Zaga 9 - Ndebele Bible (iBhayibhili Elingcwele) 1978

Ukuhlakanipha lobuthutha

1Ukuhlakanipha kwakhile indlu yakho,

kwenza insika zakho eziyisikhombisa;

2kwahlaba inkomo zakho, kwavubela iwayini lakho,

futhi kwalungisa itafula yakho.

3Kuthumile incekukazi zakho ukuba zimemeze endaweni eziphakemeyo zomuzi zithi:

4Abangelalwazi kabangene lapha.

Kwabangaqedisisiyo uthi:

5Wozani, lidle lami,

linathe iwayini engilivubeleyo;

6yekelani ubuthutha liphile,

lihambe ngendlela yokuqedisisa.

7Osola isideleli uzikhokhela inhlamba,

lokhuza umuntu omubi uzasoleka.

8Ungasoli isideleli, funa sikuzonde;

sola ohlakaniphileyo, uzakukuthanda.

9Fundisa ohlakaniphileyo, kwande ukuhlakanipha kwakhe;

fundisa olungileyo, kuqhubeke ukufunda kwakhe.

10Ukuyesaba iNkosi kuyikuqala kokuhlakanipha,

lokumazi oNgcwele kuyikuqedisisa;

11ngoba ngami insuku zakho zizakwandiswa,

leminyaka eminengi yengezelelwe kuwe.

12Uba uhlakaniphile, nguwe ozasizakala;

uba udelela, nguwe ozahlupheka.

13Ubuthutha bungobowesifazana obanga umsindo,

kalangqondo, kananzi lutho.

14Uhlala ngasemnyango wendlu yakhe,

esihlalweni endaweni eziphakemeyo zomuzi,

15ukuba ameme abadlulayo,

labo abadlula ngendlela, ngokuthi:

16Abangelalwazi kabangene lapha.

Kwabangaqedisisiyo uthi:

17Amanzi okubiwa amnandi,

lesinkwa esidlelwa ensitha siyahlabusa.

18Kodwa kazi ukuthi ukufa kulapho,

lokuthi abamenyiweyo basenzikini yendawo yabafileyo.