Jak 4 - Ndebele Bible (iBhayibhili Elingcwele) 1978

UJakobe uxwayisa ngokulwa phakathi kwabazalwane

1Kuvelaphi ukulwa lokuxabana phakathi kwenu na? Kakuveli ezinkanukweni zenu ezilwayo ezithweni zenu na?

2Liyafisa, kodwa kalizuzi lutho; ngakho libulale. Lilomhawu, kalizuzi lutho; ngakho lixabane, lilwe. Kalilalutho ngoba kaliceli.

3Liyacela, kodwa kalizuzi, ngoba licela kubi, ukuze likuchithele ezinkanukweni zenu.

4Zifebendini, kalazi yini ukuthi ukuthandana lomhlaba kuyibutha kuNkulunkulu na? Ngakhoke lowo othanda ukuba ngumhlobo womhlaba, uzenza abe yisitha sikaNkulunkulu.

5Licabanga ukuthi umbhalo utsho ize na nxa usithi: Umoya awuhlalise kithi ulobukhwele?

6Kodwa uNkulunkulu uyengezelela umusa. Ngakhoke kuthiwa: UNkulunkulu umelana labazigqajayo, kodwa abazithobileyo uyabapha umusa.Zaga 3:34

7Ngakhoke zehliseleni kuNkulunkulu; lwanini loSathane, ng’khona ezakulibalekela.

8Sondelani kuNkulunkulu, laye uzakusondela kini. Gezani izandla zenu lina zoni, lihlambulule inhliziyo zenu lina abanhliziyombili.

9Danani, lilile, likhale. Ukuhleka kwenu kakuphendulwe ukulila, lokuthokoza kwenu kuphendulwe ukudana.

10Zehliseni phambi kweNkosi, izakuliphakamisa.

11Lingahlebani, bazalwane. Lowo ohleba umzalwane, loba emahlulela umzalwane wakhe, uhleba umlayo, ahlulele umlayo. Kodwa uba usahlulela umlayo, kawusenguye owenza umlayo, kodwa usungumthonisisi wawo.

12Munye ongumisimilayo lomthonisisi, nguye olamandla okusilisa lokubhubhisa; ungubani wena owahlulela umakhelwane wakho na?

UJakobe usola abathanda inzuzo labanothileyo

13Minani lina elithi: Lamuhla, loba kusasa, sizakuya emzini othile, sihlale khona umnyaka, sithengiselane, sizuze.Zaga 27:1

14Kanti okwakusasa kalikwazi. Ukuphila kwenu kuyini na? Kunjengenkungu ebonakala okwesikhatshana, ibisinyamalala.

15Ngabe lithi: Uba iNkosi ivuma, sizakuphila senze lokhu lalokhuyana.

16Kodwa liyazincoma liziqakise; konke ukuzincoma okunje kubi.

17Lowo okwaziyo okuhle okufanele akwenze kodwa angakwenzi uyona.