Hlu 16 - Ndebele Bible (iBhayibhili Elingcwele) 1978

USamsoni uya eGaza

1USamsoni waya eGaza, wabona khona iwule, walala kulo.

2Kwabikwa kwabaseGaza ukuthi: USamsoni ufikile lapha. Bayizingelezela leyondawo, bamcathamela ubusuku bonke esangweni lomuzi. Bathula ubusuku bonke besithi: Asilinde kuze kuse, ng’khonake sizambulala.

3USamsoni walala kwaze kwaba phakathi kobusuku; wavuka phakathi kobusuku, wabamba izivalo zesango lomuzi, wazisiphula kanye lensika zombili lomgoqo lakho konke, wakwetshata emahlombe akhe, wakuthwala wakusa phezu kwentaba ngasempumalanga kweHebroni.

USamsoni loDelila

4Kwathi emva kwalokho wathanda owesifazana esihotsheni saseSoreki, ibizo lakhe linguDelila.

5Izikhulu zamaFilistiya zeza kuDelila zathi: Akumyenge ubone ukuba amandla akhe amakhulu avela ngaphi, lokuba singamahlula kanjani, ukuba simbophe simnqobe. Sizakukunika sonke inhlamvu zesiliva ezingamakhulu alitshumi lelilodwa.

6UDelila wasesithi kuSamsoni: Ake ungitshele ukuthi amandla akho avela ngaphi, lokuthi singakubopha kanjani ukuze sikunqobe.

7USamsoni wathi kuye: Uba bengibopha ngentambo zomtshoko eziyisikhombisa ezintsha ezingomanga, ngizakuba buthakathaka ngibe njengabantu bonke.

8Izikhulu zamaFilistiya zasezimlethela intambo zomtshoko eziyisikhombisa ezintsha ezingomanga; wasembopha ngazo.

9Wayelabantu abacathemeyo endlini engaphakathi; wathi kuye: Samsoni, amaFilistiya aphezu kwakho! Waziqamula intambo zomtshoko njengentambo yesikusha etshiswa ngomlilo. Ngakho kabawazanga ukuthi amandla akhe avela ngaphi.

10UDelila wathi kuSamsoni: Ungikhohlisile wangitshela amanga; ake ungitshele ukuthi ungabotshwa njani.

11Yena wathi kuye: Uba bengangibopha bangiqinise ngamagoda amatsha angazanga asetshenziswe, ngizakuba buthakathaka ngibe njengabantu bonke.

12Ngakho uDelila wasethatha amagoda amatsha, wambopha ngawo, wathi kuye: Samsoni, amaFilistiya aphezu kwakho! Abantu abacathemeyo babesendlini engaphakathi. Kodwa wawaqamula amagoda ayesengalweni zakhe njengomnxeba.

13UDelila wasesithi kuye: Usangikhohlisa, usangitshela amanga; ake ungitshele ukuthi ungabotshwa njani. Yena wathi kuye: Uba usaluka amaxha enwele zami ayisikhombisa ngesalukiso, uwaqinise ngesikhonkwane, ngizakuba buthakathaka ngibe njengabantu bonke.

14Kwathi lapho uDelila esemlolozele walala, wasethatha amaxha enwele zakhe, waweluka ngesalukiso, wawaqinisa ngesikhonkwane; wasesithi kuye: Samsoni, amaFilistiya aphezu kwakho! Yena wavuka ebuthongweni, wasusa isalukiso lentambo zokweluka.

15UDelila wasesithi kuye: Ungatsho kanjani ukuthi: Ngiyakuthanda; nxa inhliziyo yakho ingekho kimi na? Ungikhohlisile lezizikhathi ezintathu, kawungitshelanga ukuba amandla akho amakhulu angaphi.

16Kwathi lapho emcindezela nzima ngamazwi akhe insuku ngensuku, engakhawuli, waze wamdinisa kakhulu.

17Wasemtshelake yonke imfihlo yakhe wathi: Impuco kayizanga ilithinte ikhanda lami, ngoba ngangingumNaziri kaNkulunkulu kusukela esiswini sikamama. Uba ngiphucwa, amandla ami azaphela, ngizakuba buthakathaka ngibe njengabantu bonke.

18Kwathi lapho uDelila ebona ukuthi umtshele yonke imfihlo yakhe, wathumela ilizwi ukubiza izikhulu zamaFilistiya wathi: Wozani masinyane, ngoba ungitshele imfihlo yakhe yonke. Zasezisiza izikhulu zamaFilistiya ziphethe imali.

19UDelila wamlalisa ubuthongo emathangazini akhe, wasebiza umuntu owamgela amaxha ayisikhombisa enwele zakhe. Waseqala ukumhlupha, amandla akhe aphela.

20Wathi: Samsoni, amaFilistiya aphezu kwakho! Wavuka ebuthongweni wathi: Ngizaphuma njengezikhathi zonke, ngizikhulule. Wayengazi ukuba iNkosi imtshiyile.

21AmaFilistiya ambamba, amkhupha amehlo, amletha eGaza, ambopha ngezibopho zethusi. Amenza ukuba achole impuphu entolongweni.

22Inwele zekhanda lakhe zaqala ukukhula futhi emva kokuphucwa kwakhe.

Ukufa kukaSamsoni

23Izikhulu zamaFilistiya zabuthana ukuba zihlabele uDagoni unkulunkulu wazo umhlatshelo omkhulu, zithokoze, zathi: Unkulunkulu wethu unikele isitha sethu uSamsoni ezandleni zethu.

24Kwathi lapho abantu bembona uSamsoni badumisa unkulunkulu wabo, bathi: Unkulunkulu wethu unikele isitha sethu ezandleni zethu, umchithi welizwe lakithi osebulele abanengi bethu.

25Kwathi lapho bethokoza bathi: Bizani uSamsoni ukuba azesidlalela. Basebembiza uSamsoni entolongweni, wadlala phambi kwabo. Bammisa phakathi kwensika.

26USamsoni wathi emfaneni ayembambe ngesandla: Ngiyekele ngibambe insika indlu emi phezu kwazo ukuba ngibambelele ngazo.

27Indlu yayigcwele abesilisa labesifazana; zonke izikhulu zamaFilistiya zazikhona, phezulu ophahleni kwakukhona abesilisa labesifazana abazinkulungwane ezintathu ababebukele uSamsoni edlala.

28USamsoni wasekhala eNkosini esithi: Nkosi Nkulunkulu, ake ungikhumbule, ungiqinise kube kanye nje, Nkulunkulu, ukuze ngiphindisele kanye kumaFilistiya ngenxa yamehlo ami amabili.

29USamsoni wasebamba insika ezimbili eziphakathi indlu emi kuzo, wavinyelela ngazo, isandla sakhe sokunene sikwenye lesokhohlo sikwenye.

30Wathi: Kangife lamaFilistiya. Wadonsa ngamandla akhe wonke; indlu yawela phezu kwezikhulu laphezu kwabo bonke abantu ababelapho. Ngakho abafayo ababulala ekufeni kwakhe babe banengi ukwedlula labo ababulala esaphila.

31Kwasekufika abafowabo layo yonke indlu yakwabo, bamthatha bayamngcwabela phakathi kweZora leEshitawoli elibeni likayise uManowa. Wayengumahluleli koIsrayeli iminyaka engamatshumi amabili.