2 Sam 7 - Ndebele Bible (iBhayibhili Elingcwele) 1978

Isivumelwano sikaNkulunkulu loDavida

1Kwathi lapho inkosi uDavida isihlala endlini yayo, iNkosi uNkulunkulu isiyiphumuzile ezitheni zayo zonke inxa zonke,1 Lan 17:1–27

2yathi kuNathani umprofethi: Akuboneke, mina ngihlala endlini yemikusu, kodwa umtshokotsho kaNkulunkulu uhlala ethenteni.

3UNathani wathi enkosini: Hamba wenze konke okusenhliziyweni yakho, ngoba iNkosi ilawe.

4Kodwa kwathi ngabona lobobusuku ilizwi leNkosi uNkulunkulu lafika kuNathani lathi:

5Hamba uyetshela inceku yami uDavida ukuthi iNkosi ithi: Uzangakhela indlu ukuba ngihlale kiyo na?

6Kangizanga ngihlale endlini kusukela osukwini engakhupha ngalo abantu bakoIsrayeli eGibithe kuze kube lamuhla, kodwa bengilokhu ngihamba ngethente.

7Endaweni zonke engihambe kuzo labo bonke abantu bakoIsrayeli ngake ngakhuluma ilizwi yini komunye wabahluleli bakoIsrayeli, engabalaya ukwalusa abantu bami uIsrayeli ngathi: Yini lingangakhelanga indlu yemikusu na?

8Ngakhoke uzakutsho encekwini yami uDavida uthi: INkosi yamabandla ithi: Ngakuthatha ekwaluseni izimvu egangeni ukuba ube ngumbusi wabantu bami uIsrayeli;

9ngaba lawe lapho uya khona, ngachitha zonke izitha zakho ngaphambi kwakho; ngizakwenzela ibizo elikhulu phakathi kwabakhulu basemhlabeni.

10Ngizabamisela indawo abantu bami uIsrayeli, ngibagxumeke ukuba bahlale endaweni yabo, bangabe besakhathazwa futhi; labantu ababi kabasayikubahlupha njengakuqala,

11kusukela esikhathini engamisa ngaso abahluleli ebantwini bami uIsrayeli; ngikuphumuze ezitheni zakho zonke. Futhi iNkosi iyakutshela ukuthi izakwandisa usendo lwakho.

12Kuzakuthi lapho insuku zakho seziphelile, usuyile kwabaphansi, ngimise omunye wabantwana bakho ukuba abe yinkosi emva kwakho, ngiqinise umbuso wakhe.

13Yena uzakwakhela ibizo lami indlu; ngizaqinisa isihlalo sobukhosi sombuso wakhe kuze kube nininini.

14Mina ngizakuba nguyise, yena ibe yindodana yami. Uba esenza okubi, ngizayitshaya ngentonga esetshenziswa ngabantu, ngimtshaye imivimvinya njengokutshaya kwabantu.2 Kor 6:18; Heb 1:5

15Kodwa uthando lwami kangiyikulususa kiyo njengalokho ngalususa kuSawuli engamkhupha ngaphambi kwakho.

16Indlu yakho lombuso wakho kuzaqiniswa njalonjalo phambi kwami; lesihlalo sakho sobukhosi simiswe kuze kube nininini.

17UNathani wamtshela uDavida konke lokho ayekutsheliwe, lakho konke ayekutshengisiwe.

18Inkosi uDavida yasingena ihlala phambi kweNkosi, yathi: Kambe mina ngingubani, Nkosi Nkulunkulu, lendlu yami iyini, ukuze ungifikise lapha na?

19Kanti lokhu kuyinto encinyane nje emehlweni akho, Nkosi Nkulunkulu; usukhulumile futhi ngendlu yenceku yakho ngokwesikhathi esikhatshana esizayo, wangitshengisa futhi lezizukulwana ezizayo, Nkosi Nkulunkulu.

20Phoke, mina nginguDavida nje ngingabe ngisathini kuwe na? Ngoba wena uyayazi inceku yakho, Nkosi Nkulunkulu.

21Ngenxa yesithembiso sakho langokuthanda kwakho wenzile konke lokhu okukhulu ukuba ukwazise inceku yakho.

22Wena umkhulu impela, Nkosi Nkulunkulu; ngoba kakho onjengawe, kakho uNkulunkulu ngaphandle kwakho, ngakho konke esikuzwileyo ngendlebe zethu.

23Yisiphi isizwe emhlabeni esinjengabantu bakho uIsrayeli, Nkulunkulu owazihlengela bona eGibithe baba ngabantu bakho, wazenzela udumo, wabenzela izenzo ezinkulu lezesabekayo ngokuxotsha ngaphambi kwabo izizwe kanye labonkulunkulu bazo, na?

24Wazimisela abantu bakho uIsrayeli ukuba babe ngabantu bakho kuze kube nini lanini, wena Nkosi waba nguNkulunkulu wabo.

25Khathesike, Nkosi Nkulunkulu, qinisa ilizwi olikhulume ngenceku yakho langendlu yayo kuze kube nininini, wenze njengokukhuluma kwakho.

26Kalibe likhulu ibizo lakho kuze kube nininini kuze kuthiwe: INkosi yamabandla inguNkulunkulu koIsrayeli; lendlu yenceku yakho uDavida imiswe phambi kwakho.

27Ngoba wena Nkosi yamabandla, Nkulunkulu kaIsrayeli, uyambulele lokhu inceku yakho, wathi: Ngizakukwakhela indlu. Ngakho inceku yakho ibe lesibindi sokukhuleka lumkhuleko kuwe.

28Yebo, Nkosi Nkulunkulu, wena unguNkulunkulu, lamazwi akho aliqiniso; uyithembisile inceku yakho lokhu okuhle.

29Ngakhoke akuyibusise indlu yenceku yakho ukuze ibe phambi kwakho kuze kube nininini; ngoba ukhulumile, wena Nkosi Nkulunkulu; izabusiswa ngesibusiso sakho indlu yenceku yakho kuze kube nini lanini.