2 Lan 10 - Ndebele Bible (iBhayibhili Elingcwele) 1978

AbakoIsrayeli bavukela indlu kaDavida

1URehobowamu waya eShekema ngoba bonke abakoIsrayeli babeye khona ukumbeka abe yinkosi.

2Kwathi uJerobowamu indodana kaNebati ekuzwa lokhu, wabuya evela eGibithe, ngoba wayelokhu eseGibithe lapho ayebalekele khona, ebalekela inkosi uSolomoni.

3AbakoIsrayeli basebethumela ilizwi ukumbiza; yena labo bonke abakoIsrayeli beza bathi kuRehobowamu:

4Uyihlo wasithwalisa umthwalo onzima; wenake ake uphungule ubunzima asethwesa bona, wethule lemithwalo yethu abesithwalise yona; ng’khona sizakukukhonza.

5Yena wathi kibo: Buyani futhi emva kwensuku ezintathu. Basebehambake.

6Inkosi uRehobowamu yasicebisana labadala ababeloyise uSolomoni esaphila, yathi: Lithi angithini kulababantu na?

7Bathi: Uba uzakuba lomusa kulababantu, ubathokozise, ukhulume kibo amazwe amahle, bazakuba zinceku zakho kokuphela.

8Kodwa yena wasidelela iseluleko sabadala, wacebisana lamajaha ayeyintanga yakhe, esizana laye.

9Wathi kuwo: Lithi sibaphendule sithini lababantu abathe kimi: Ake uphungule ubunzima esabethweswa nguyihlo?

10Amajaha ayeyintanga yakhe athi: Uzakutsho kulababantu abathi kuwe: Uyihlo wasethwesa ubunzima, kodwa akusiphungulele bona; uthi kibo: Ucikilicane wami uqatha kulokhalo lukababa.

11Ubaba walethwesa ubunzima, mina ngizakwengezelela kubo. Ubaba walitshaya ngesiswepu, kodwa mina ngizalitshaya ngemichilo elameva.

12UJerobowamu labo bonke abantu babuya kuRehobowamu ngosuku lwesithathu njengokutsho kwakhe ukuthi: Libuye kimi futhi ngosuku lwesithathu.

13Inkosi yabaphendula ngolaka abantu, yadela iseluleko sabadala,

14yalandela esamajaha yathi: Ubaba walethwesa ubunzima, mina ngizakwengezelela kubo; walitshaya ngesiswepu, kodwa mina ngizalitshaya ngemichilo elameva.

15Inkosi kayibalalelanga abantu; ngoba lokhu kwenziwa yiNkosi uNkulunkulu ukuze igcwalise ilizwi layo eyayilikhulume ngoAhija waseShiloni kuJerobowamu indodana kaNebati.

16Lapho bonke abakoIsrayeli bebona ukuthi inkosi kayibalaleli, bayiphendula bathi:

Silesabelo bani kuDavida na?

Kasilalifa thina endodaneni kaJese.

Yanini emizini yenu, lina bakoIsrayeli!

Sala lendlu yakho, Davida.

Basebehambake abakoIsrayeli, baya emizini yabo.2 Sam 20:1

17URehobowamu wabusa labo abakoIsrayeli ababehlala emizini yakoJuda.

18Inkosi uRehobowamu yasithuma uAdoniramu owayengumphathi wezibhalwa; abakoIsrayeli bamkhanda ngamatshe bambulala. Inkosi uRehobowamu yakhwela masinyane inqola yayo yokulwa, yabalekela eJerusalema.

19Kusukela kulesosikhathi abakoIsrayeli bayihlamuka indlu kaDavida kuze kube lamuhla.