Zaga 3 - Ndebele Bible (iBhayibhili Elingcwele) 1978

Ezinye izeluleko kumajaha

1Mntanami, ungakhohlwa ukufundisa kwami,

kodwa uyigcine imilayo yami enhliziyweni yakho;

2ngoba izakukulethela insuku ezinengi zokuphila,

leminyaka eminengi kanye lempumelelo.

3Umusa lokuthembeka kakungakutshiyi,

kodwa kubophele entanyeni yakho,

ukugwale enhliziyweni yakho.

4Ngalokho uzakuthandeka, uhlonitshwe,

phambi kukaNkulunkulu laphambi kwabantu.

5Themba eNkosini ngayo yonke inhliziyo yakho,

ungathembi kokwakho ukuqedisisa.

6Ivume endleleni zakho zonke,

uzaqondisa imikhondo yakho yonke.

7Ungacabangi ukuthi uhlakaniphile,

kodwa yesabe iNkosi, utshiye ububi.

8Lokho kuzakukunika impilo

kube njengomuthi wokukwelapha.

9Dumisa iNkosi ngemfuyo yakho,

langezithelo zakho zokuqala zonke;

10ng’khona iziphala zakho zizagcwala amabele,

lezikhamelo zakho ziphuphume iwayini.

11Mntanami, ungadeleli ukulaya kweNkosi,

ungathukutheli ngokukhuza kwayo;

12ngoba iNkosi iyamlaya emthandayo,

njengoyise elaya indodana yakhe ayithandayo.

13Ubusisiwe umuntu ofumana ukuhlakanipha,

lozuza ukuqedisisa;

14ngoba ukuhlakanipha kuyaveza okunengi kulesiliva,

lenzuzo enkulu kulegolide.

15Kuligugu elidlula amatshe amahle,

lakho konke ongakufisa kakulakulinganiswa lakho.

16Kukhona ukuphila okude esandleni sakho sokunene,

lenotho lodumo esandleni sakho sokhohlo.

17Indlela zakho ziyathokozisa,

lemikhondo yakho iyaphumelelisa.

18Kuyisihlahla esiletha ukuphila kwabakubambayo,

lalabo ababambelela kukho babusisiwe.

19INkosi yasekela umhlaba ngokuhlakanipha,

yamisa iphezulu ngokuqedisisa,

20kwagobhoza amanzi ngokwazi kwayo,

lamayezi anisa amazolo.

21Mntanami, gcina amandla lengqondo ehlakaniphileyo,

kakungaphunyuki phambi kwakho;

22kuzakuba yikuphila komphefumulo wakho,

lomgaxo omuhle entanyeni yakho.

23Ng’khona uzahamba uvikelekile,

lenyawo zakho zingakhubeki.

24Nxa uhlala phansi, kawuyikwesaba,

lapho ulala, uzakuba lobuthongo obumnandi.

25Ungethuki nxa ukuchitheka kukujuma,

njengesiphepha sifikela ababi;

26ngoba iNkosi izakuba lithemba lakho,

igcine unyawo lwakho ukuba lungabanjwa ngumjibila.

27Ungali ukusiza abantu abakucelayo,

nxa ulamandla ukukwenza.

28Ungatsho kumakhelwana wakho ukuthi:

Buya kusasa, ngizakukunika khona;

lapho ulakho.

29Ungacebi okubi ngomakhelwana wakho ohlala lawe engesabi lutho.

30Ungaphikisani lomuntu kungelasizatho,

ongakonanga ngalutho.

31Ungamhawukeli umuntu omubi,

ungalandeli leyodwa yezindlela zakhe;

32ngoba umuntu ongaqondanga uyazondwa yiNkosi,

kodwa abaqotho iyabathemba,

33Isiqalekiso seNkosi sisendlini yababi,

kodwa iyawubusisa umuzi wabalungileyo.

34Abeyisayo iyabeyisa,

kodwa abazithobileyo iyabapha umusa.

35Abahlakaniphileyo bazakuzuza udumo,

kodwa abayizithutha bazazuza ihlazo.