1AmaFilistiya abutha izimpi zawo ukuba aphume impi; abuthana eSoko elakoJuda, amisa phakathi kweSoko leAzeka, eEfesi‐Damimi.
2USawuli labantu bakoIsrayeli labo babuthana, bamisa esigodini saseEla, bawahlela amabutho ukuba balwe lamaFilistiya.
3AmaFilistiya ema entabeni ngakwelinye icele, loIsrayeli wema entabeni ngakwelinye, kukhona isigodi phakathi kwabo.
4Kwaphuma ezihonqweni zamaFilistiya iqhawe elithiwa nguGoliyathi waseGathi, ubude bakhe babusedlula ingalo ezine lengxenye.
5Wayethwele ingowane yethusi ekhanda, egqoke ibhatshi lensimbi; ubunzima bebhatshi bungamashekeli ethusi ayizinkulungwane ezinhlanu.
6Wayefake imigwamazi yethusi emibaleni yakhe, egaxe umdikadika wethusi emahlombe.
7Ubuqatha boluthi lomkhonto wakhe babulingana logodo lomaluki, ubunzima besihloko sawo bulingana lamashekeli ensimbi angamakhulu ayisithupha; ophatha isihlangu sakhe wayehamba phambi kwakhe.
8Wema, wamemeza ezinhlwini zakoIsrayeli wathi: Liphumelani ukuzakulwa na? Mina kangisuye umFilistiya yini? Lina kalisizo izinceku zikaSawuli na? Zikhetheleni umuntu ukuba azeqondana lami.
9Uba engalwa lami angibulale, sizakuba yizigqili zenu; kodwa uba ngimahlula ngimbulale, lizakuba yizigqili zethu, lisisebenzele.
10UmFilistiya wathi: Ngiyazeyisa lamuhla izimpi zakoIsrayeli; nginikani umuntu ukuba silwe.
11Kwathi lapho uSawuli loIsrayeli wonke besizwa lamazwi, batshaywa luvalo, besaba kakhulu.
12UDavida wayeyindodana yomEfrathi waseBetlehema koJuda, othiwa nguJese; wayelamadodana aficaminwembili. Ngesikhathi sikaSawuli lowomuntu wayeseluphele eseleminyaka eminengi.
13Amadodana amathathu kaJese amadala ayemlandele uSawuli empini. Amabizo alawomadodana akhe amathathu ayeyile empini ayenguEliyabi owayelizibulo, loAbinadaba omelamayo, lowesithathu enguShama.
14UDavida nguye owayengomncinyane. Amathathu amadala alandela uSawuli,
15kodwa uDavida wayesiya kuSawuli, abuyele ukuyakwalusa izimvu zikayise eBetlehema.
16UmFilistiya wayelokhu esiza, eme, ekuseni lantambama okwensuku ezingamatshumi amane.
17UJese wasesithi kuDavida indodana yakhe: Ake uthathele abafowenu ihefa lomumbu okhanzingiweyo, lezinkwa ezilitshumi, uzise masinyane kubafowenu ezihonqweni.
18Lezizinkwa zetshizi ezilitshumi uzaziphathela induna yabo; ubone ukuthi abafowenu basaphila kuhle yini, ubuye lesibonakaliso esivela kibo.
19USawuli kanye labo, labo bonke abantu abakoIsrayeli babesesigodini saseEla besilwa lamaFilistiya.
20UDavida wavuka ekuseni kakhulu, wathatha impahla, watshiya izimvu kumlindi, wahamba njengokutshelwa kwakhe nguJese. Wafika ezihonqweni nxa impi iphumayo ukuyakulwa, yayimemeza isiga sempi.
21UIsrayeli lamaFilistiya bawahlela amabutho akhangelana.
22UDavida watshiya impahla kumlindi wempahla, wagijimela emabuthweni ukubingelela abafowabo.
23Kwathi esakhuluma labo, iqhawe lamaFilistiya, uGoliyathi, laphuma emabuthweni amaFilistiya, lakhuluma wona lawomazwi afana lawakuqala; loDavida wawezwa.
24Bonke abantu bakoIsrayeli bathi bembona lowomuntu bambalekela, besaba kakhulu.
25Bathi: Limbonile lowana umuntu ophumileyo na? Impela uphumele ukweyisa uIsrayeli. Lowo ombulalayo, inkosi izamnika inotho lendodakazi yayo, lendlu kayise ibe ngekhululekileyo koIsrayeli.
26UDavida wathi ebantwini ababemi laye: Uzakwenzelwani umuntu obulala lumFilistiya, asuse ihlazo koIsrayeli na? Ngoba ungubani lumFilistiya ongasokanga ukuba azeyise izimpi zikaNkulunkulu ophilayo na?
27Abantu bamphendula ngokunjalo bathi: Kuzakwenziwa njalo kulowomuntu ombulalayo.
28UEliyabi umnewabo wezwa lapho ekhuluma labantu; uEliyabi wamthukuthelela kakhulu uDavida, wathi kuye: Ufunani lapha na? Izimvu leziyana ezingengaki uzitshiye lobani egangeni na? Ngiyakwazi ukuziphakamisa kwakho, lobubi benhliziyo yakho; ngoba uzebona impi.
29UDavida wathi: Ngenzeni na? Bengingabuzi kuphela na?
30Wasemfulathela, wakhangela komunye ebuza lowombuzo; abantu bamphendula njengakuqala.
31Kwathi lapho sebewezwile amazwi kaDavida, bamtshela uSawuli; yena wambiza.
32UDavida wathi kuSawuli: Ungabi lomhedehede ngalowomuntu, nkosi; inceku yakho izakuyakulwa lalowomFilistiya.
33USawuli wathi kuDavida: Ungeke uyekulwa lalumFilistiya; ngoba wena ungumfana nje, yena uyindoda yempi kusukela ebutsheni bakhe.
34Kodwa uDavida wathi kuSawuli: Inceku yakho ingumalusi wezimvu zikayise; lapho kufika isilwane loba ibhere ibambe imvu emhlambini,
35ngisuka ngikulandele, ngikutshaye, ngiyikhuphe imvu emlonyeni wakho; uba kungivukela, ngikubambe ngesilevu, ngikutshaye, ngikubulale.
36Inceku yakho seyabulala izilwane lamabhere; lalumFilistiya ongasokanga ngizamenza njalo, lokhu weyisile izimpi zikaNkulunkulu ophilayo.
37UNkulunkulu owangophula enzitsheni zesilwane lenzitsheni zebhere, uzangophula lesandleni salumFilistiya. USawuli wasesithi kuDavida: Hambake, iNkosi ibe lawe.
38USawuli wagqokisa uDavida ezakhe izigqoko, wamthwalisa ingowane yethusi ekhanda, wamgqokisa ibhatshi lensimbi.
39UDavida wabophela umhedla kaSawuli phezu kwezigqoko, wazama ukuhamba, kodwa wehluleka ngoba wayengazejwayelanga. Wasesithi kuSawuli: Ngiyehluleka ukuhamba ngilalezizinto ngoba kangizejwayelanga. Wasezikhupha.
40Wasethatha umqwayi wakhe, wakhetha amatshe amahlanu abutshelezi esifuleni, wawafaka esikhwameni sakhe sokwalusa, waphatha isavutha sakhe, wasesondela kumFilistiya.
41Weza umFilistiya, wasondela kuDavida; umuntu wakhe ophatha isihlangu wayephambi kwakhe.
42Kwathi lapho umFilistiya ekhangela wabona uDavida, wameyisa; ngoba wayengumfanyana nje obukekayo elobuso obubomvana lamehlo amahle.
43UmFilistiya wathi kuDavida: Ngiyinja yini ukuba uze kimi uphethe induku na? UmFilistiya wamqalekisa uDavida ngabonkulunkulu bakhe.
44UmFilistiya wathi kuDavida: Woza lapha, ngizanika inyoni zaphezulu lenyamazana zeganga inyama yakho.
45UDavida wathi kumFilistiya: Wena uza kimi uphethe umhedla, lomkhonto, tomdikadika; kodwa mina ngiza kuwe ngebizo leNkosi yamabandla, uNkulunkulu wezimpi zakoIsrayeli omeyisileyo.
46Lamuhla iNkosi izakukunikela esandleni sami, ngizakukubulala, ngikuqume ikhanda; nginike lamuhla inyoni zaphezulu lenyamazana zomhlaba izidumbu zempi yamaFilistiya, ukuze wonke umhlaba wazi ukuba kukhona uNkulunkulu koIsrayeli.
47Wonke lumhlangano uzakwazi ukuba uNkulunkulu kakhululi ngomhedla langomkhonto; ngoba ukulwa kungokweNkosi, izakukunikela esandleni sethu.
48Kwathi lapho umFilistiya esesondela kuye, uDavida wasegijima masinyane ukuba alwe laye.
49UDavida wafaka isandla sakhe esikhwameni sakhe, wakhupha khona ilitshe, walijikijela, wamtshaya umFilistiya ebunzini lakhe; ilitshe latshona ebunzini, wawela phansi ngobuso.
50UDavida wamahlula umFilistiya ngesavutha langelitshe, wamtshaya, wambulala engaphathanga mhedla esandleni.
51UDavida wasegijima esima phezu komFilistiya, wathatha umhedla wakhe, wawukhupha esikhwameni sawo, waquma ikhanda lakhe ngawo. Kwathi lapho amaFilistiya esebona ukuba iqhawe lawo selifile, abaleka.
52Abantu bakoIsrayeli labakoJuda basuka bamemeza kakhulu, baxotshana lawo baze bafika eGathi lasemasangweni aseEkroni. Abalimeleyo bamaFilistiya bawela endleleni yaseSharayimi baze bafika eGathi leEkroni.
53AbakoIsrayeli babuya ekuxotsheni amaFilistiya, baphanga izihonqo zawo.
54UDavida wathatha ikhanda lomFilistiya, waliletha eJerusalema; kodwa wabeka izikhali zakhe ethenteni lakhe.
55Kwathi uSawuli ebona uDavida ephuma ukuyakulwa lamaFilistiya, wathi kuAbineri induna yempi yakhe: Abineri, uyindodana kabani lumfana na? UAbineri wathi: Ngifunga wena, nkosi, kangazi.
56Inkosi yasisithi: Ake ubuze ukuba uyindodana kabani lumfana.
57UDavida esebuya ekubulaleni umFilistiya, uAbineri wamthatha, wamusa kuSawuli ephethe ikhanda lomFilistiya.
58USawuli wasesithi kuye: Mfana, uyindodana kabani na? UDavida waphendula wathi: Ngiyindodana yenceku yakho, uJese waseBetlehema.
Who We AreWhat We EelieveWhat We Do
2025 by iamachristian.org,Inc All rights reserved.
