2 Kho 19 - Ndebele Bible (iBhayibhili Elingcwele) 1978

Ukukhululwa kwelizwe lakoJuda

1Kwathi lapho inkosi uHezekiya isizwile, yadabula izigqoko zayo, yagqoka isambatho sokulila, yangena ethempelini.Isa 37:1–38

2Yamthuma uEliyakimi owayengumgcini wesigodlo, loShebina umabhalane, labapristi abadala, begqoke izambatho zokulila ukuya kumprofethi uIsaya indodana kaAmozi.

3Bathi kuye: UHezekiya uthi: Lolu lusuku lokuhlupheka lolokusolwa lolwehlazo; sinjengowesifazana osezabeletha, kodwa ongaselamandla okubeletha.

4Mhlawumbe iNkosi uNkulunkulu wakho iwezwile wonke amazwi enceku enkulu ethunywe yinkosi yayo yaseAsiriya, ukuba iklolodele uNkulunkulu ophilayo, lokuthi izakukukhuza yona iNkosi uNkulunkulu wakho lokhu ekuzwileyo. Ngakhoke akukhulekele ingcosana eseleyo.

5Kwathi inceku zenkosi uHezekiya sezifikile kuIsaya,

6yena wathi kuzo: Liyitshele inkosi yenu ilizwi leNkosi uNkulunkulu lisithi: Ungesabi ngenxa yamazwi owezwileyo inceku zenkosi yaseAsiriya ezingithuke ngawo.

7Ngizafaka enkosini yaseAsiriya umoya ukuba izwe amahungahunga, ibisibuyela elizweni layo, ngizayenza ukuba ibulawe ngomkhonto elizweni layo.

8Inceku enkulu yabuyela, yafumanisa inkosi yaseAsiriya isihlasela iLibina; yayisizwile ukuthi inkosi isisukile eLakishi.

9Kwathi lapho inkosi isizwile ukuthi uTirihaka inkosi yaseEtiyopiya wayesiza ukuyihlasela, yathumela izithunywa kuHezekiya inkosi yakoJuda, yathi kuye:

10Ungavumeli uNkulunkulu wakho othembele kuye ukuba akukhohlise ngokukuthembisa ukuthi iJerusalema kaliyikunikelwa esandleni senkosi yaseAsiriya.

11Usuzwile ukuthi amakhosi aseAsiriya enzeni kuwo wonke amazwe, lokuthi awachithile wonke, aphela nya. Wenake uzakhululwa na?

12Onkulunkulu bezizwe okhokho bami abazichithayo bazikhulula yini, iGozani leHarani leRezefi, labantu baseBeti‐Edeni abahlala eTelasari na?

13Angaphi amakhosi aseHamathi leArpadi leSefavayimi leHena leIva na?

14UHezekiya wayamukela incwadi ezandleni zezithunywa, wayibala, wasuka waya ethempelini, wayichaya phambi kweNkosi.

15UHezekiya wakhuleka esithi: Nkosi, Nkulunkulu kaIsrayeli, wena ohlala ngaphezu kwamakherubi, nguwe wedwa onguNkulunkulu wayo yonke imibuso yomhlaba, wenzile izulu lomhlaba.Eks 25:22

16Akubeke indlebe yakho, Nkosi, uzwe, ukhangele, ubone; akuzwe amazwi kaSenakeribi awathumileyo ukuklolodela uNkulunkulu ophilayo.

17Isibili, Nkosi, amakhosi aseAsiriya azichithile izizwe lamazwe azo,

18aphosela onkulunkulu bazo emlilweni; ngoba babengesibo onkulunkulu, kodwa babengumsebenzi wezandla zabantu, beyizigodo lamatshe; ngalokhoke babhujiswa.

19Ngakhoke, Nkosi Nkulunkulu wethu, sikhulule esandleni sakhe, ngiyakuncenga, ukuze yonke imibuso yomhlaba yazi ukuba wena Nkosi nguwe wedwa onguNkulunkulu.

20UIsaya indodana kaAmozi wasethumela ilizwi kuHezekiya esithi: INkosi, uNkulunkulu wakoIsrayeli, ithi: Ngiwuzwile umkhuleko wakho omayelana loSenakeribi inkosi yaseAsiriya.

21Nanti ilizwi leNkosi elikhulume ngaye:

IZiyone liyakudelela, liyakuklolodela,

iJerusalema linikina ikhanda lalo ngemva kwakho.

22Ngubani omklolodelayo wamthuka na?

Uphakamisele bani ilizwi lakho na?

Ukhangele bani ngokuzikhukhumeza na?

NgoNgcwele kaIsrayeli.

23Uklolodele iNkosi ngezithunywa zakho,

wathi: Lezinqola zami ezinengi ngikhwele ingqonga zezintaba,

ngaze ngafika ezindaweni ezikhatshana zaseLebanoni.

Ngagamula imikusu yalo emide kakhulu,

lamaphane alo amahle kakhulu.

Ngangena endaweni zalo zokucina,

lasemaguswini alo amnyama.

24Ngemba imithombo, nganatha amanzi asezizweni,

nganyathela ngenyawo zami,

ngomisa yonke imifula yaseGibithe.

25Kawuzwanga yini ukuthi lokhu ngakumisa endulo na?

Ngakumisa ensukwini zasendulo lokho esengikwenza lamhla,

ukuba udilize imizi ebiyelweyo ibe ngamanxiwa.

26Abahlala kiyo sebephelelwe ngamandla,

sebedanile balenhloni,

bafana lezihlahlana egangeni lemibhida eluhlaza,

banjengotshani ezicholo zezindlu obutshazwa ngumoya wempumalanga.

27Ngiyakwazi ukusuka kwakho lokuhlala kwakho,

ngiyakwazi lokuhamba kwakho konke.

28Ngoba ungithukuthelele,

lokuziqakisa kwakho kufikile endlebeni zami,

ngizakufaka umkhala emakhaleni akho,

lamatomu emlonyeni wakho,

ngikubuyisele ngendlela oweza ngayo.

29Lokhu yisibonakaliso kini; lonyaka lizakudla okuzikhulelayo, ngomnyaka wesibili lidle umkhukhuzela wakho, kuthi ngomnyaka wesithathu lihlanyele livune, lihlanyele izivini lidle izithelo zazo.

30Abaseleyo koJuda bazagxumeka impande phansi, bathele izithelo ngaphezulu;

31ngoba kuzakuphuma eJerusalema abayingcosana, lasentabeni yaseZiyone ixuku labaseleyo. Ukutshiseka kweNkosi kuzakwenza lokhu.

32Ngakhoke iNkosi ithi mayelana lenkosi yaseAsiriya:

Kayiyikungena kulumuzi, loba itshoke umtshoko khona,

ingabe ize kuwo ilesihlangu,

yakhe umduli wokuvimbezela kuwo.

33Ngendlela eyeza ngayo izabuyela ngayo futhi,

kayiyikungena emzini, kutsho iNkosi.

34Ngizawuvikela lumuzi ngiwusize,

ngenxa yami langenxa yenceku yami uDavida.

35Ngalobobusuku isithunywa seNkosi sasuka sayabulala izinkulungwane ezilikhulu lamatshumi aficaminwembili lanhlanu ezihonqweni zamaAsiriya. Kwathi abantu bevuka ekuseni kakhulu babona bonke laba sebeyizidumbu kuphela.

36USenakeribi inkosi yaseAsiriya wasesuka ebuyela ekhaya, wahlala eNineve.

37Kwathi lapho ekhonza endlini kaNisiroki unkulunkulu wakhe, uAdrameleki loSharezeri amadodana akhe bambulala ngomkhonto, babalekela elizweni laseArarati. UEsarihadoni indodana yakhe waba yinkosi esikhundleni sakhe.