Hubo 63 - Ndebele Bible (iBhayibhili Elingcwele) 1978

Ukulangatha uNkulunkulu

1Nkulunkulu, wena unguNkulunkulu wami, ngiyakukudinga,

umphefumulo wami womela wena,

lomzimba wami uyakomela

njengelizwe elomileyo lapho kungelamanzi khona.

2Ngithanda ukukukhangela endaweni engcwele,

ngibone amandla akho lobukhosi bakho.

3Uthando lwakho olungapheliyo lungcono kulokuphila;

umlomo wami uzakukudumisa.

4Ngizakukubonga ngisaphila,

ngiphakamise izandla zami, ngikhuleke ebizweni lakho.

5Umphefumulo wami uzakusutha kungathi usuthi umnkantsho lamahwahwa,

lomlomo wami uzakukudumisa ngezingoma ezithabisayo.

6Lapho ngikhumbula wena ekulaleni kwami,

ngicabanga ngawe emilindweni yasebusuku.

7Ngoba ungisizile, emthunzini wamaphiko akho

ngiyahlabela ngithokoza.

8Umphefumulo wami ubambelele kuwe,

lesandla sakho sokunene siyangiqinisa.

9Kodwa abafuna ukungibulala

bazakwehliselwa enzikini yomhlaba.

10Bazakunikelwa ukubulawa,

babe yisabelo samakhanka.

11Kodwa inkosi izakuthokoza kuNkulunkulu,

bonke abafunga yena bazakujabula;

kodwa imilomo yabaqamba amanga izakuvalwa.