Jobe 1 - Ndebele Bible (iBhayibhili Elingcwele) 1978

Ukulingwa kukaJobe lokubekezela kwakhe

1Kwakukhona umuntu othile elizweni laseUzi, ibizo lakhe linguJobe. Lowomuntu wayengelasici, eqotho, emesaba uNkulunkulu, exwaya okubi.

2Wazala amadodana ayisikhombisa lamadodakazi amathathu.

3Wayelezimvu eziyizinkulungwane eziyisikhombisa, lamakamela ayizinkulungwane ezintathu, lenkabi ezingamakhulu amahlanu, labobabhemi abangamakhulu amahlanu, lenceku ezinengi. Wayemkhulu lowomuntu ukwedlula bonke abantu basempumalanga.

4Amadodana akhe ayejwayele ukwenza idili kube yileyo laleyo endlini yayo ngosuku lwayo; ayemema odadewabo abathathu ukuba badle banathe lawo.

5Kwakuthi lapho seziphelile insuku zedili, uJobe ababize, abahlambulule, avuke ekuseni kakhulu, anikele umnikelo wokutshiswa olingana lobunengi bamadodana akhe, ngoba wathi: Mhlawumbe amadodana ami onile, amthuka uNkulunkulu enhliziyweni zawo. Wenza njalo uJobe insuku ngensuku.

6Kwathi ngolunye usuku kwafika amadodana kaNkulunkulu ukuma phambi kweNkosi, loSathane wafika kanye lawo.

7INkosi yathi kuSathane: Wenake, uvela ngaphi? USathane wayiphendula iNkosi wathi: Ekuzulazuleni lomhlaba lokuhambahamba kuwo.

8INkosi yasisithi kuSathane: Uyiqaphele yini inceku yami uJobe ngoba kakho onjengaye emhlabeni ongelasici loqotho, owesaba uNkulunkulu loxwaya okubi na?

9USathane wayiphendula iNkosi wathi: UJobe umesabela ize uNkulunkulu na?Isam 12:10

10Kawumvikelanga inxa zonke yena lendlu yakhe kanye lakho konke alakho na? Ubusisile imisebenzi yakhe, lemfuyo yakhe yandile elizweni.

11Kodwa akewelule isandla sakho, uthinte konke alakho; uzakukuthuka ebusweni bakho.

12INkosi yasisithi kuSathane: Khangela konke alakho kusemandleni akho; kodwa ungamthinti yena uqobo. Wasesukake uSathane phambi kweNkosi.

13Kwathi ngolunye usuku lapho amadodana lamadodakazi akhe ayesidla enatha iwayini endlini yomfowabo omdala,

14kwafika isithunywa kuJobe sathi: Inkabi bezikade zilima labobabhemi besidla phansi kwazo;

15kwatheleka abantu baseSheba, bazithumba, babulala izinceku, yimi ngedwa kuphela engisilileyo ukuba ngikubikele.

16Kwathi sisakhuluma, kwafika esinye, sathi: Umlilo kaNkulunkulu wehlile uvela ezulwini, watshisa izimvu lezinceku, waziqeda du; yimi ngedwa kuphela engisilileyo ukuba ngikubikele.

17Sisakhuluma, kwafika esinye, sathi: AmaKaladiya angamaxuku amathathu ahlasele amakamela, awathumba, abulala izinceku, yimi ngedwa kuphela engisilileyo ukuba ngikubikele.

18Sisakhuluma, kwafika esinye, sathi: Amadodana lamadodakazi akho abekade esidla enatha iwayini endlini yomfowabo omdala;

19umoya omkhulu waqhamuka enkangala, watshaya insika zozine zendlu, yawela phezu kwabo, bafa; yimi ngedwa kuphela engisilileyo ukuba ngikubikele.

20UJobe wasesuka edabula ingubo yakhe, waphuca ikhanda lakhe, wawa phansi, wakhuleka;

21wathi:

Ngaphuma ngize esiswini sikamama,

ngizabuyela khona ngize;

iNkosi yapha, iNkosi ibuye yathatha;

kalidunyiswe ibizo leNkosi.

22Kukho konke lokhu uJobe konanga, kamsolanga ngokubi uNkulunkulu.