1 Lan 11 - Ndebele Bible (iBhayibhili Elingcwele) 1978

UDavida uba yinkosi koIsrayeli

1Bonke abakoIsrayeli beza kuDavida eHebroni bathi: Thina siyizihlobo zakho.2 Sam 5:1–10

2Esikhathini esidlulileyo, lanxa uSawuli wayeyinkosi yethu, nguwe owakhokhela uIsrayeli; iNkosi uNkulunkulu yathi kuwe: Wena uzakuba ngumalusi wabantu bami uIsrayeli, uzakuba ngumbusi wabo.

3Kwafika bonke abadala bakoIsrayeli enkosini uDavida eHebroni; yenza isivumelwano labo eHebroni phambi kweNkosi. Bamgcoba, waba yinkosi koIsrayeli, njengokutsho kweNkosi ngoSamuweli.

UDavida uthatha inqaba yaseZiyone

4UDavida labo bonke abakoIsrayeli baya eJerusalema elalithiwa liJebusi, lapho kwakuhlala khona amaJebusi, abantu balelolizwe.Josh 15:63; Hlu 1:21

5AbaseJebusi bathi kuDavida: Kawuyikungena lapha. Kodwa uDavida wayithumba inqaba yazeZiyone engumuzi kaDavida.

6UDavida wathi: Lowo ozahlasela umJebusi kuqala uzakuba ngumkhokheli lomphathi. UJowabi indodana kaZeruya wahlasela kuqala, wasesiba ngumkhokheli.

7UDavida wahlala enqabeni; ngalokhoke yasibizwa ngokuthi ngumuzi kaDavida.

8Wawakha umuzi inxa zonke kusukela edundulwini elithiwa yiMilo waze wawuhlanganisa. UJowabi walungisa umuzi oseleyo.

9UDavida waqhubeka njalo esiba lamandla, ngoba iNkosi yamabandla yayilaye.

Amaqhawe kaDavida

10Lezi yizinduna zamaqhawe kaDavida ezazimsekele ngokuqinileyo embusweni kanye laye wonke uIsrayeli ukuba abe yinkosi, njengelizwi leNkosi mayelana loIsrayeli.

11Nanka amabizo amaqhawe kaDavida; uJashobeyamu waseHakimoni owayeyinduna yabathathu; nguye owagiya ngomkhonto wakhe phezu kwabangamakhulu amathathu, wababulala ngasikhathi sinye.

12Wayelandelwa nguEleyazare indodana kaDodo waseAhohi, omunye wamaqhawe amathathu.

13WayeloDavida ePasidamini lapho amaFilistiya ayebuthanele ukulwa khona. Kwakukhona insimu eyayilamabele; kwathi lapho abakoIsrayeli sebehlehlile phambi kwamaFilistiya,

14yena wema phakathi kwensimu wayivikela, wawabulala amaFilistiya. INkosi yabanika ukunqoba okukhulu.

15Abathathu ezinduneni ezingamatshumi amathathu basuka baya edwaleni kuDavida eduze lobhalu lwaseAdulamu lapho ibutho lamaFilistiya lalimise esihotsheni saseRefayimi.

16UDavida wayesenqabeni, lamabutho alindayo amaFilistiya ayeseBetlehema.

17UDavida wasesoma kakhulu wathi: Hawu, kungathi nginganathiswa amanzi omthombo waseBetlehema ongasesangweni.

18Lawomaqhawe amathathu afohlela ezihonqweni zamaFilistiya, akha amanzi emthonjeni waseBetlehema owawungasesangweni, awathatha awaletha kuDavida. Kodwa uDavida wala ukuwanatha; wawathululela phansi aba ngumnikelo eNkosini,

19wathi: Ngingeke ngikwenze lokho; kungaba njengokunatha igazi lalababantu abangenise ukuphila kwabo engozini ukuwaletha. Ngalokhoke wala ukuwanatha. Lezizinto zenziwa yilawomaqhawe amathathu.

20UAbishayi umfowabo kaJowabi wayeyinduna yabangamatshumi amathathu. Wagiya ngomkhonto wakhe phezu kwabangamakhulu amathathu, wababulala, wazizuzela ibizo phakathi kwalabo abangamatshumi amathathu.

21Wayelodumo olukhulu phakathi kwabangamatshumi amathathu, waba yinduna yabo; kodwa wayengalingani lamaqhawe amathathu.

22UBenaya indodana kaJehoyada waseKabizeli wayeliqhawe elenza izenzo ezinkulu ezinengi. Nguye owabulala amaqhawe amabili aseMowabi; futhi wangena emgodini, wabulala isilwane mhla kulongqoqwane.

23Wabulala lomGibithe, umuntu oqatha kakhulu, ubude bakhe buzingalo ezinhlanu. UmGibithe lowo wayephethe umkhonto ongangogodo lomaluki; kodwa uBenaya waya kuye ephethe induku nje, wawuhluthuna umkhonto esandleni sakhe, wambulala ngomkhonto wakhe.

24Lezizinto wazenza uBenaya indodana kaJehoyada, wazizuzela ibizo phakathi kwalabo abangamatshumi amathathu.

25Wayelodumo phakathi kwabangamatshumi amathathu, kodwa wayengalingani lamaqhawe amathathu ngobuqhawe. UDavida wambeka induna yabalindi bakhe.

26Amabutho angamaqhawe alamandla ayengoAsaheli umfowabo kaJowabi, loElihanani indodana kaDodo waseBetlehema,

27loShamothi waseHarodi, loHelezi wasePeloni,

28loIra indodana kaIkeshi waseTekowa, loAbiyezeri waseAnathothi,

29loSibekayi waseHushathi, loIlayi waseAhohi,

30loMaharayi waseNetofa, loHeledi indodana kaBahana waseNetofa,

31loIthayi indodana kaRibayi waseGibeya lakoBenjamini, loBenaya wasePirathoni,

32loHurayi wasezifuleni zeGahashi, loAbiyeli waseBeti‐Araba,

33loAzimavethi waseBaharumi, loEliyaba waseShaliboni,

34loHashema waseGizoni, loJonathani indodana kaShage waseHarari,

35loAhiyamu indodana kaSakari waseHarari, loElifali indodana kaUri,

36loHeferi waseMekera, loAhija wasePeloni,

37loHeziro waseKarmeli, loNaharayi indodana kaEzibayi,

38loJoweli umfowabo kaNathani, loMibhari indodana kaHagiri,

39loZeleki waseAmoni, loNaharayi waseBerothi, umphathi wezikhali zikaJowabi indodana kaZeruya,

40loIra waseIthiri, loGarebi waseIthiri,

41loUyria umHethi, loZabadani indodana kaAhilayi,

42loAdina indodana kaShiza wakoRubeni, — wayeyisikhulu kwabakoRubeni engumphathi wabangamatshumi amathathu, —

43loHanani indodana kaMahaka, loJoshafati waseMithini,

44loUziya waseAshiterothi, loShama loJehiyeli amadodana kaHothamu waseAroweri,

45loJediyayeli indodana kaShimri, loJoha umfowabo waseTizi,

46loEliyeli waseMahavi, loJeribayi loJoshaviya amadodana kaElinahamu, loIthima waseMowabi,

47loEliyeli loObedi, loJahasiyeli waseZoba.