Hlu 8 - Ndebele Bible (iBhayibhili Elingcwele) 1978

1AbakoEfrayimi bathi kuye: Kuyini lokhu okwenze kithi ukuba ungasibizi nxa usiya ukulwa lamaMidiyani na? Bamsola kakhulu.

2Yena wathi kibo: Ngenzeni mina lapho kulinganiswa lokwenziwe yini? Ukudojwa kwezithelo zevini eziseleyo koEfrayimi kakukuhle yini kulokuvuna kulesisivuno sakoAbiyezeri na?

3UNkulunkulu unikele ezandleni zenu amakhosana aseMidiyani, uOrebi loZeba; mina ngenzeni lapho kulinganiswa lokwenziwe yini na? Kwasekudeda ukumthukuthelela kwabo esetsho lokho.

UGidiyoni uthumba amakhosi aseMidiyani

4UGidiyoni wafika eJordani wachapha, yena kanye labantu abangamakhulu amathathu ababelaye, sebediniwe belambile belokhu bexotshana lamaMidiyani.

5Wasesithi kwabaseSukothi: Ake linike abantu bami ukudla, ngoba sebediniwe balambile, ngixotshana loZeba loZalimuna amakhosi aseMidiyani.

6Izinduna zaseSukothi zathi: Usubabambile yini uZeba loZalimuna ukuba siphe impi yakho ukudla na?

7UGidiyoni wathi: Ngenxa yalokhoke nxa iNkosi isinikele uZeba loZalimuna esandleni sami, ngizaklebhula imizimba yenu ngameva asenkangala langothathawe.

8Wasuka lapho, waya ePenuweli, wakhuluma ngendlela efananayo labasePenuweli; bamphendula njengabaseSukothi.

9Wathi kwabasePenuweli: Ekubuyeni kwami senginqobile ngizadiliza inqaba yenu.

10UZeba loZalimuna babeseKarikori lempi yabo engabantu abazinkulungwane elitshumi lanhlanu, kuyikuphela kwabo abaseleyo kuyo yonke impi yabantu basempumalanga, ngoba kwabulawa abantu abazinkulungwane ezilikhulu lamatshumi amabili ababehlomile.

11UGidiyoni wahamba ngendlela yezindwendwe zabahambayo engasempumalanga kweNoba leJogibeha, wayihlasela impi, wayijuma ingananzelele.

12UZeba loZalimuna, amakhosi aseMidiyani, babaleka; waxotshana labo, wababamba, wayethusa yonke impi yabo.

13Kwathi uGidiyoni indodana kaJowashi esebuya ekulweni ngendlela yasemqansweni waseHeresi,

14wabamba insizwa yaseSukothi, wayibuza; yasimbhalela amabizo ezinduna labadala baseSukothi abangamatshumi ayisikhombisa lesikhombisa.

15Wafika ebantwini baseSukothi, wathi kibo: Nampa oZeba loZalimuna elalingiklolodela ngabo lisithi: UZeba loZalimuna usubabambile yini ukuba sinike abantu bakho asebelambile ukudla na?

16Wasethatha abadala bomuzi, wabatshaya labobantu baseSukothi ngameva asenkangala langothathawe.

17Wasediliza inqaba yasePenuweli, wabulala abantu balowomuzi.

18Wathi kuZeba lakuZalimuna: Babenjani labobantu elababulalayo na? Baphendula bathi: Babefanana lawe, bonke befana labantwana bamakhosi.

19Wasesithi: Babengabafowethu, bengabantwana bakamama. Ngifunga iNkosi, uba lalibayekele baphila, lami bengingayikulibulala.

20Wasesithi kuJetheri izibulo lakhe: Sukuma ubabulale. Kodwa umfana lowo kawuhwatshanga umhedla wakhe, wayesesaba ngoba esesengumfana nje.

21UZeba loZalimuna bathi: Sukuma wena usibulale, ngoba ulamandla endoda. Wasesukuma uGidiyoni ebabulala. Wasethatha izigqizo ezazisentanyeni zamakamela abo.

UGidiyoni uyala ukubekwa inkosi

22AbakoIsrayeli bathi kuGidiyoni: Woba ngumbusi wethu, wena lendodana yakho, lendodana yendodana yakho, ngoba usikhulule ezandleni zamaMidiyani.

23UGidiyoni wathi kibo: Kangiyikulibusa, lendodana yami kayiyikulibusa; iNkosi yiyo ezakulibusa.

24Wasesithi kibo: Ake ngenze isicelo kini; nginikani lonke amadikazi eliwaphangileyo. Ngoba labo ababenqotshiwe babefaka amadikazi egolide ngoba bebengabakoIshmayeli.

25Baphendula bathi: Sizakunika wona impela. Basebesendlala ingubo; kwathi bonke abantu baphosela kiyo amadikazi ababewaphangile.

26Ubunzima bamadikazi egolide ayewacelile babungamashekeli egolide azinkulungwane ezingamakhulu ayisikhombisa, ngaphandle kwezigqizo lamangqongqo lezambatho eziyibubende zamakhosi aseMidiyani, langaphandle kwamaketane ayesezintanyeni zamakamela.

27UGidiyoni wenza ngakho isithombe, wasibeka emzini wakhe iOfira. AbakoIsrayeli bonke benza okubi, basikhonza khona; saba ngumjibila kuGidiyoni lendlu yakhe.

Ukufa kukaGidiyoni

28AmaMidiyani anqotshwa ngabakoIsrayeli, kawaphindanga avuka futhi. Kwaba lokuthula elizweni ensukwini zikaGidiyoni iminyaka engamatshumi amane.

29UJerubali indodana kaJowashi wabuyela wayahlala endlini yakhe.

30UGidiyoni wayelamadodana angamatshumi ayisikhombisa aluzalo lwakhe, ngoba wayelabafazi abanengi.

31Omunye umfazi wakhe owayeseShekema laye wamzalela indodana, wayitha ibizo lokuthi nguAbimeleki.

32UGidiyoni indodana kaJowashi wafa eseluphele kakhulu, wangcwatshelwa elibeni likayise uJowashi eOfira elabaseAbiyezeri.

33Kwathi lapho uGidiyoni esefile, abakoIsrayeli babuya benza okubi ngokukhonza oBali, benza uBali‐Berithi waba ngunkulunkulu wabo.

34Kabayikhumbulanga iNkosi uNkulunkulu wabo eyabophula ezandleni zezitha zabo zonke inxa zonke.

35Kabatshengisanga umusa endlini kaJerubali, othiwa nguGidiyoni, ngakho konke okuhle akwenza kuIsrayeli.