2 Lan 18 - Ndebele Bible (iBhayibhili Elingcwele) 1978

UMikaya ukhuluma ngokunqotshwa kukaAhabi loJehoshafati

1UJehoshafati wayenothile kakhulu elodumo; wenza isivumelwano loAhabi ngokwendiselana laye.

2Ngemva kweminyaka waya kuAhabi eSamariya. UAhabi wamhlabela yena lababelaye izimvu lenkabi ezinengi, wamncenga ukuba bayehlasela iRamothi‐Gileyadi.1 Kho 22:1–35

3UAhabi inkosi yakoIsrayeli wasesithi kuJehoshafati inkosi yakoJuda: Uzaphuma lami ukuyakulwa eRamothi‐Gileyadi na? UJehoshafati wathi: Okwami ngokwakho, lami uqobo labantu bami. Sizakuba lawe empini.

4UJehoshafati wasesithi enkosini yakoIsrayeli: Akubuze eNkosini uNkulunkulu kuqala.

5Inkosi yakoIsrayeli yasibuthanisa abaprofethi baba ngamakhulu amane, yathi kubo: Ngiyehlasela iRamothi‐Gileyadi kumbe ngingayi na? Bona bathi: Hamba, ngoba iNkosi uNkulunkulu izalinikela esandleni sakho.

6UJehoshafati wasesithi: Kakukho yini lapha omunye umprofethi weNkosi uNkulunkulu esingambuza na?

7Inkosi yakoIsrayeli yathi kuye: Kusekhona omunye umuntu esingabuza ngaye eNkosini, nguMikaya indodana kaImla, kodwa kangimthandi ngoba kazake akhuluma okuhle ngami, kodwa uhlala ekhuluma okubi; uJehoshafati wathi: Nkosi, ungatsho njalo.

8Inkosi yakoIsrayeli yasibiza umthenwa yathi kuye: Ngilandela masinyane uMikaya indodana kaImla.

9Inkosi yakoIsrayeli loJehoshafati inkosi yakoJuda babehlezi ezihlalweni zabo zobukhosi, begqoke izambatho zabo zobukhosi, besesizeni ngasesangweni leSamariya, bonke abaprofethi babeprofetha phambi kwabo.

10UZedekiya indodana kaKenana wazenzela impondo zensimbi, wathi kuAhabi: INkosi ithi: Ngalezimpondo uzahlaba amaSamariya uze uwaqede.

11Labo bonke abaprofethi batsho njalo, bathi: Hamba uyenqoba iRamothi‐Gileyadi, iNkosi izalinikela esandleni sakho.

12Isithunywa esasiyembiza uMikaya sathi kuye: Amazwi abaprofethi ayathandeka wonke enkosini; lelizwi lakho kalifanane lawabo, ukhulume okuthandekayo.

13Kodwa uMikaya wathi: Ngifunga iNkosi uNkulunkulu, lokho iNkosi ekutshoyo kimi ngizakukukhuluma.

14Esefilike enkosini, uAhabi yathi kuye: Mikaya, siyehlasela iRamothi‐Gileyadi kumbe singayi na? Yena wathi kuyo: Hambani, lizanqoba; bazanikelwa ezandleni zenu.

15Kodwa inkosi uAhabi yathi kuye: Ngizakukufungisa kuze kube kangaki ukuba ungitshele iqiniso lodwa ebizweni leNkosi uNkulunkulu na?

16Yena wathi: Ngabona uIsrayeli wonke echithekile phezu kwezintaba njengezimvu ezingelamalusi; iNkosi yathi: Laba kabalamkhokheli, kabazibuyelele kuhle emakhaya.Nani 27:17; Hez 34:5; Mat 9:36; Mark 6:34

17Inkosi yakoIsrayeli yasisithi kuJehoshafati: Kangikutshelanga yini ukuthi kayikukhuluma okuhle ngami kodwa okubi kuphela na?

18UMikaya wasesithi: Zwaninike ilizwi leNkosi uNkulunkulu. Ngayibona ihlezi esihlalweni sayo sobukhosi, lexuku lonke lasezulwini limi phansi kwayo ngakwesokunene langakwesokhohlo;

19iNkosi yathi: Ngubani ozakhohlisa uAhabi inkosi yakoIsrayeli ukuba ahambe ayefela eRamothi‐Gileyadi na? Omunye watsho okunye, lomunye okunye.

20Kwasekuphuma umoya, wema phambi kweNkosi wathi: Ngizamkhohlisa mina. INkosi yathi kuwo: Kanjani na?

21Wona wathi: Ngizahamba ngibe ngumoya wokuqamba amanga emilonyeni yabo bonke abaprofethi bakhe. INkosi yathi: Impela uzakumkhohlisa; hambake wenze njalo.

22Ngakhoke iNkosi ifakile umoya wokuqamba amanga emilonyeni yalababaprofethi bakho, ngoba iNkosi ikumisele okubi.

23UZedekiya indodana kaKenana wasesondela, wawakala uMikaya esihlathini, esithi: Umoya weNkosi wasuka njani kimi ukuyakhuluma kuwe na?

24UMikaya wathi: Wena uqobo uzakukubona lokhu mhla ubalekela ezindlini ezingaphakathi ukuyacatsha.

25Inkosi yakoIsrayeli yalaya ukuba uMikaya abanjwe, abuyiselwe kuAmoni umbusi womuzi lakuJowashi indodana yenkosi,

26yathi: Valelani lumuntu entolongweni, limnike ukudla lamanzi alutshwana ngize ngibuye kuhle.

27UMikaya wathi: Uba ubuya kuhle, iNkosi izabe ingakhulumanga ngami.

28Inkosi yakoIsrayeli loJehoshafati inkosi yakoJuda baphuma baya eRamothi‐Gileyadi.

29Inkosi yakoIsrayeli yathi kuJehoshafati: Mina ngizazifinla, ngingene ekulweni, kodwa wena gqoka izambatho zakho zokubhosi. Inkosi yakoIsrayeli yasizifihla, yangena ekulweni.

30Inkosi yaseSiriya yayilayile izinduna zenqola zayo zokulwa yathi: Lingalwi lamuntu, lilwe lenkosi yakoIsrayeli kuphela.

31Kwathi induna zezinqola zokulwa zibona uJehoshafati zathi: Yiyo le sibili inkosi yakoIsrayeli. Zasezimsukela, yena wahlaba umkhosi; iNkosi uNkulunkulu yamsiza. Yazisusa kuye.

32Lapho izinduna zezinqola zokulwa zibona ukuba kwakungesiyo inkosi yakoIsrayeli, zayekela ukuxotshana laye.

33Umuntu othile watshoka umtshoko wakhe engananzelele, wahlaba inkosi yakoIsrayeli ngaphansi kwesivikelo sesifuba; yasisithi kumtshayeli wenqola yayo yokulwa: Phenduka, ungikhuphe phakathi kokulwa, ngoba sengilimele.

34Ukulwa kwaba nzima mhlalokho; inkosi yayizisekele enqoleni yayo yokulwa, ikhangele amaSiriya kwaze kwaba ntambama; yafa ekutshoneni kwelanga.