1 Kor 14 - Ndebele Bible (iBhayibhili Elingcwele) 1978

Isiphiwo sokutshumayela sidlula esokukhuluma ngendimi

1Nxwanelani uthando, lifise kakhulu iziphiwo zomoya, ikakhulu ukuba litshumayele.

2Ngoba okhuluma ngendimi kakhulumi ebantwini, kodwa ukhuluma kuNkulunkulu; ngoba kakho omuzwayo, kodwa ukhuluma imfihlakalo ngomoya.

3Otshumayelayo ukhuluma ebantwini amazwi okuba abakhe, abakhuthaze, abaduduze.

4Okhuluma ngendimi uyazakha yena, kodwa otshumayelayo wakha ibandla.

5Ngiyathanda ukuba likhulume ngendimi lonke, kodwa kakhulu ukuba litshumayele. Otshumayelayo mkhulu kulokhuluma ngendimi, uba engachasisi, ukuze ibandla lakheke.

6Phoke, bazalwane, uba ngifika kini ngikhuluma ngendimi, ngizalisiza ngani, uba ngingakhulumi kini ilizwi lokwambulela, loba elokwazi, loba elokutshumayela, ingabe elokufundisa, na?

7Lezinto ezingelakusila ezikhalayo ezinjengomhlanga, loba ichacho, uba zingakhali ngokwehlukeneyo, kuzakwaziwa kanjani okutshaywayo na?

8Uba uphondo lukhala ngelizwi elingaqondakaliyo, ngubani ozakuzilungisela ukulwa na?

9Kunjaloke lani, uba lingakhulumi amazwi acacileyo, kuzakwaziwa kanjani okukhulunywayo na? Ngoba lizakuba likhuluma umoya nje.

10Kukhona indimi ezinengi emhlabeni, kodwa kalukho olungatsho lutho.

11Ngakhoke uba ngingalwazi ulimi, ngizakuba ngowezizweni kulowo okhulumayo, lalowo okhulumayo uzakuba ngowezizweni kimi.

12Lanike, lokhu litshisekela iziphiwo zomoya, zamani ukuba libe lalezo kakhulu ezakhayo ibandla.

13Ngakhoke okhulumayo ngendimi kakhulekele ukuba abe lamandla okuchasisa.

14Uba ngikhuleka ngendimi kukhuleka umoya wami, kodwa ingqondo yami kayilasithelo.

15Pho, ngenza njani na? Ngizakukhuleka ngomoya, futhi ngizakukhuleka langengqondo. Ngizakuhlabelela ngomoya, futhi ngizakuhlabelela langengqondo.

16Uba kungenjalo, nxa ubonga ngomoya, lowo ongafundanga angatsho kanjani ukuthi Ameni ekubongeni kwakho, lokhu engakwazi okutshoyo na?

17Ngoba impela ubonga kuhle, kodwa lowo omunye kakheki.

18Ngiyambonga uNkulunkulu ngoba mina ngikhuluma ngendimi kakhulu kulani lonke;

19kodwake ebandleni ngingathanda ukukhuluma amazwi amahlanu ngengqondo yami, ukuze ngifundise abanye, kulokuba ngikhulume ngendimi amazwi ayizinkulungwane ezilitshumi.

20Bazalwane, lingabi ngabantwana ngengqondo zenu; kanti ebubini wobani msulwa njengezingane, kodwa ekunakaneni libe ngabakhulileyo.

21Emlayweni kulotshiwe ukuthi:

Ngabantu bezinye indimi, langomlomo wabezizwe, ngizakukhuluma kulesisizwe;

kodwa loba kunjalo kabayikungizwa, kutsho iNkosi.

22Ngakhoke indimi ziyisibonakaliso kwabangakholwayo, kungesikho kwabakholwayo; kanti ukutshumayela kuyisibonakaliso kwabakholwayo, kungesikho kwabangakholwayo.

23Ngakhoke uba ibandla lonke libuthene ndawonye, bonke bakhulume ngendimi, besekungena abangafundanga loba abangakholwayo, kabazukuthi liyahlanya na?

24Kodwa uba bonke betshumayela, kungene ongakholwayo loba ongafundanga, uzakuhlatshwa yibo bonke, ahlolwe yibo bonke;

25okufihliweyo kwenhliziyo yakhe kuyadalulwa; njalo uzakuwa ngobuso phansi akhonze uNkulunkulu, aqinise ukuthi uNkulunkulu uphakathi kwenu.

Indlela yokukhonza kwebandla

26Phoke, bazalwane? Nxa libuthana, ilowo lalowo uba lehubo, loba isifundiso, loba isambulelo, loba ulimi, ingabe ukuchasisa ulimi; konke kakwenzelwe ukwakhiwa kwebandla.

27Uba umuntu ekhuluma ngendimi, kakube ngababili ingabe abathathu, badedelane, omunye achasise;

28kodwa uba kungekho ochasisayo, kathule ebandleni, azikhulumele yedwa lakuNkulunkulu.

29Abatshumayelike, kukhulume ababili loba abathathu, abanye bahlolisise okutshiwoyo;

30uba kusambulelwa ulutho komunye ohlezi khona, kathule owokuqala.

31Ngoba lingatshumayela lonke ngamunye, ukuze bafunde bonke, bakhuthazwe bonke.

32Imimoya yabatshumayeli iyathobela abatshumayeli;

33ngoba uNkulunkulu kasuye uNkulunkulu wesiphithiphithi kodwa ungowokuthula. Njengoba kunjalo emabandleni wonke abangcwele,

34abesifazana kabathule emabandleni; ngoba kabavunyelwa ukuba bakhulume; kodwa kabazithobe, njengokutsho komlayo.

35Uba bethanda ukwazi ulutho, kababuze kubomkabo emakhaya; ngoba kulihlazo ukuba owesifazana akhulume ebandleni.

36Kanje ilizwi likaNkulunkulu lavela kini yini, kumbe lafika kini lodwa na?

37Uba umuntu esithi ungumtshumayeli, loba ungowomoya, kaqonde ukuthi lokhu engililobela khona kungumlayo weNkosi.

38Uba umuntu engakwazi lokhu, kahlale engaziwa.

39Ngakhoke, bazalwane, tshisekelani ukutshumayela, lingakuvimbeli ukukhuluma ngendimi.

40Kodwa konke kakwenziwe ngemfanelo langendlela.