsha zayo, lesinkwa esahlukaniselwe uNkulunkulu,

37uluthi lwesibane segolide elihle lezibane zalo, izibane zasezifakiwe kulo, lezitsha zalo zonke lamafutha okukhanyisa,

38lealtare legolide, lamagcobo okugcoba, lempepha elephunga elimnandi, leveli lomnyango wethente,

39ialtare lethusi, lesihlengo salo sethusi, lemijabo yalo, lazo zonke izinto zalo, lomkolo lenyawo zawo,

40amakhetheni eguma, lensika zalo, lenyawo zalo, leveli lomnyango weguma, lentambo zalo lezikhonkwane zalo, lempahla yonke yenkonzo yeTabernakeli leyethente lokuhlangana,

41izambatho ezenziweyo kuhle zokukhonza endaweni engcwele, izambatho ezingcwele zikaAroni umpristi, lezambatho zamadodana akhe ukuba babe ngabapristi bokuphatha umsebenzi wobupristi.

42Ngakhoke abakoIsrayeli benza wonke umsebenzi njengokutsho kweNkosi kuMose.

43UMose wabona ukuthi bawenzile wonke umsebenzi, lokuthi bawenze njengokutsho kweNkosi; uMose wasebabusisa.