Nani 3 - Ndebele Bible (iBhayibhili Elingcwele) 1978

Imisebenzi yamaLevi

1Lezi yizizukulwana zikaAroni lezikaMose ngesikhathi sokukhuluma kweNkosi kuMose entabeni yaseSinayi.

2Nanka amadodana kaAroni; uNadabi izibulo, loAbihu, loEleyazare, loIthamari;

5INkosi yasisithi kuMose:

6Sondeza isizwe sakoLevi, usikhethele ukusiza uAroni umpristi lokumsebenzela.

7Bazakumsiza yena lebandla lonke emisebenzini yabo phambi kwethente lokuhlangana nxa besenza inkonzo eTabernakelini.

8Bazalondoloza yonke impahla yethente lokuhlangana, benzele abantu bakoIsrayeli imisebenzi nxa besenza inkonzo eTabernakelini.

9Uzakunikela amaLevi kuAroni lasemadodaneni akhe; azakunikelwa kuye ngokupheleleyo ngabantu bakoIsrayeli.

10Uzakubeka uAroni lamadodana akhe ukuba benze umsebenzi wabo wobupristi. Kodwa uba kusondela omunye umuntu, uzabulawa.

11INkosi yathi kuMose:

12Khangela, sengizikhethele amaLevi phakathi kwabantu bonke bakoIsrayeli endaweni yawo wonke amadodana angamazibulo abo bonke abesifazana. AmaLevi azakuba ngawami,

13ngoba wonke amadodana angamazibulo abangawami ngalolosuku engabulala ngalo wonke amazibulo eGibithe. Ngakho ngazahlukanisela wonke amazibulo koIsrayeli, awabantu lawezifuyo; azakuba ngawami; mina ngiyiNkosi.

14INkosi yathi kuMose enkangala yaseSinayi:

15Bala abantwana bakaLevi ngezindlu zaboyise langensendo, ubale bonke abesilisa kusukela kulabo abalenyanga kusiya phezulu.

16Ngakhoke uMose wababala njengokulaya kweNkosi.

17Nanka amabizo amadodana kaLevi; uGerishoni loKohathi loMerari.

18Nanka amabizo amadodana kaGerishoni ngensendo zawo; uLibini loShimeyi.

19Amadodana kaKohathi ngensendo zawo ayengoAmramu loIzihari loHebroni loUziyeli.

20Amadodana kaMerari ngensendo zawo ayengoMahli loMushi.

Lezi zinsendo zamaLevi ngezindlu zaboyise.

21KuGerishoni kwavela usendo lwamaLibini losendo lwamaShimeyi; lezi zinsendo zamaGerishoni.

22Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane eziyisikhombisa lamakhulu amahlanu.

23Insendo zamaGerishoni zamisa emva kweTabernakeli ngasentshonalanga;

24isikhulu sendlu yamaGerishoni sasinguEliyasafi indodana kaLayeli.

25Umsebenzi wamadodana kaGerishoni ethenteni lokuhlangana wawuyikulondoloza iTabernakeli, lethente, lesifulelo salo, leveli lomnyango wethente lokuhlangana,

26lamakhetheni eguma, leveli lomnyango weguma elizingelezele iTabernakeli lealtare, lezintambo zazo zonke lezizinto.

27KuKohathi kwavela usendo lwamaAmramu, losendo lwamaIzihari, losendo lwamaHebroni, losendo lwamaUziyeli. Lezi zinsendo zamaKohathi.

28Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane ezificaminwembili lamakhulu ayisithupha; benza imisebenzi yendlini engcwele.

29Insendo zamadodana kaKohathi zamisa ngaseningizimu kweTabernakeli,

30isikhulu sawo sasinguElizafani indodana kaUziyeli.

31Umsebenzi wabo uzakuba yikulondoloza umtshokotsho wesivumelwano, letafula, loluthi lwesibane, lama‐altare, lezitsha zendlu engcwele abakhonza ngazo abapristi, leveli lazo zonke izinto zalo.

32Umphathi wazo zonke izikhulu zamaLevi kwakunguEleyazare, indodana kaAroni umpristi, wayephethe labo abalondoloza indlu engcwele.

33KuMerari kwavela usendo lwamaMahli losendo lwamaMushi; lezi zinsendo zamaMerari.

34Inani labo bonke abesilisa ababalwayo, kusukela kulabo abalenyanga kusiya phezulu, lalizinkulungwane eziyisithupha lamakhulu amabili.

35Isikhulu sabo sasinguZuriyeli indodana kaAbihayili. Bamisa ngasenyakatho kweTabernakeli.

36Umsebenzi wamadodana kaMerari wawuyikulondoloza imijabo yeTabernakeli, lemithando yalo, lensika zalo, lenyawo zalo, kanye lezitsha zalo, layo yonke impahla yalo,

37kanye lensika zeguma inxa zonke, lenyawo zazo, lezikhonkwane zazo, lezintambo zazo.

38Labo ababemise phambi kweTabernakeli ngasempumalanga, phambi kwethente lokuhlangana, kwakungoMose loAroni lamadodana akhe, balondoloza inkonzo zasendlini engcwele, benzela abakoIsrayeli okufaneleyo. Bonke abasondela lapho babulawa.

39Bonke abesilisa bamaLevi ababalwa ngensendo, kusukela kulabo abalenyanga kusiya phezulu, bebalwa nguMose njengokulaya kweNkosi, babezinkulungwane ezingamatshumi amabili lambili.

Ihlawulo ngamazibulo

40INkosi yasisithi kuMose: Bala wonke amazibulo esilisa abantu bakoIsrayeli, kusukela kulabo abalenyanga kusiya phezulu, ubabale ngamabizo.

41Uzakunikela amaLevi kimi engiyiNkosi, endaweni yawo wonke amadodana angamazibulo abakoIsrayeli, unikele kimi lezinkomo zamaLevi endaweni yamazibulo wonke ezinkomo zabakoIsrayeli.

42Ngakhoke uMose wabala wonke amazibulo abakoIsrayeli, njengokutsho kweNkosi kuye.

43Wonke amazibulo esilisa abalwa ngamabizo, kusukela kulawo alenyanga kusiya phezulu, ayezinkulungwane ezingamatshumi amabili lambili, lamakhulu amabili, lamatshumi ayisikhombisa lantathu.

44INkosi yathi kuMose:

45Thatha amaLevi endaweni yamazibulo abakoIsrayeli, lezinkomo zamaLevi endaweni yezinkomo zabo; amaLevi azakuba ngawami; ngiyiNkosi.

46Ukuba bahlengwe labo abangamakhulu amabili lamatshumi ayisikhombisa lantathu bamazibulo abakoIsrayeli, abadlula inani lamaLevi,

47uzakuthatha amashekeli amahlanu ngamunye, uwabale ngokweshekeli lendlu engcwele, elilingana lamagera angamatshumi amabili,

48umnike uAroni lamadodana akhe imali le ibe lihlawulo ngalabo abadlula inani lamaLevi.

49Ngakhoke uMose wasethatha imali yaba lihlawulo lalabo ababengaphezu kwabahlengwe ngamaLevi.

50Imali ayithathayo yayingamashekeli ayinkulungwane, lamakhulu amathathu, lamatshumi ayisithupha lanhlanu, kubalwa ngokweshekeli lendlu engcwele;

51uMose wayinika uAroni lamadodana akhe njengokulaya kweNkosi.