2 Lan 13 - Ndebele Bible (iBhayibhili Elingcwele) 1978

Ukubusa kukaAbija

1Ngomnyaka wetshumi lesificaminwembili wokubusa kwenkosi uJerobowamu uAbija waba yinkosi koJuda.

2Wabusa iminyaka emithathu eJerusalema. Ibizo likanina lalinguMikaya indodakazi kaUriyeli waseGibeya. Kwakukhona ukulwa phakathi kukaAbija loJerobowamu.

3UAbija waphuma ukuya ekulweni elempi yamaqhawe ayizinkulungwane ezingamakhulu amane, amadoda akhethiweyo. UJerobowamu wahlangabezana laye ekulweni elamaqhawe akhethiweyo azinkulungwane ezingamakhulu aficaminwembili.

4UAbija wema entabeni yaseZemarayimi esezintabeni zakoEfrayimi wathi: Lalela wena Jerobowamu, lani lonke Israyeli!

5Kalikwazi yini ukuba iNkosi uNkulunkulu kaIsrayeli yawunika kokuphela umbuso wakoIsrayeli kuDavida lamadodana akhe ngesivumelwano esingelakuphela?

6Kanti uJerobowamu indodana kaNebati, inceku kaSolomoni indodana kaDavida, wavukela inkosi yakhe;

7labantu abathile ababi bamlandela, bamdelela uRehobowamu indodana kaSolomoni lapho esesengumfana engakabi lakwazi, engakabi lamandla okumelana labo.

8Khathesi licabanga ukumelana lombuso weNkosi uNkulunkulu ophethwe ngamadodana kaDavida ngoba libanengi kakhulu, lilamathole egolide uJerobowamu alenzela wona ukuba abe ngonkulunkulu.

9Kalibaxotshanga yini abapristi beNkosi uNkulunkulu, amadodana kaAroni, kanye lamaLevi, lazenzela abapristi benu njengabantu bamanye amazwe na? Lowo ofika elenkunzi ingabe inqama eziyisikhombisa ukuba ahlukaniselwe iNkosi wenziwa umpristi wokungesuye unkulunkulu.

10Kodwa thina, iNkosi inguNkulunkulu wethu, kasiyidelanga; silabo abapristi abayikhonzayo iNkosi abangamadodana kaAroni, besizwa ngamaLevi.

11Bayanikela eNkosini ekuseni lantambama insuku zonke iminikelo yokutshiswa lempepha elephunga elihle, balungise izinkwa ezahlukaniselwe iNkosi etafuleni legolide elihle, balondoloze uluthi lwesibane lwegolide ukuba izibane zalo zikhanye kusihlwa insuku zonke. Ngokwenza njalo siyawulalela thina umlayo weNkosi uNkulunkulu wethu, kodwa lina liyidelile.

12UNkulunkulu ulathi, ungumholi wethu, labapristi bakhe bakhona ukukhalisa impondo ukusibizela ekulweni lani. Madoda akoIsrayeli, musani ukulwa leNkosi, uNkulunkulu wabokhokho benu, ngoba lingeke liphumelele.

13UJerobowamu wayethumele elinye lamabutho akhe ukubhoda ngemuva liyecathama khona, ukuze inengi lamabutho akhe likhangelane labakoJuda, elicathemeyo libe ngemuva.

14Lapho abakoJuda bephenduka bafumanisa ukuba bahlaselwa ngaphambili langemuva; bakhala eNkosini uNkulunkulu, labapristi bakhalisa impondo,

15labantu bakoJuda bamemeza isiga sempi; kwathi ekumemezeni kwabo uNkulunkulu wamchitha uJerobowamu labo bonke abakoIsrayeli phambi kukaAbija laphambi kwabakoJuda.

16AbakoIsrayeli babaleka phambi kwabakoJuda, uNkulunkulu wabanikela ezandleni zabo.

17UAbija labantu bakhe babulala abanengi babo, kwafa kwabakoIsrayeli amadoda akhethiweyo azinkulungwane ezingamakhulu amahlanu.

18Ngokunjalo abakoIsrayeli behlulwa ngalesosikhathi, abakoJuda baphumelela ngoba bathembela eNkosini, uNkulunkulu wabokhokho babo.

19UAbija waxotshana loJerobowamu, wayithumba limizi kuye, iBetheli lemizana yalo, leJeshana lemizana yalo, leEfroni lemizana yalo.

20UJerobowamu kabange esaba lamandla ensukwini zikaAbija. INkosi uNkulunkulu yamtshaya, wafa.

21Kodwa uAbija waqina waba lamandla, wathatha abafazi abalitshumi lane, wayelamadodana angamatshumi amabili lambili, lamadodakazi alitshumi lesithupha.

22Ezinye indaba zikaAbija, ukuhamba lokwenza kwakhe, kulotshiwe ezindabeni zomprofethi uIdo.