Isa 58 - Ndebele Bible (iBhayibhili Elingcwele) 1978

Ukuzila okuyikho

1INkosi ithi: Memeza ngelizwi elikhulu, ungathuli,

uphakamise ilizwi lakho njengelophondo,

utshele abantu bami iziphambeko zabo,

lendlu kaJakobe izono zayo.

2Bayangidinga insuku zonke,

bathanda ukwazi indlela zami,

kungathi bayisizwe esithanda ukwenza ukulunga,

esingatshiyi ukwahlulela kukaNkulunkulu waso,

bebuza kimi izahlulelo zokulunga,

bethanda ukusondela kuNkulunkulu,

3besithi: Sizileleni ukudla, uba iNkosi ingakunanzi na?

Sizihluphelani, uba ingalandaba ngakho na?

Lokhu ngosuku lokuzila kwenu lizilela imisebenzi yenu,

licindezele zonke izisebenzi zenu,

4lokhu lizilela ukulwa lokuphikisana,

lokutshayana kubi ngenqindi

ngesikhathi esinje ukuzila kwenu kakufinyelelisi ukucela kwenu phezulu.

5Yikho lokhu kambe ukuzila engikuthandayo,

losuku lokuzisola kwabantu yini,

ukuba umuntu alengise ikhanda lakhe njengomhlanga,

alale phansi esakeni lasemlotheni na?

Lokhu kambe kungathiwa yikusila,

losuku olwamukelekayo eNkosini na?

6Kayisikho lokhu ukuzila engikufunayo yini,

ukuthukululwa kwezibopho zobubi,

lokukhululwa kwemichilo yejogwe,

ukuze bakhululeke abacindezelweyo,

kwaphulwe wonke amajogwe na?

7Kayisikho ukuba wahlukanisanele ukudla kwakho labalambileyo,

lokungenisa abayanga emzini wakho,

lokwambathisa ohambaze lapho umbona,

lokungacatsheli izihlobo zakho na?

8Ng’khonake ukukhanya kwakho kuzavela njengokusa,

lokusiliswa kwakho kuvele masinyane;

kuthi ukulunga kwakho kuhambe phambi kwakho,

lenkazimulo yeNkosi ihambe ngemva kwakho;

9kuthi lapho ukhuleka, iNkosi ikuphendule,

lalapho umemeza, izakuthi: Ngilapha.

Uba ukhawula ukucindezela,

lokukhombana ngeminwe, lokukhuluma okubi,

10unike olambileyo ukudla,

usuthise ohluphekileyo,

ng’khonake ukukhanya kwakho kuzaphuma emnyameni,

lokudana kwakho kube njengemini.

11INkosi izakukuhola njalonjalo,

ikusuthise ezindaweni ezingamagwadule,

iqinise amathambo akho,

ube njengensimu ethelelwayo,

lanjengomthombo olamanzi angacitshiyo.

12Amadodana akho azakwakha amanxiwa akho amadala,

uvuse lezisekelo ezindala.

Uzakuthiwa ungumvali wesikhala, lomlungisi wezindlu ezadilikayo ukuba kuhlalwe kuzo.

Ukugcinwa kweSabatha

13INkosi ithi: Uba ungoni iSabatha,

ungenzi umsebenzi wakho ngosuku lwami olungcwele,

ulibize iSabatha ngokuthi liyintokozo,

losuku olungcwele lweNkosi ngokuthi lulodumo,

uba ulihlonipha ngokungahambi langokungasebenzi ngalo,

langokungakhulumi ize,

14uzafumana intokozo kimi,

ngizakukukhweza ezintabeni eziphakemeyo zomhlaba,

ngikuphe ilifa likaJakobe ukhokho wakho ukuba ulidle;

ngoba umlomo weNkosi ukukhulumile.