Hubo 89 - Ndebele Bible (iBhayibhili Elingcwele) 1978

Izithembiso zikaNkulunkulu

1Ngizakuhlabela ngothando lwakho olungapheliyo, Nkosi,

kuze kube nininini;

ngomlomo wami ngizakwazisa ubuqotho bakho kuzo zonke izizukulwana.

2Ngoba uthando lwakho olungapheliyo lumi kuze kube nini lanini,

lobuqotho bakho buqinile njengamazulu.

3Wena uthe: Ngenzile isivumelwano laye engimkhethileyo,

ngifungile kuDavida inceku yami,

4ngathi: Ngizakuqinisa inzalo yakho kuze kube nininini,

ngimise isihlalo sakho sobukhosi ezizukulwaneni zonke.

5Izimangaliso zakho, Nkosi, zidunyiswa ngamazulu,

ubuqotho bakho emhlanganweni wabangcwele.

6Ngoba ngubani ongafaniswa lawe ezulwini, Nkosi, na?

Ngubani phakathi kwezidalwa zasezulwini ofana leNkosi,

7uNkulunkulu owesabekayo emhlanganweni wabangcwele,

omkhulu lowesabekayo kubo bonke abahlala laye na?

8Nkosi Nkulunkulu wamabandla, ngubani ongafaniswa lawe, Nkosi,

ngamandla langobuqotho bakho bonke na?

9Wena uyabusa ukukhukhumala kolwandle;

lapho amavinqo alo evuka uyawathulisa.

10Wamchoboza uRahabi waba yisidumbu,

wazichitha izitha zakho ngamandla akho.

11Amazulu ngawakho, lomhlaba ngowakho,

ilizwe lakho konke okukulo, konke wakwenza.

12Inyakatho leningizimu wakudala wena,

iTabori leHermoni kuyadumisa ibizo lakho ngentokozo.

13Ingalo yakho ilamandla, isandla sakho siqinile,

isandla sakho sokunene siphakeme.

14Ukulunga lokwahlulela kuyisisekelo sombuso wakho;

uthando olungapheliyo lobuqotho kuhamba phambi kwakho.

15Babusisiwe abakwaziyo ukuhlabela ngentokozo,

abahambayo, Nkosi, ekukhanyeni kobuso bakho,

16abathokozayo ebizweni lakho usuku lonke,

bekubonga ngokulunga kwakho.

17Ngoba wena uludumo lwabo lamandla abo;

ngomusa wakho sizakuba lokunqoba.

18Ngoba isihlangu sethu singeseNkosi,

inkosi yethu ingeyoNgcwele kaIsrayeli.

19Endulo wakhuluma ngombono kubo abathembekileyo bakho,

wathi: Ngibekile umqhele phezu kwakhe olamandla,

ngimphakamisile okhethiweyo phakathi kwabantu.

20Ngifumene uDavida inceku yami,

ngamgcoba ngamafutha angcwele;

21isandla sami sizakuba laye kokuphela,

lengalo yami izakumqinisa.

22Isitha kasiyikumjuma,

lomubi kayikumahlula.

23Ngizazichoboza izitha zakhe phambi kwakhe,

ngibadilizele phansi abamzondayo.

24Ubuqotho bami lothando lwami olungapheliyo kuzakuba laye,

lasebizweni lami uzakuba lokunqoba.

25Ngizaqhelisa umbuso wakhe ukuba

usukele olwandle uze ufike emfuleni iYufrathi.

26Uzakungibiza ngokuthi: Wena unguBaba

loNkulunkulu wami, idwala lami, lomkhululi wami.

27Ngizakumenza abe lizibulo,

abe mkhulu kulamakhosi wonke omhlaba.

28Uthando lwami olungapheliyo ngizalugcinela yena kuze kube nininini,

lesivumelwano sami sizakuqina kuye.

29Ngizakumisa inzalo yakhe kuze kube nininini,

lesihlalo sakhe sobukhosi sime kokuphela.

30Uba abantwana bakhe bewutshiya umlayo wami,

bangahambi ngokwezimiso zami,

31uba bezaphula izimiso zami,

bengayigcini imithetho yami,

32ngizakubatshayela iziphambeko zabo ngenduku,

lezono zabo ngemichilo.

33Kodwa kangiyikulususa kuye uthando lwami olungapheliyo,

ngingaphikisi ukuthembeka kwami.

34Kangiyikusaphula isivumelwano sami,

loba ngiguqule ilizwi eliphuma emlonyeni wami.

35Ngafunga kwaba kanye ngobungcwele bami,

kangiyikuqamba amanga kuDavida.

36Inzalo yakhe izakuma kuze kube nininini,

isihlalo sakhe sobukhosi sime njengelanga phambi kwami;

37sizakuma njengenyanga kuze kube nininini,

sizakuma siqine kusekhona izulu.

38Kodwa khathesi usumlahlile wamala,

wamthukuthelela ogcotshiweyo wakho.

39Usiphikile isivumelwano sakho lenceku yakho;

wawudumaza umqhele wakhe, wawuphosela phansi.

40Uyibhobozile yonke imithangala yakhe,

wazibhidliza inqaba zakhe.

41Bonke abadlulayo bayamphanga;

useyinhlekisa kwabakhelene laye.

42Uziphakamisile izandla zokunene zezitha zakhe,

wazithokozisa zonke izitha zakhe.

43Futhi ubuyisele emuva umhedla wakhe obukhali,

kawumvumelanga ukuma ekulweni.

44Intonga yobukhosi uyisusile esandleni sakhe,

wadilizela phansi isihlalo sakhe sobukhosi.

45Ufinyezile insuku zobutsha bakhe,

wamthela ihlazo.

46Koze kube nini, Nkosi, ucatsha na?

Koze kube nini ulaka lwakho luvutha njengomlilo na?

47Khumbula, Nkosi, ukuthi isikhathi sokuphila singakanani,

lokuthi wabadalela ize bonke abantu.

48Ngubani ongaphila kokuphela angaboni ukufa na?

Ngubani olamandla okukhulula umphefumulo wakhe endaweni yabafileyo na?

49Nkosi, lungaphi uthando lwakho olungapheliyo olwakuqala

owalufunga kuDavida ngobuqotho bakho na?

50Khumbula, Nkosi, ukuklolodelwa kwenceku yakho,

lokuthi ngithwele esifubeni sami inhlamba yabantu,

51engithukwa ngayo yizitha zakho, Nkosi,

eziklolodela ngayo izinyathelo zogcotshiweyo wakho.

52Kayibongwe iNkosi kuze kube nini lanini.

Ameni, Ameni.