Hos 5 - Ndebele Bible (iBhayibhili Elingcwele) 1978

INkosi izatshaya uIsrayeli ngenxa yobubi bakhe

1Zwanini lokhu, lina bapristi,

lilalele, lina Israyeli,

libeke indlebe, lani ndlu yenkosi.

Ngoba isigwebo simayelana lani,

ngoba belingumjibila eMizipa,

lembule elendlalwe eTabori.

2Bahlamukile, batshona ebubini,

ngakhoke ngizabatshaya bonke.

3Ngiyamazi uEfrayimi,

loIsrayeli kafihlakalanga kimi,

ngoba khathesi, wena Efrayimi, ufebile,

uIsrayeli ungcolisiwe.

4Izenzo zabo kazibavumeli ukubuyela kuNkulunkulu wabo.

Ngoba umoya wokuwula uphakathi kwabo,

kabayazi iNkosi.

5Ukuzigqaja kukaIsrayeli kuyafakaza phambi kwakhe;

uEfrayimi uzakukhubeka ngokona kwakhe,

loJuda akhubeke kanye laye.

6Bazahamba lezimvu zabo lenkomo zabo ukuyahlabela iNkosi,

kodwa kabayikuyifumana, ngoba isukile kibo.

7Bayikhohlisile iNkosi,

ngoba bazele abantwana bezizweni.

Khathesike ohlaselayo uzabachitha lamazwe abo.

8Khalisani uphondo eGibeya, lilukhalise eRama,

lihlabe umkhosi eBeti‐Aveni,

uthuthumele, wena Benjamini.

9UEfrayimi uzachitheka osukwini lokutshaywa;

phakathi kwezizwe zakoIsrayeli ngiyatshengisa okuliqiniso.

10Ababusi bakoJuda sebenjengabantu abasiphula izikhonkwane zemingcele;

ngizakwehlisela kibo ulaka lwami njengamanzi.

11UEfrayimi ungumcindezeli onyathela okufaneleyo,

ngoba ezimisele ukulandela okulize.

12Ngakhoke mina ngizakuba njengenondo koEfrayimi,

lanjengokubola koJuda.

13Kwathi lapho uEfrayimi ebona umkhuhlane wakhe,

loJuda ebona isilonda sakhe,

uEfrayimi wasesiya eAsiriya,

wathumela ilizwi enkosini enkulu.

Kodwa kayilamandla ukulelapha,

lokupholisa izilonda zenu.

14Ngizakuba njengesilwane koEfrayimi,

ngibe njengesilwane koJuda.

Mina, uqobo lwami, ngizakubadabudabula, besengihamba,

ngibathwale njengempango yami, kungabi khona ongamukayo.

15Ngizabuyela futhi endaweni yami,

baze bavume icala labo, bangidinge;

osizini lwabo bangidingisise.