2 Sam 12 - Ndebele Bible (iBhayibhili Elingcwele) 1978

UNathani umkhuza uDavida

1INkosi yasithuma uNathani umprofethi kuDavida. Wafika wathi kuye: Kwakukhona amadoda amabili emzini othile, enye yayinothile, enye yayingumyanga.

2Enothileyo yayilezimvu lenkomo ezinengi kakhulu.

3Kodwa engumyanga yayingelalutho, yeyilemvana ensikazi kuphela eyayiyithengile. Yayondla, yakhulela kuyo lebantwaneni bayo. Yadla ukudla kwayo, yanathela enkezweni yayo; yalala esifubeni sayo, yayinjengendodakazi kiyo.

4Kwafikela isihambi endodeni enothileyo, kayifunanga ukuthatha ezimvini zayo lenkomeni zayo ukuhlabela isihambi esasifikele kiyo, kodwa yathatha imvana yendoda engumyanga, yayihlabela umuntu owayefikele kiyo.

5UDavida wathukuthela kakhulu ngalowomuntu, wathi kuNathani: Ngifunga iNkosi, umuntu owenze lokho, ufanele ukufa.

6Uzayibuyisela imvana iphindwe kane, ngoba enze lokho engabanga lesihawu.

7UNathani wasesithi kuDavida: Nguwe lowomuntu. INkosi, uNkulunkulu kaIsrayeli, ithi: Ngakugcoba waba yinkosi koIsrayeli, ngakukhulula esandleni sikaSawuli.

8Nganikela umbuso wenkosi yakho labafazi bayo ezandleni zakho, ngakunika lendlu kaIsrayeli lekaJuda; uba lokho bekukuncinyane, bengingakwengezelela ngokungangalokho futhi.

9Udeleleni ilizwi leNkosi ukuba wenze okubi emehlweni ayo na? Ubulele uUriya umHethi ngomkhonto, umbulele ngomkhonto wamaAmoni, wathatha umkakhe waba ngowakho.

10Ngakhoke umkhonto kawuyikusuka endlini yakho, ngoba ungidelele, wathatha umkaUriya umHethi ukuba abe ngumkakho.

11INkosi uNkulunkulu ithi: Ngizakukuvusela okubi okuvela endlini yakho; ngithathe omkakho phambi kwakho, ngibanike umakhelwane wakho, alale labo obala.2 Sam 16:22

12Ngoba wena wakwenza ensitha; kodwa mina ngizakwenza lokhu phambi kukaIsrayeli wonke obala.

13UDavida wasesithi kuNathani: Ngonile eNkosini. UNathani wathi kuDavida: LeNkosi isusile isono sakho; kawuyikufa.

14Kodwake ngoba ngalesisenzo uyidelele iNkosi, umntwana ozamzalelwa uzakufa.

15UNathani wasebuyela endlini yakhe. INkosi uNkulunkulu yamtshaya ngesifo umntwana owazalwa nguDavida kumkaUriya, wagula.

16UDavida wamkhulekela kuNkulunkulu umntwana; wazila ukudla, wangena walala phansi ubusuku bonke.

17Abadala bendlu yakhe bazama ukumvusa phansi; kodwa wala, futhi kavumanga ukudla labo.

18Kwathi ngosuku lwesikhombisa umntwana wafa. Inceku zikaDavida zesaba ukumtshela ukuba umntwana usefile; ngoba zathi: Umntwana esaphila sakhuluma laye, kasilalelanga; pho, singamtshela kanjani ukuthi umntwana usefile na? Mhlawumbe angazenza okubi.

19Kodwa lapho uDavida ebona ukuba inceku zakhe ziyanyenyezelana, wabona ukuba umntwana usefile; wathi encekwini zakhe: Umntwana usefile na? Zathi: Usefile.

20UDavida wasevuka phansi, wageza, wazigcoba, wagqoka ezinye izigqoko; wangena endlini yeNkosi wakhuleka; wasesiya endlini yakhe, wacela ukuba bamlethele ukudla; sekulethiwe, wadla.

21Inceku zakhe zasezisithi: Kuyini lokhu okwenzileyo na? Uzile ukudla, wamkhalela umntwana esaphila; kodwa lapho esefile, uvukile wadla.

22Yena wathi: Umntwana esaphila, ngizile ukudla, ngakhala, ngoba ngithe: Ngubani owaziyo ukuthi mhlawumbe iNkosi izakuba lomusa kimi ukuba umntwana aphile na?

23Kodwa khathesi usefile; ngizazilelani na? Ngingambuyisa na? Mina ngizakuya kuye, kodwa yena kayikubuya kimi.

24UDavida wamduduza uBathisheba umkakhe, waya kuye walala laye; wazala indodana, wayitha ibizo wathi nguSolomoni. INkosi uNkulunkulu yamthanda umfana,

25yathuma ilizwi ngoNathani umprofethi, yathi ngenxa yothando lwayo kabizwe ngokuthi nguJedidiya.

UDavida unqoba iRaba

26UJowabi wahlasela iRaba umuzi waseAmoni, wathatha isigaba esilechibi.1 Lan 20:1–3

27Wathuma izithunywa kuDavida wathi: Ngihlasele iRaba, ngathatha ichibi.

28Ngakhoke buthanisa abantu abaseleyo, uwuvimbezele umuzi, uwuthathe, funa ngiwuthathe mina, ubusubizwa ngebizo lami.

29UDavida wasebuthanisa bonke abantu, waya eRaba, walihlasela, walithatha.

30Wathatha umqhele kankulunkulu wabo uMilkomu owawenziwe ngegolide elinzima kakhulu, owawulelitshe eliligugu wawubeka kwelakhe ikhanda. Wathatha emzini lowo impango enengi kakhulu.

31Wathatha labantu ababephakathi kwawo, wabasebenzisa ngamasaha, langamapiki, langamahloka ensimbi, basebenza emahondweni ezitina; wenza njalo kuyo yonke imizi yamaAmoni. UDavida labo bonke abantu babuyela eJerusalema.