Eks 7 - Ndebele Bible (iBhayibhili Elingcwele) 1978

1INkosi yathi kuMose: Ngikwenze waba njengonkulunkulu kuFaro; uAroni umfowenu uzakuba ngumkhulumeli wakho.

2Khuluma konke engikulaya khona; uAroni umfowenu uzakhuluma loFaro ukuba avumele abakoIsrayeli ukuba baphume elizweni lakhe.

3Mina ngizakuyenza inhliziyo kaFaro ibe lukhuni, ngandise izibonakaliso lezimangaliso zami elizweni laseGibithe.Seb 7:36

4Kodwa uFaro kayikukulalela; ngakho ngizakwelula isandla sami phezu kweGibithe, ngikhuphe eGibithe izimpi zami, abantu bami abakoIsrayeli, ngezenzo ezinkulu.

5AmaGibithe azakwazi ukuthi ngiyiNkosi, mhla ngelula isandla sami phezu kweGibithe, ngikhuphe abakoIsrayeli phakathi kwawo.

6UMose loAroni benza njengokutsho kweNkosi.

7UMose wayeleminyaka engamatshumi aficaminwembili, uAroni wayeleminyaka engamatshumi aficaminwembili lantathu mhla bekhuluma loFaro.

Isimangaliso esenziwa ngentonga kaAroni

8INkosi yakhuluma kuboMose loAroni,

9yathi: Nxa uFaro ekhuluma lani esithi: Zifakazeleni lina ngokwenza isimangaliso; uzakutsho kuAroni uthi: Thatha intonga yakho, uyiphosele phansi phambi kukaFaro ukuze ibe yinyoka.

10UMose loAroni baya kuFaro, benza njengokulaya kweNkosi; uAroni waphosela phansi intonga yakhe phambi kukaFaro laphambi kwenceku zakhe, yaphenduka yaba yinyoka.

11UFaro wasebiza izazi lezangoma, abalumbi baseGibithe, labo benza njalo ngamalumbo abo.

12Bonke baphosela phansi intonga zabo, zaba zinyoka; kodwa intonga kaAroni yaginya izintonga zabo.

13Kodwa inhliziyo kaFaro yajinga iba lukhuni, kazabalalela, njengokutsho kweNkosi.

Inhlupheko yokuqala: Amanzi aphenduka aba ligazi

14INkosi yathi kuMose: Inhliziyo kaFaro ilukhuni, uyala ukuvumela abantu ukuba bahambe.

15Uboya kuFaro ekuseni; lapho ephuma ukuya emanzini, ume ngasokhunjini lomfula ukuba umhlangabeze, uphethe esandleni sakho intonga eyaphenduka yaba yinyoka.

16Uzakuthi kuye: INkosi uNkulunkulu wamaHeberu ingithume kuwe ithi: Vumela abantu bami ukuba bahambe, baye enkangala ukungikhonza; kodwa kuze kube khathesi kawulalelanga.

17INkosi ithi: Ngalokhu uzakwazi ukuthi ngiyiNkosi; ngizatshaya amanzi omfula ngentonga esesandleni sami, aphenduke abe ligazi.Isam 16:4

18Inhlanzi ezisemfuleni zizakufa, lomfula unuke; amaGibithe azakwenyanya ukunatha amanzi asemfuleni.

19INkosi yathi kuMose: Tshono kuAroni uthi: Thatha intonga yakho, welule isandla sakho phezu kwamanzi aseGibithe, phezu kwemifula lezifula lamachibi leziziba zonke ukuba kuphenduke kube ligazi. Kuzakuba khona igazi kulo lonke ilizwe laseGibithe, emiganwini yesihlahla lasezitsheni zamatshe.

20UMose loAroni benza njengokutsho kweNkosi; waphakamisa intonga, watshaya amanzi asemfuleni phambi kukaFaro laphambi kwenceku zakhe; wonke amanzi asemfuleni aphenduka aba ligazi.

21Inhlanzi ezisemfuleni zafa; umfula wanuka, amaGibithe ahluleka ukuwanatha amanzi asemfuleni; kwakukhona igazi elizweni lonke laseGibithe.

22Lezangoma zaseGibithe zenza njalo ngamalumbo azo; inhliziyo kaFaro yajinga iba lukhuni, kazabalalela, njengokutsho kweNkosi.

23UFaro wasesuka esiyangena endlini yakhe engakunanzi lokho enhliziyweni yakhe.

24AmaGibithe wonke emba inxa zonke zomfula ukuba athole amanzi okunatha, ngoba amanzi asemfuleni ayengasanatheki.

25Kwedlula insuku eziyisikhombisa kusukela ekutshayweni komfula yiNkosi.