Hab 1 - Ndebele Bible (iBhayibhili Elingcwele) 1978

UHabakuki uyasola eNkosini

1Leli yilizwi aliboniswayo uHabakuki umprofethi.

2Ngizakukuncenga kuze kube nini, Nkosi, ukuba ungizwe,

loba ngimemeze kuwe ngobubi, ungangisizi na?

3Ungitshengiselani okubi lenkathazo na?

Ukuchitheka lobubi kuphambi kwami,

kukhona ukulwa lokuxabana.

4Umlayo ubuthakathaka, lokwahlulela kakuphumeleli.

Ngoba omubi uphica olungileyo,

ngakho ukulunga kuyahlanekelwa.

INkosi ivusela uJuda amaKaladiya

5Khangelani phakathi kwezizwe, libone limangale kakhulu.

Ngoba mina Nkosi ngenza imisebenzi ensukwini zenu elingayikuyikholwa lapho ulilandiselwa.

6Ngoba, khangelani, ngivusa amaKaladiya,

isizwe esilesihluku lesilamandla,

esidabula emhlabeni wonke ukuyathumba indawo zokuhlala

ezingeyisizo ezaso.

7Siyesabeka, sitshayisa uvalo,

ukwahlulela lodumo lwaso kuvela kuso.

8Amabhiza aso alejubane kulezingwe,

ayesabeka kulempisi ehamba kusihlwa;

abagadi bamabhiza aso baqhubekela phambili,

bevela elizweni elikhatshana,

bandize njengokhozi oluphuthuma ukudla.

9Bonke bafikela ukwenza ububi,

lokwesabeka kwabo kuhambela phambi kwabo;

babuthe abathunjiweyo babe ngangetshebetshebe.

10Yisizwe esiklolodela amakhosi, lababusi sibahleka ulunya,

sihlekisane ngazo zonke inqaba,

ngoba sibuthelela umhlabathi, sizithathe.

11Sivunguze njengomoya, sedlule,

singabantu abamandla abo angunkulunkulu wabo.

UHabakuki uyasola eNkosini

12Kawusuye owasendulo, wena Nkosi Nkulunkulu wami oNgcwele na?

Kasiyikufa.

Nkosi, wenzile lesisizwe ukuba sibe yinto yokwahlulela;

wena Dwala, usimisele ukutshaya.

13Wena omehlo akho ahlambulukile kakhulu ukuba abone okubi,

ongelakukukhangela okungalunganga,

ubakhangelelani abakhohlisayo na?

Uthulelani lapho ababi beqeda abalungileyo kulabo na?

14Wenza abantu babe njengenhlanzi zolwandle,

njengezinto ezihahabayo ezingelankosi.

15Isizwe samaKaladiya siyabakhupha bonke ngengwegwe, sibadonse ngembule,

sibabuthe ngembule laso elihudulwayo;

ngalokhoke siyathokoza sijabule.

16Ngakhoke siyalihlabela imbule laso,

sitshisele imbule laso elihudulwayo impepha;

ngoba lisizuzela ukudla okunengi lokumnandi.

17Sizaqhubeka ukusebenzisa umkhonto waso kokuphela,

langokubulala izizwe kokuphela na?