Hez 12 - Ndebele Bible (iBhayibhili Elingcwele) 1978

Umfanekiso wokuthunjwa

1Ilizwi leNkosi lafika kimi lathi:

2Ndoda, wena uhlala phakathi kwabantu abahlamukayo abalamehlo okubona, kodwa bengaboni, abalendlebe zokuzwa, kodwa bengezwa;Isa 6:9–10; Jer 5:21; Mark 8:18

3ngoba bangabantu abahlamukayo. Ngakhoke, wena ndoda, lungisa umthwalo womuntu othunjiweyo, usuke emini uhambe phambi kwabo njengomuntu othunjiweyo, usuke endaweni yakho uye kwenye indawo phakathi kwabo. Mhlawumbe bazakuqedisisa lanxa bengabantu abahlamukayo.

4Uzakhupha umthwalo wakho emini phambi kwabo, ube njengomthwalo womuntu othunjiweyo, usuke wena ntambama phambi kwabo, uhambe njengomuntu othunjiweyo.

5Ubhoboze umduli phambi kwabo, utshungubale kiwo.

6Nxa sekuhwalala uthathe umthwalo wakho, uwetshate ehlombe phambi kwabo, uwuthwale ugubuzele ubuso bakho ukuze ungaboni ilizwe. Ngikwenza ube yisixwayiso koIsrayeli.

7Ngasengisenza njengokutshelwa kwami. Ngawukhupha umthwalo wami emini, waba njengomthwalo wothunjiweyo. Kwathi kusihlwa ngabhoboza umduli ngezandla zami, ngatshungubala emnyameni, ngetshete umthwalo wami phambi kwabo.

8Kusasa ilizwi leNkosi lafika kimi lathi:

9Ndoda, kabatshongo kuwe yini abakoIsrayeli, abantu abahlamukayo, ukuthi: Wenzani na?

10Ubokuthi kibo: INkosi uNkulunkulu ithi: Lelilizwi lingesikhulu seJerusalema langabo bonke abakoIsrayeli abakilo.

11Ubatshele ukuba uyisixwayiso kibo; lokho okwenzileyo kuzakwenziwa kibo, bazakuthunjwa.

12Isikhulu sabo sizakwetshata umthwalo waso emnyameni, sitshungubale embotsheni sigubuzele ubuso baso, ukuze singaboni ilizwe.

13Kodwa ngizaphosa imbule lami phezu kwaso, ngisibambe ngalo, ngisise eBabiloni elizweni lamaKaladiya; kanti kasiyikulibona, loba sizafela khona.2 Kho 25:7; Jer 52:11

14Ngizabachithachithela emimoyeni yonke wonke amanxusa aso, labasizi baso lazo zonke izimpi zaso, ngibalandele ukubabulala.

15Bazakwazi ukuba ngiyiNkosi nxa sengibahlakazele ezizweni zonke, ngabachithachithela emazweni.

16Kodwa ngizatshiya abayingcosana baphephe empini lasendlaleni lasesifeni, ukuba bafakaze ngawo wonke amanyala abo phakathi kwezizwe abazahamba kuzo, ukuba zazi ukuba ngiyiNkosi.

17Ilizwi leNkosi lafika kimi futhi lathi:

18Ndoda, dlana ukudla kwakho ngokuthuthumela, unathe amanzi ngokuqhaqhazela lokwesaba,

19uthi ebantwini belizwe: INkosi uNkulunkulu ithi ngabakhileyo eJerusalema abasekhona elizweni lakoIsrayeli: Bazakudla ukudla kwabo besesaba, banathe amanzi beqhaqhazela, ngoba ilizwe labo lizaphundlwa konke elilakho ngenxa yesihluku salabo abahlala kilo.

20Imizi okuhlalwa kiyo izachithwa, lelizwe libe yinkangala; lizakwazi ukuba ngiyiNkosi.

21Ilizwi leNkosi lafika kimi lathi:

22Ndoda, sithini lesisaga esitshiwoyo ngelizwe lakoIsrayeli esokuthi: Insuku ziyadlula, lemibono yonke ilize?

23Batshele uthi: INkosi uNkulunkulu ithi: Ngizasiqeda lesisaga, kabasayikusisebenzisa koIsrayeli. Uthi kibo: Insuku zisondele, kanye lokugcwaliseka kwemibono yonke.

24Ngoba kakusayikuba khona umbono wamanga, lokuvumisa okukhohlisayo koIsrayeli.

25Kodwa mina Nkosi ngizakukhuluma engikuthandayo; engikutshoyo yikho okuzakwenzeka, kungaphuzi lokho engikukhulumayo; ngizakukwenza ensukwini zenu, lina bantu abahlamukayo, kutsho iNkosi uNkulunkulu.

26Laselifika ilizwi leNkosi lisithi:

27Ndoda, khangela, abakoIsrayeli bathi: Umbono awubonayo ungowensuku ezikhatshana, lalokho akutshumayelayo kungokwesikhathi esikhatshana.

28Ngakho wothi kibo: INkosi uNkulunkulu ithi: Kakusayikuphuza lelilodwa emazwini ami, kodwa ilizwi engilikhulumayo lizakwenzeka, kutsho iNkosi uNkulunkulu.