2 Sam 2 - Ndebele Bible (iBhayibhili Elingcwele) 1978

UDavida ubekwe abe yinkosi yakoJuda

1Emva kwalokho uDavida wabuza eNkosini wathi: Ngiye yini komunye umuzi wakoJuda? INkosi yathi kuye: Yana. UDavida wathi: Ngiye kuwuphi na? Yathi: EHebroni.

2Ngakho uDavida wasesiya lapho, labafazi bakhe bobabili, uAhinowama waseJezereli loAbigayili umkaNabali waseKarmeli.1 Sam 25:42–43

3UDavida wathatha abantu bakhe ababelaye, bonke lemizi yabo; bahlala emizini yaseHebroni.

4Kwasekufika abantu bakoJuda, bamgcoba khona uDavida, waba yinkosi yakoJuda.

Kwathi bemtshela uDavida besithi: Abantu baseJabeshi‐Gileyadi yibo abangcwaba uSawuli;1 Sam 31:11–13

5uDavida wathumela izithunywa ebantwini baseJabeshi‐Gileyadi, wathi kibo: INkosi uNkulunkulu ilibusise, ngoba litshengise ukuthembeka kwenu kuSawuli inkosi yenu, lamngcwaba.

6INkosi kayibe lothando olungapheliyo kini leqiniso; lami ngizalenzela okuhle, ngoba lenze lolulutho.

7Ngakhoke qinani libe lesibindi; ngoba uSawuli inkosi yenu ufile; abakoJuda sebegcobe mina, ngaba yinkosi yabo.

UDavida ulwa labendlu kaSawuli

8UAbineri indodana kaNeri, induna yempi kaSawuli, wayethethe uIshiboshethi indodana kaSawuli, wamkhuphulela eMahanayimi,

9wambeka inkosi yaseGileyadi, leyamaAshuri, leyaseJezereli, lakoEfrayimi, lakoBenjamini, leyakoIsrayeli wonke.

10UIshiboshethi, indodana kaSawuli, wayeleminyaka engamatshumi amane ekuqaliseni kwakhe ukubusa uIsrayeli, wabusa iminyaka emibili. Kodwa abakoJuda balandela uDavida.

11UDavida waba yinkosi yakoJuda eHebroni okweminyaka eyisikhombisa lenyanga eziyisithupha.

12UAbineri indodana kaNeri, lenceku zikaIshiboshethi indodana kaSawuli, basuka eMahanayimi, baya eGibeyoni.

13UJowabi indodana kaZeruya, lenceku zikaDavida, basuka bayahlangana labo echibini laseGibeyoni; bahlala phansi, abanye ngapha kwechibi labanye ngale kwalo.

14UAbineri wathi kuJowabi: Insizwa ake zisukume zivikisane phambi kwethu. UJowabi wathi: Kazisukume.

15Zasezisukuma, zeza ngamunye ngamunye, zaba litshumi lambili koBenjamini lakoIshiboshethi indodana kaSawuli, lenceku zikaDavida zaba litshumi lambili.

16Zabambana ngamakhanda, zagwazana ngemihedla enhlangothini; zawela phansi kanyekanye. Ngakho leyondawo kwasekuthiwa yiNsimu yenhlangothi eseGibeyoni.

17Kwaba lempi enzima ngalolosuku, uAbineri labantu bakoIsrayeli behlulwa zinceku zikaDavida.

18Ayekhona lapho amadodana amathathu kaZeruya, oJowabi, loAbishayi loAsaheli. UAsaheli wayelesiqubu njengomziki,

19waxotshana loAbineri; ekumxotsheni kwakhe kaphambukelanga ngakwesokunene langakwesokhohlo.

20UAbineri wanyemukula, wasesithi: Nguwe Asaheli na? Yena waphendula, wathi: Yimi.

21UAbineri wasesithi kuye: Phambukela ngakwesokunene loba ngakwesokhohlo, ubambe enye insizwa, uyithathele impango yayo. Kodwa uAsaheli kavumanga ukuphambuka ekumlandeleni.

22UAbineri wabuye wathi kuAsaheli: Yekela ukungilandela; ngizakubulalelani na? Ngingamkhangelelwa yini uJowabi umfowethu na?

23Kodwa yena wala ukumyekela; ngakho uAbineri wasemgwaza esiswini ngesidindi somkhonto wakhe, umkhonto waze wayathutsha emhlana wakhe; wawela phansi khona lapho, wafela khona. Kwathi bonke abafika endaweni lapho uAsaheli ayefele khona, bema.

24Kodwa uJowabi loAbishayi baxotshana laye uAbineri; ilanga labatshonela befika oqaqeni lwaseAma, olungaphambi kwaseGiya endleleni yasenkangala yaseGibeyoni.

25AbakoBenjamini babuyela ngakuAbineri, baba lixuku linye, bema phezu koqaqa oluthile.

26UAbineri wasememeza uJowabi esithi: Sizakulwa kokuphela na? Kawazi yini ukuba kuzakuba kubi ekucineni na? Koze kube nini ungebalayi abantu bakho ukuba bangaxotshani labafowabo na?

27UJowabi wathi: Ngifunga uNkulunkulu, uba ubungakhulumanga, impela abantu bebengayikuyekela ukuxotshana labafowabo kuze kube sekuseni.

28UJowabi wasetshaya uphondo, bonke abantu basebesima, kababe besaxotshana laye uIsrayeli, futhi kabasalwanga.

29UAbineri labantu bakhe badabula iAraba bonke lobobusuku; bachapha iJordani, bahamba ingxenye yonke yosuku, bafika eMahanayimi.

30UJowabi wabuya ekuxotshaneni loAbineri; esebuthanisile bonke abantu, encekwini zikaDavida kwasilela abalitshumi labaficamunwemunye ngaphandle kukaAsaheli.

31Kodwa inceku zikaDavida zazibulele abakoBenjamini labakaAbineri abantu abangamakhulu amathathu lamatshumi ayisithupha.

32Bamthatha uAsaheli, bamngcwaba engcwabeni likayise elaliseBetlehema. UJowabi labantu bakhe bahamba ubusuku bonke, kwasa beseHebroni.