Isa 35 - Ndebele Bible (iBhayibhili Elingcwele) 1978

Ukubuyiselwa kwabantu beNkosi

1Kuzakujabula inkangala logwadule,

inkangala ithokoze, ikhahlele njengamaluba,

2ikhahlele kakhulu, ithokoze ihlabele.

Izanikwa ubuhle obuseLebanoni,

lodumo oluseKarmeli laseSharoni.

Konke kuzabona inkazimulo yeNkosi

lobukhosi bukaNkulunkulu wethu.

3Qinisani izandla ezibuthakathaka lamadolo axegayo.

4Tshonini kwabalenhliziyo ezesabayo lithi:

Qinani, lingesabi.

Khangelani, uNkulunkulu wenu uyeza ngokuphindisela,

nguye ozakulikhulula.

5Ng’khona amehlo eziphofu azakuvuleka,

lendlebe zezacuthe zivuleke;

6abaqhulayo besebeseqa njengempala,

lolimi lwezimungulu lumemeze ngokuthokoza.

Ngoba amanzi azagobhoza enkangala,

lemifula egeleze endaweni elugwadule;

7itshebetshebe elitshisayo libe lichibi,

lomhlabathi owomileyo ugobhoze amanzi.

Lapho kwakuhlala khona amakhanka kuzakuba lidlelo lemihlambi,

lotshani bube yimihlanga lebhuma.

8Kuzakuba khona umgwaqo ozakuthiwa yiNdlela eNgcwele;

abangcolileyo kabayikuhamba ngayo,

lezithutha kaziyikulahleka kiyo.

9Kakuyikuba khona lapho isilwane,

lezilo kaziyikuzula kiyo, loba lesisodwa nje.

Kodwa abakhululwe yiNkosi bazahamba ngayo,

10abahlengiweyo beNkosi bazakubuyela ekhaya;

bazafika eZiyone behlabela

begcwele ukuthokoza okungapheliyo;

bazazuza ukuthokoza lokujabula,

usizi lokububula kuzakuphela.