Dan 10 - Ndebele Bible (iBhayibhili Elingcwele) 1978

Umbono kaDaniyeli ngasemfuleni iTigrisi

1Ngomnyaka wesithathu kaKurosi inkosi yasePerisiya ilizwi lembulelwa uDaniyeli, owayethiwa nguBeliteshazari. Lelolizwi laliqinisile, kodwa kwakulukhuni ukuliqedisisa. Waliqedisisa ngombono.

2Ngalezonsuku, mina Daniyeli ngangilila okwamaviki amathathu.

3Kangidlanga okumnandi lenyama, kanginathanga lewayini, futhi kangigcobanga okwamaviki amathathu agcweleyo.

4Ngosuku lwamatshumi amabili lane ngenyanga yokuqala, lapho ngangimi okhunjini lomfula omkhulu othiwa iTigrisi,

5ngaphakamisa amehlo ami, ngabona umuntu egqoke ilembu elihle, ebophe ngebhanti legolide laseOfiri okhalweni lwakhe.Isam 1:13–15; 2:18; 19:12

6Umzimba wakhe wawunjengelitshe elithiwa yiberila, lobuso bakhe bunjengokuphazima kombane, lamehlo akhe enjengezibane ezivuthayo, ingalo lemibala yakhe kunjengokukhazimula kwethusi elikhazimulayo, lokuzwakala kwelizwi lakhe kunjengomsindo wexuku.

7Yimi ngedwa engabona lowombono, ngoba abantu ababelami kabawubonanga, kodwa behlelwa yikuthuthumela okukhulu, babaleka ukuba bacatshe.

8Ngakhoke ngasengisala ngedwa, ngawubona lumbono omkhulu, ngaphelelwa ngamandla, ubuso bami baguquka kubi.

9Ngasengisizwa ilizwi lakhe; lapho ngilizwa, ngathi mbo ngobuso phansi, ngaqaleka.

10Ngasengibanjwa yisandla, sangimisa ngezandla zami langamadolo ngilokhu ngithuthumela.

11Wathi kimi: Daniyeli, wena muntu othandekayo kakhulu, zwana lamazwi engiwakhuluma kuwe; sukuma ume, ngoba sengithunywe kuwe. Kwathi ekhuluma lelilizwi kimi, ngasukuma ngithuthumela.

12Wasesithi kimi: Ungesabi, Daniyeli, ngoba kusukela osukwini lokuqala owazama ngalo ukusebenzisa ingqondo yakho ukuba uqedisise, wazithoba phambi kukaNkulunkulu wakho, amazwi akho ezwakele, ngizile ngenxa yamazwi akho.

13Umbusi wesizwe samaPerisiya wamelana lami insuku ezingamatshumi amabili lanye; kodwa uMikayeli omunye wababusi abakhulu weza ukungisiza; ngoba ngangitshiywe ngedwa embusweni sePerisiya,Isam 12:7

14ngizile ukuba ngikwenze uqedisise okuzakwehlela abantu bakini ensukwini zokucina. Lo ngumbono ngensuku ezizayo.

15Esekhulumile kimi lawomazwi, ngakhangelisa ubuso bami phansi, ngaba yisimungulu.

16Kwathi okunye okufanana lomuntu kwathinta umlomo wami; ngavula umlomo wami, ngakhuluma. Ngathi kulowo omi phambi kwami: Nkosi yami, ngenxa yombono ngifikelwe yibuhlungu, kangiselawo amandla.

17Minake, inceku yenkosi yami, ngingakhuluma ngithini enkosini yami na? Ngoba kangiselawo amandla, sengisehluleka lokuphefumula.

18Wasengithinta futhi lowo olesimo somuntu, wangiqinisa.

19Wasesithi: Wena muntu othandekayo kakhulu, ungesabi; ukuthula kakube kuwe, qina ume isibindi. Kwathi lapho ekhuluma lami ngaqina, ngasengisithi: Kayikhulume inkosi yami, ngoba isingiqinisile.

20Wasesithi: Uyazi ukuthi ngizeleni kuwe na? Kodwa khathesi ngizabuyela ukulwa lombusi wasePerisiya; kuthi lapho sengimahlule, kufike umbusi wamaGriki.

21Kodwa ngizakukutshela okubhaliweyo encwadini yeqiniso; kakho loyedwa ongisizayo ukulwa lalaba ngaphandle kukaMikayeli umbusi wenu.