1 Sam 12 - Ndebele Bible (iBhayibhili Elingcwele) 1978

USamuweli ukhuluma labakoIsrayeli ngokuphila kwabo

1USamuweli wathi kuye wonke uIsrayeli: Khangelani, ngililalele kukho konke elikucelileyo kimi, ngalibekela inkosi.

2Nansike inkosi ezalikhokhela; mina sengiluphele, ngiyimpunga, nanka lamadodana ami akini; minake ngilikhokhele kusukela ebutsheni bami kuze kube lamuhla.

3Sengikhonake; fakazani ngami phambi kweNkosi uNkulunkulu logcotshiweyo wayo. Ngubani engimthathele inkabi yakhe, loba ubabhemi wakhe na? Ngikhohlise bani na? Ngicindezele bani na? Ngiwamukele kubani umvuzo wokuthengwa ukuze ngivale amehlo ami ngawo na? Ngitshelani, ngizakukubuyisela kini.

4Bathi kuye: Kawusikhohlisanga, kawusicindezelanga, njalo kawamukelanga lutho kithi.

5Wasesithi kibo: INkosi uNkulunkulu ingufakazi ngani kanye logcotshiweyo wayo ungufakazi lamuhla wokuthi kalifumananga lutho esandleni sami. Bathi: Ingufazaki.

6USamuweli wathi ebantwini: Yebo, iNkosi ingufakazi, yona eyalinika uMose loAroni, yakhupha okhokho benu elizweni laseGibithe.Eks 6:26

7Sukumanike, khona lapha phambi kwayo ngizaphendulana lani, ngilandise ngezenzo zonke ezinkulu zeNkosi eyazenza kini lakubokhokho benu.

8Lapho uJakobe lamadodana akhe sebefikile eGibithe, abaseGibithe babahlupha; okhokho benu bakhala eNkosini; yona yabathumela uMose loAroni ababakhupha eGibithe, babahlalisa kulindawo.Eks 2:23

9Kodwa bayikhohlwa iNkosi uNkulunkulu wabo; yabanikela kuSisera induna yempi kaJabini, inkosi yaseHazori, lakumaFilistiya, lakuyo inkosi yaseMowabi; labo balwa labo.Hlu 4:2; 13:1; 3:12

10Bakhala eNkosini bathi: Sonile ngoba siyilahlile iNkosi, sakhonza izithombe zikaBali lezikaAshitorethi. Kodwa khathesi sophule ezitheni zethu, sizakukukhonza.Hlu 10:10–15

11INkosi yasithuma uJerubali, loBaraki, loJefta, loSamuweli ukulikhulula ezitheni zenu inxa zonke; lavikeleka.Hlu 7:1; 4:6; 11:29; 1 Sam 3:20

12Lapho libona ukuthi uNahashi inkosi yaseAmoni uyalihlasela, lathi kimi: Atshi bo, sifuna inkosi ezasibusa; kanti iNkosi uNkulunkulu wenu yiyo inkosi yenu.1 Sam 8:19

13Nansoke inkosi eliyicelileyo; liyikhethile, leNkosi uNkulunkulu yalibekela yona.

14Uba liyesaba iNkosi uNkulunkulu liyikhonza, lilalela ilizwi layo, lingayihlamuki imilayo yayo, uba lina lenkosi elibusayo lilandela iNkosi uNkulunkulu wenu, kuzalilungela.

15Kodwa uba lingalilaleli ilizwi layo, lihlamuka imilayo yayo, isandla sayo sizamelana lani lenkosi yenu.

16Ngakhoke manini, libone linto enkulu iNkosi uNkulunkulu ezayenza phambi kwenu.

17Angithi sekuyisikhathi sokuvuna amabele na? Ngizakhuleka eNkosini ukuba ithumele ukuduma lezulu, ukuze lizone, lazi ukuthi kubi kangakanani emehlweni ayo ukuzicelela kwenu inkosi.

18USamuweli wasekhuleka eNkosini, yathumela ukuduma lezulu mhlalokho, bonke abantu bayesaba kakhulu iNkosi loSamuweli.

19Bonke abantu bathi kuSamuweli: Khulekela inceku zakho eNkosini uNkulunkulu wakho, ukuba singafi; ngoba sengezelele ezonweni zethu zonke lobububi bokuzicelela inkosi.

20USamuweli wasesithi ebantwini: Lingesabi; loba lenzile bonke lobububi, lingaphambuki ekuyilandeleni iNkosi uNkulunkulu, kodwa liyikhonze ngenhliziyo yenu yonke.

21Lingaphambuki ukuba lilandele izinto eziyize ezingabuyiseli lutho lezingasizi lutho, ngoba ziyize.

22Ngoba iNkosi kayikubalahla abantu bayo ngenxa yebizo layo elikhulu, ngoba kwaba kuhle kuyo ukuzenzela lina libe ngabantu bayo.

23Minake kakube khatshana lami ukuba ngone eNkosini ngokuyekela ukulikhulekela; ngizalifundisa indlela enhle lelungileyo.

24Yesabani iNkosi kuphela, liyikhonze ngeqiniso langenhliziyo yenu yonke. Khangelani okukhulu elenzele khona.

25Kodwa uba lisenza okubi, lizachitheka lina kanye lenkosi yenu.