2 Kho 15 - Ndebele Bible (iBhayibhili Elingcwele) 1978

Ukubusa kukaAzariya

1Ngomnyaka wamatshumi amabili lesikhombisa wokubusa kukaJerobowamu, inkosi yakoIsrayeli, uAzariya indodana kaAmaziya, inkosi yakoJuda, waba yinkosi.

2Wayeleminyaka elitshumi lesithupha lapho eqalisa ukubusa; wabusa iminyaka engamatshumi amahlanu lambili eJerusalema. Ibizo likanina lalinguJekoliya waseJerusalema.

3Wenza okulungileyo phambi kweNkosi njengokwenza konke kukayise uAmaziya.

4Kodwa indawo eziphakemeyo zokukhonzela kazivalwanga; abantu babelokhu benikela imihlatshelo betshisa impepha endaweni eziphakemeyo.

5INkosi yayehlisela inkosi uAzariya ubulephero eyabugula yaze yafa. Yahlala endlini yayo yodwa. UJothamu indodana yayo wayegcina isigodlo senkosi, ephethe labantu belizwe.

6Ezinye indaba zikaAzariya lakho konke akwenzayo kulotshiwe ogwalweni lwezindaba zamakhosi akoJuda.

7UAzariya waya kwabaphansi, bamngcwaba kubokhokho bakhe emzini kaDavida. UJothamu indodana yakhe waba yinkosi esikhundleni sakhe.Ukubusa kukaZekariya

8Ngomnyaka wamatshumi amathathu lesificaminwembili wokubusa kukaAzariya inkosi yakoJuda uZekariya indodana kaJerobowamu wabusa uIsrayeli eSamariya inyanga eziyisithupha.

9Wenza okubi phambi kweNkosi njengokhokho bakhe. Kazitshiyanga izono zikaJerobowamu indodana kaNebati ezenza uIsrayeli one.

10UShaluma indodana kaJabeshi wamenzela amacebo, wamtshaya wambulala eIbileyamu, wabusa esikhundleni sakhe.

11Ezinye indaba zikaZekariya zilotshiwe ogwalweni lwezindaba zamakhosi akoIsrayeli.

12Yiso lesi isithembiso iNkosi eyasitsho kuJehu yathi: Amadodana akho azabusa uIsrayeli kuze kube sesizukulwaneni sesine. Sagcwaliseka.Ukubusa kukaShaluma

13UShaluma indodana kaJabeshi waqala ukubusa ngomnyaka wamatshumi amathathu lesificamunwemunye wokubusa kukaUziya inkosi yakoJuda; wabusa inyanga yanye eSamariya.

14UMenahema indodana kaGadi wasuka eTiriza, waya eSamariya, wamtshaya wambulala eSamariya uShaluma indodana kaJabeshi; wabusa esikhundleni sakhe.

15Ezinye indaba zikaShaluma lamacebo awenzayo kulotshiwe ogwalweni lwenzindaba zamakhosi akoIsrayeli.

16UMenahema wasesuka eTiriza, wachitha iTapuwa lakho konke okwakukilo. Wahlasela ilizwe lakhona, walichitha ngoba lalingamvulelanga amasango alo, waqhaqha bonke abesifazana abakhulelweyo.

Ukubusa kukaMenahema

17Ngomnyaka wamatshumi amathathu lesificamunwemunye wokubusa kukaAzariya inkosi yakoJuda uMenahema indodana kaGadi waba yinkosi koIsrayeli; wabusa iminyaka elitshumi eSamariya.

18Wenza okubi phambi kweNkosi, kazitshiyanga izono zikaJerobowamu indodana kaNebati owenza uIsrayeli one.

19Ensukwini zakhe uPuli inkosi yaseAsiriya walihlasela ilizwe; uMenahema wanika uPuli amathalenta esiliva ayinkulungwane ukuba amsize ukuqinisa umbuso wakhe.

20UMenahema wabathelisa leyomali bonke abantu abanothileyo bakoIsrayeli, yilowo lalowo wakhupha amashekeli esiliva angamatshumi amahlanu ukuba awanike inkosi yaseAsiriya. Inkosi yaseAsiriya yasibuyela emuva, kayaze yahlala elizweni.

21Ezinye indaba zikaMenahema lakho konke akwenzayo kulotshiwe ogwalweni lwezindaba zamakhosi akoIsrayeli.

22UMenahema waya kwabaphansi. UPekahiya indodana yakhe waba yinkosi esikhundleni sakhe.

Ukubusa kukaPekahiya

23Ngomnyaka wamatshumi amahlanu wokubusa kukaAzariya inkosi yakoJuda uPekahiya indodana kaMenahema waba yinkosi koIsrayeli eSamariya, wabusa iminyaka emibili.

24Wenza okubi phambi kweNkosi, kazitshiyanga izono zikaJerobowamu indodana kaNebati ezenza uIsrayeli one.

25UPeka indodana kaRemaliya, induna yakhe, wamenzela amacebo kanye labantu baseGileyadi abangamatshumi amahlanu, bambulala eSamariya enqabeni yesigodlo. Wabulala inkosi, waba yinkosi esikhundleni sayo.

26Ezinye indaba zikaPekahiya lakho konke akwenzayo kulotshiwe ogwalweni lwezindaba zamakhosi akoIsrayeli.

Ukubusa kukaPeka

27Ngomnyaka wamatshumi amahlanu lambili wokubusa kukaAzariya inkosi yakoJuda uPeka indodana kaRemaliya waba yinkosi koIsrayeli eSamariya; wabusa iminyaka engamatshumi amabili.

28Wenza okubi phambi kweNkosi, kazitshiyanga izono zikaJerobowamu indodana kaNebati ezenza uIsrayeli one.

29Ensukwini zikaPeka inkosi yakoIsrayeli uTigilathi‐Pileseri inkosi yaseAsiriya wafika wathumba iIjoni, leAbeli‐Beti‐Mahaka, leJanowa, leKedeshi, leHazori, leGileyadi, leGalili, lonke ilizwe lakoNafitali; wathumba abantu, wabesa eAsiriya.

30UHosheya indodana kaEla wamenzela icebo uPeka indodana kaRemaliya, wamtshaya wambulala, wabusa esikhundleni sakhe ngomnyaka wamatshumi amabili wokubusa kukaJothamu, indodana kaUziya.

31Ezinye indaba zikaPeka lakho konke akwenzayo kulotshiwe ogwalweni lwezindaba zamakhosi akoIsrayeli.

Ukubusa kukaJothamu

32Ngomnyaka wesibili wokubusa kukaPeka indodana kaRemaliya inkosi yakoIsrayeli uJothamu indodana kaUziya inkosi yakoJuda waba yinkosi.2 Lan 27:1–9

33Wayeleminyaka engamatshumi amabili lanhlanu lapho eqalisa ukubusa; wabusa iminyaka elitshumi lesithupha eJerusalema. Ibizo likanina lalinguJerusha indodakazi kaZadoki.

34Wenza okulungileyo phambi kweNkosi njengokwenza konke kukayise uUziya.

35Kodwa indawo eziphakemeyo zokukhonzela kazivalwanga; abantu babelokhu benikela imihlatshelo betshisa impepha endaweni eziphakemeyo. Wakha isango lethempeli elingaphezulu.

36Ezinye indaba zikaJothamu lakho konke akwenzayo kulotshiwe ogwalweni lwezindaba zamakhosi akoJuda.

37Ngalezonsuku iNkosi uNkulunkulu yenza uRezini inkosi yaseSiriya loPeka indodana kaRemaliya ukuba bahlasele uJuda.

38UJothamu waya kwabaphansi, wangcwatshwa kubokhokho bakhe emzini kaDavida ukhokho wakhe. UAhazi indodana yakhe waba yinkosi esikhundleni sakhe.