Isam 19 - Ndebele Bible (iBhayibhili Elingcwele) 1978

Ezulwini kukhona ukujabula ngomthimba weWundlu

1Emva kwalokho ngezwa kungathi yilizwi elikhulu lexuku elikhulu ezulwini lisithi:

Haleluya! Ukunqoba, lobukhosi, lamandla kungokukaNkulunkulu wethu,

2ngoba ukuthonisisa kwakhe kuqotho, kulungile; usilahlile isiphingi esikhulu esonakalise umhlaba ngokuphinga kwaso, uphindisele kuso igazi lezinceku zakhe.

3Bamemeza ngokwesibili bathi:

Haleluya! Intuthu yokutsha kwawo yathunqa kwaze kwaba nini lanini.

4Abadala abangamatshumi amabili lane lezidalwa ezine eziphilayo zaziwisela phansi, zamdumisa uNkulunkulu ohlezi esihlalweni sobukhosi zisithi:

Ameni! Haleluya!

5Kwasekuzwakala ilizwi livela esihlalweni sobukhosi lisithi:

Mdumiseni uNkulunkulu wethu lina lonke zinceku zakhe, elimesabayo, abakhulu labancinyane.

6Ngasengisizwa kungathi yilizwi lexuku elikhulu, linjengomdumo wamanzi amanengi lokuduma okulamandla lisithi:

Haleluya! Ngoba iNkosi uNkulunkulu wethu, uSomandla, uyabusa.

7Asithokoze, sithabe, simdumise, ngoba umthimba weWundlu usufikile, lomlobokazi usezilungisele;

8wavunyelwa ukwambatha ilembu elihle elihlambulukileyo elikhazimulayo.

— Ngoba ilembu elihle liyizenzo zokulunga zabangcwele.

9Sasesisithi isithunywa kimi: Bhala lokhu ukuthi: Babusisiwe labo abamenyelwe edilini lomthimba weWundlu. Sathi kimi: La ngamazwi aqotho kaNkulunkulu.Mat 22:2, 3

10Ngasengiziwisela phansi ngasenyaweni zaso ukusikhonza. Kodwa sathi kimi: Musa ukwenza lokhu; lami ngiyinceku kanye lawe labazalwane bakho abafakazela uJesu. Dumisa uNkulunkulu. Labo abafakazela uJesu baloMoya njengabaprofethi.

UKristu ulwa lesilo asinqobe

11Ngasengibona izulu livulekile; ngabona ibhiza elimhlophe, oligadileyo ubizwa ngokuthi ngoThembekileyo loQotho; ngoba uthonisisa, alwe ngokulunga.Hez 1:1; Hubo 96:13; Isa 11:4

12Amehlo akhe afana lamalangabi omlilo, lasekhanda lakhe kukhona imiqhele eminengi; ulebizo elilotshiweyo elingaziwa muntu, kodwa nguye kuphela.Dan 10:6

13Wambatha ingubo efafazwe ngegazi; ibizo lakhe lithiwa nguLizwi likaNkulunkulu.

14Lezimpi zasezulwini zamlandela zigade amabhiza amhlophe, zambethe amalembu amahle ahlambulukileyo amhlophe.

15Emlonyeni wakhe kwaphuma umhedla obukhali azakutshaya izizwe ngawo; yena uzakuzibusa ngentonga yensimbi; uzakunyathela isikhamelo sewayini lentukuthelo yolaka lukaNkulunkulu uSomandla.Hubo 2:9; Isa 63:3; Jow 3:13; Isam 14:20

16Engutsheni yakhe lasethangazini lakhe kulotshwe ibizo elithi: INkosi yamakhosi loMbusi wababusi.

17Ngasengibona isithunywa simi elangeni, samemeza ngelizwi elikhulu ezinyonini zonke eziphaphayo emkhathini, sathi: Wozani, libuthane edilini elikhulu likaNkulunkuluHez 39:17–20

18ukuba lidle inyama yamakhosi, lenyama yezinduna, lenyama yezikhulu, lenyama yamabhiza leyabagadi bawo, lenyama yabantu bonke abakhululekileyo labayizigqili, abancinyane labakhulu.

19Ngabona isilo, lamakhosi omhlaba lezimpi zawo zibuthanele ukulwa laye ogade ibhiza kanye lezimpi zakhe.

20Isilo sasesibanjwa kanye lomprofethi wamanga owenza izibonakaliso phambi kwaso, aduhisa ngazo labo ababelophawu lwesilo lalabo abakhonza umfanekiso waso; isilo lomprofethi wamanga kwaphoselwa echibini lomlilo elivutha isolufa. Isam 13:1–18

21Labaseleyo babulawa ngomhedla walowo ogade ibhiza, umhedla ophuma emlonyeni wakhe; inyoni zonke zazitika ngenyama yabo.