uMika 6 - Ndebele Bible (iBhayibhili Elingcwele) 1978

INkosi iphikisana labakoIsrayeli

1Ake lizwe okutshiwo yiNkosi;

Sukumani, lilandise indaba zenu ezintabeni,

lamaqaqa alizwe ilizwi lenu.

2Zwanini ukuphikisa kweNkosi, lina zintaba,

lani zisekelo zomhlaba ezingapheliyo;

ngoba iNkosi iphikisana labantu bayo,

izakumelana loIsrayeli.

3Lina bantu bami, ngenzeni kini na?

Kuyini engilikhathaze ngakho na? Ngiphendulani.

4Ngoba ngalikhupha elizweni laseGibithe,

ngalihlenga endaweni yobugqili;

ngathumela oMose loAroni loMiriyamu ukuba balihole.

5Bantu bami, ake likhumbule amacebo kaBalaki inkosi yaseMowabi,

lokuthi uBalami indodana kaBeyori wamphendula kanjani,

likhumbule lalokho okwenzakalayo kusukela eShitimi kwaze kwaba seGiligali.

ukuze lazi izenzo ezilungileyo zeNkosi.Lokho okubizwa yiNkosi emuntwini

6Ngizakuza ngiphetheni eNkosini,

ngikhothame phambi kukaNkulunkulu ophezulu na?

Ngizakuza kuyo ngiphethe umnikelo wokutshiswa,

ngilamathole alomnyaka owodwa na?

7INkosi izakwaneliswa zinqama eziyinkulungwane,

lezinkulungwane ezilitshumi zemifula yamafutha na?

Ngizakunikela izibulo lami ngenxa yesiphambeko sami,

inzalo yomzimba wami ngenxa yesono senhliziyo yami na?

8Ikutshengisile okuhle, wena muntu,

iNkosi ifunani kuwe na?

Ifuna kuphela ukwenza ukulunga, lokuthanda okungapheliyo,

lokuzithoba phambi kwayo.

9Ilizwi leNkosi liyamemeza kuwo umuzi —

kuyikuhlakanipha okuqotho ukwesaba ibizo lakho.

Zwanini, lina bantu lomphakathi womuzi.

10Ngingayikhohlwa inotho ezuzwa ngokubi esendlini yababi,

lezilinganiso ezikhohlisayo na?

11Ngingamyekela umuntu olezikali ezimbi lesaka eligcwele izilinganiso ezikhohlisayo na?

12Abanothileyo benu bagcwele okubi,

labakhileyo bakhuluma amanga,

lolimi lwabo luyakhohlisa.

13Ngakhoke sengizakulitshaya,

ngilichithe ngenxa yezono zenu.

14Lizakudla, kodwa lingasuthi,

kube khona ukulamba ngaphakathi kwenu;

lizakulondoloza, kodwa kungalondolozeki;

lalokhu elikulondolozayo ngizakukunikela empini.

15Lizahlanyela, kodwa lingavuni;

likhame izithelo zamaoliva, kodwa lingagcobi ngamafutha awo;

lizakhama izithelo zevini, kodwa linganathi iwayini lazo.

16Ngoba ligcinile izimiso zikaOmri,

lenzile yonke imisebenzi yendlu kaAhabi,

lahamba ngamacebo abo,

ngakho ngizalichitha,

labakhileyo benu babe yinhlekisa;

lizakweyiswa ngabantu.