Jobe 19 - Ndebele Bible (iBhayibhili Elingcwele) 1978

Impendulo kaJobe: uyazi ukuthi uMsizi wakhe uzakumsiza

1Wasephendula uJobe esithi:

2Koze kube nini lingihlupha,

lingiphahlaze ngamazwi na?

3Sekukanengi lingithela ngehlazo;

kalilanhloni ukuthi lingiphatha kubi na?

4Uba kuliqiniso ukuthi ngiduhile,

ukuduha kwami ngokwami ngedwa.

5Uba impela lizikhukhumezela kimi,

liphikisane lami ngenxa yehlazo lami,

6yazinike ukuba nguNkulunkulu ongihlanekeleyo,

wangibamba ngembule lakhe.

7Uba ngimemeza ngisithi: Nanku okubi!

kakho ongiphendulayo.

Uba ngicela ukusizwa, kangizuzi ukwahlulelwa.

8Uyivalile indlela yami ukuze ngingadluli,

wafaka umnyama emikhondweni yami.

9Ungamukile udumo lwami,

wasusa umqhele ekhanda lami.

10Uyangibhidliza inxa zonke, sengiphelile,

uliquphule ithemba lami njengomuntu equphula isihlahla.

11Ulaka lwakhe luyavutha kimi,

ungitshaya isitha sakhe.

12Amabutho akhe ayabuthana,

alungisela ukungivimbezela,

azingelezele ithente lami.

13Ususile kimi abafowethu,

labazana lami sebehlukene impela lami.

14Izihlobo zami labangane bami bangihlamukile,

15izethekeli ezisendlini yami sezingikhohliwe,

lencekukazi zami zingitshaya owasemzini,

sengingowezizweni emehlweni azo.

16Ngibiza inceku yami, ingasabeli;

lanxa ngiyincenge ngamazwi ami.

17Ngiyanuka kumkami,

ngiyisinengiso kumadodana kamama.

18Labantwana abancinyane bayangidelela,

lapho bengibona, bayangihleka.

19Zonke izihlobo zami ziyanengwa yimi,

labo ebengibathanda sebengifulathele.

20Amathambo ami anamathelana lesigogo sami lenyama yami,

ngisile manayinayi.

21Ngihawukelani, ngihawukelani, lina bangane bami!

Ngoba isandla sikaNkulunkulu singithintile.

22Lingizingelelani njengoNkulunkulu na?

Kungani linganeliswa yinyama yami na?

23Kungathi ngabe amazwi ami alotshiwe!

Kungathi ngabe alotshiwe ogwalweni!

24Kungathi ngabe abhalwe ngensimbi langomnuso,

agujwa edwaleni kuze kube nini lanini!

25Ngoba mina ngiyazi ukuba uMsizi wami ukhona,

ekupheleni uzakuma emhlabeni;

26ngimbone ufakazi wami emi eceleni kwami,

ngibone ummeli wami, uNkulunkulu uqobo lwakhe,

27engizambona ngawami amehlo,

mina uqobo lwami kungesuye omunye.

Inhliziyo yami iyaphelelwa ngamandla

28lapho lisithi: Yeka ubunengi bezinhlupheko azehlisele zona!

Isisusa senkathazo sikuye.

29Qaphelisisani umhedla okhombe kini,

umhedla oqeda bonke ububi;

lizakwazi ukuba ukhona umahluleli.