Hubo 37 - Ndebele Bible (iBhayibhili Elingcwele) 1978

Okuzakwehlela ababi labalungileyo

1Ungazikhathazi ngababi,

ungabi lamhawu ngabenza okubi.

2Ngoba bazakoma njengotshani,

babune njengezihlahlana eziluhlaza.

3Themba eNkosini, wenze okuhle,

uhlale elizweni ngokuthembeka.

4Thokoza eNkosini,

yona izakukunika izifiso zenhliziyo yakho.

5Nikela impilo yakho eNkosini, uyithembe,

yona izakukusiza.

6Yona izakuveza ukulunga kwakho njengokukhanya,

lelungelo lakho njengemini.

7Thula phambi kweNkosi, ulindele yona;

ungazikhathazi ngolenhlanhla,

ngomuntu owenza amacebo amabi.

8Zithinte ekuthukutheleni, uyekele ulaka;

ungazikhathazi, ngoba kubanga ukona.

9Ngoba ababi bazakuchithwa,

kodwa labo abathemba iNkosi bazakulifuya ilizwe.

10Kuseyisikhatshana nje ukuba omubi angabe esaba khona;

loba uhlola indawo yakhe uzakuba engasekho.

11Kodwa abamnene bazakufuya ilizwe,

bazithokozise ngenala enkulu.

12Omubi uzamsongela olungileyo,

amgedlele amazinyo akhe.

13Kodwa iNkosi iyamhleka omubi,

ngoba iyabona ukuthi usuku lwakhe lokucina luyeza.

14Ababi bayawuhwatsha umkhonto,

bagobise amadandili abo,

ukuba bamlahle phansi ohluphekayo loswelayo,

bababulale labo abahamba ngobuqotho.

15Imikhonto yabo izakugwaza ezabo inhliziyo,

kwaphulwe amadandili abo.

16Okuncinyane alakho olungileyo kungcono kulenotho yababi abanengi.

17Ngoba amandla ababi azakwaphulwa,

kodwa iNkosi iyamsekela olungileyo.

18INkosi iyalondoloza abaqotho,

lelizwe labo lizakuma kuze kube nininini;

19kabakhathazeki esikhathini esibi,

bayasutha ensukwini zendlala.

20Kodwa ababi bazakubhubha;

izitha zeNkosi zizakunyamalala njengobuhle bamadlelo,

zinyamalale njengentuthu.

21Omubi uyeboleka, angabuyiseli,

kodwa olungileyo ulesihawu, uyaphana.

22Ngakho labo ababusiswe yiNkosi bazakulifuya ilizwe,

kodwa labo abathukwe yiyo bazakuchithwa.

23Izinyathelo zomuntu ziqondiswa yiNkosi,

iyamqinisa lowo othanda izindlela zayo;

24loba esiwa, kayikutshayeka phansi,

ngoba iNkosi ibamba isandla sakhe.

25Ngangimutsha, khathesi sengimdala,

kanti kangizanga ngimbone olungileyo elahliwe,

labantwana bakhe bephanza ukudla.

26Uhlala ephana, eseboleka abanye,

labantwana bakhe baba yisibusiso.

27Suka kukho okubi, wenze okuhle;

uzakuhlala kuze kube nininini.

28Ngoba iNkosi ithanda ukulunga,

kayiyikubatshiya abalungileyo bayo.

Abalungileyo bazakulondolozwa kuze kube nininini,

kodwa abantwana bababi bazakuchithwa.

29Abalungileyo bazakulifuya ilizwe,

bahlale kulo kuze kube nininini.

30Umlomo wolungileyo ukhuluma ukuhlakanipha,

lolimi lwakhe lukhuluma ukulunga.

31Umlayo kaNkulunkulu wakhe usenhliziyweni yakhe;

izinyathelo zakhe kazitsheleli.

32Omubi uyamqaphela olungileyo, ufuna ukumbulala.

33INkosi kayiyikumnikela emandleni akhe,

kayiyikumlahla lapho ethonisiswa.

34Themba iNkosi, unamathele endleleni yayo,

izakukuphakamisa, ulifuye ilizwe,

ubukele ukuchithwa kwababi.

35Ngake ngambona omubi owesabekayo,

eyinkalakatha njengesihlahla saseLebanoni;

36wedlula, kabe esaba khona;

lalapho sengimdinga, kangisamfumananga.

37Mqhaphelise olungileyo, umbone oqotho,

ngoba umuntu wokuthula ulenzalo.

38Kodwa abaphambukayo bazakubhujiswa bonke;

inzalo yababi izakuchithwa.

39Ukukhululwa kwabalungileyo kuvela eNkosini;

iyinqaba yabo esikhathini sokuhlupheka.

40INkosi iyabasiza ibakhulule;

iyabakhulula kibo ababi, ibasize,

ngoba baphephela kuyo.