1Kwathi ngomnyaka wesithupha, ngosuku lwesihlanu lwenyanga yesithupha, ngihlezi endlini yami, labadala bakoJuda behlezi lami, isandla seNkosi sehlela phezu kwami.
2Ngabona okwakufana lomuntu; kwakuvutha umlilo kusukela okhalweni kusiya phansi, kucwazimula njengethusi kusukela okhalweni kusiya phezulu.Hez 1:27
3Waseselula okwakungathi yisandla, wangibamba ngenwele. Umoya wangiphakamisela phakathi komhlaba lezulu, wangiletha ngemibono kaNkulunkulu eJerusalema, ngasentubeni yeguma elingaphakathi, elikhangele inyakatho, lapho kwakukhona isihlalo sesithombe somona esibanga umona.
4Inkazimulo kaNkulunkulu kaIsrayeli yayilapho injengokuyibona kwami esihotsheni.Hez 1:28
5Wasesithi kimi: Ndoda, ake ukhangele ngasenyakatho. Ngasengikhangela ngasenyakatho, ngabona lesosithombe somona ngasenyakatho kwesango lealtare, ngasentubeni yalo.
6Wasesithi kimi: Ndoda, uyakubona lokho abakwenzayo, amanyala amakhulu enziwa ngabakoIsrayeli lapha, ukungixotshela khatshana lendawo yami engcwele na? Kodwa usezakubona amanyala adlula la.
7Wasengisa emnyango weguma; kwathi lapho ngikhangela, ngabona imbobo emdulini.
8Wasesithi kimi: Ndoda, bhoboza umduli. Ngathi ukuba ngiwubhoboze umduli, ngabona umnyango.
9Wasesithi kimi: Ngena, ubone amanyala angcolileyo abawenzayo lapha.
10Ngasengingena, ngabona lapho kudwetshiwe emidulini inxa zonke imifanekiso yazo zonke izinto ezihahabayo, lezilo ezenyanyekayo, lazo zonke izithombe zakoIsrayeli.
11Kwakumi phambi kwazo abadala bakoIsrayeli abangamatshumi ayisikhombisa bekanye loJazaniya indodana kaShafani. Bonke babephethe indengezi zempepha, zithunqa intuthu yempepha.
12Wasesithi kimi: Ndoda, uyakubona lokho abakwenzayo emnyameni abadala bakoIsrayeli ezindlini zabo zemifanekiso na? Ngoba bathi: INkosi kayisiboni; iNkosi ilitshiyile ilizwe layo.
13Wasesithi kimi futhi: Uzabuya ubone amanyala amakhulu ukudlula la abawenzayo.
14Wasengisa ngasentubeni yesango langasenyakatho kwendlu yeNkosi; ngabona lapho abesifazana bekhalela unkulunkulu uTamuzi.
15Wasesithi kimi: Uyakubona lokhu, wena ndoda na? Ng’khona usuzakubona amanyala amakhulu ukwedlula la.
16Wangingenisa egumeni elingaphakathi kwethempeli; ngabona ngasemnyango wethempeli leNkosi phakathi komkoto lealtare abantu abangamatshumi amabili lanhlanu befulathele ithempeli leNkosi, bekhangele ngasempumalanga, bekhonza ilanga eliphumayo.
17Wasesithi kimi: Uyakubona lokhu, wena ndoda na? Kuyinto elula koJuda ukwenza amanyala abawenzayo lapha yini, ukuba bagcwalise ilizwe ngokubi, bavuse ulaka lwami na? Khangela, babeka ingatsha empumulweni zabo.
18Ngizabasukela ekuthukutheleni kwami. Kangiyikubayekela ngibahawukele; lanxa bekhala kakhulu, kangiyikubezwa.
Who We AreWhat We EelieveWhat We Do
2025 by iamachristian.org,Inc All rights reserved.
