1 Kho 7 - Ndebele Bible (iBhayibhili Elingcwele) 1978

Ezinye izakhiwo zikaSolomoni

1USolomoni wakha indlu yakhe iminyaka elitshumi lantathu, wayiqeda yonke.

2Wasesakha indlu yeGusu laseLebanoni; ubude bayo babuzingalo ezilikhulu, lobubanzi bayo buzingalo ezingamatshumi amahlanu, lokuphakama kwayo kuzingalo ezingamatshumi amathathu, yayakhelwe phezu kwensika zemikusu eziyimizila emithathu, elamapulanka emikusu phezu kwayo.

3Yayifulelwe ngamapulanka emikusu ayephezu kwensika ezingamatshumi amane lanhlanu, ziyimizila emithathu, umzila ulensika ezilitshumi lanhlanu.

4Kwakulemizila emithathu yamawindi, iwindi liqondene lewindi, okwemizila emithathu ekhwelayo.

5Yonke iminyango lamawindi kwakulingana inxa zonke, iwindi liqondene lewindi, okwemizila emithathu ekhwelayo.

6Wasesakha lendlu yezinsika, ubude bayo babuzingalo ezingamatshumi amahlanu, ububanzi bayo buzingalo ezingamatshumi amathathu; kukhona umkoto ngaphambili olezinsika, lophahla ngaphambili.

7Wasesakha lendlu yesihlalo sobukhosi lapho ezathonisela khona amacala, wayendlala ngemikusu kusukela phansi kusiya ophahleni.

8Indlu yakhe ayezahlala kuyo yayisegumeni elingasemva kwendlu yokuthonisela amacala, yayakhiwe ngokufananayo. USolomoni wayakhela indodakazi kaFaro ayeyithethe indlu efana lale.

9Zonke lezizindlu zazakhiwe ngamatshe amakhulukazi abazwe alinganiswa, aqunywa ngesaha ngaphakathi langaphandle, kusukela esisekelweni kusiya phezulu.

10Isisekelo sasakhiwe ngamatshe amakhulukazi aligugu, alobude obuzingalo ezificaminwembili ingabe ezilitshumi;

11langaphezulu kulamatshe amakhulukazi abazwe alinganiswa, lemikusu.

12Iguma elikhulu lalilemizila emithathu yamatshe abaziweyo inxa zonke, lomzila owodwa wamapulanka emikusu; lalinjalo leguma elingaphakathi elethempeli lomkoto walo.

Umsebenzi kaHiramu ethempelini

13Inkosi uSolomoni yabiza uHiramu waseTire.

14Yena wayeyindodana yomfelwakazi wesizwe sakoNafitali, uyise wayengumuntu waseTire, owayekhanda ngethusi. UHiramu wayengumuntu ohlakaniphileyo elokuqedisisa ekwazi ukukhanda ngethusi; weza kuSolomoni, wasebenza yonke imisebenzi yakhe.

15Wenza insika ezimbili zethusi, ubude benye insika babuzingalo ezilitshumi lesificaminwembili, ubuqatha bayo buzingalo ezilitshumi lambili; yayinjalo lensika yesibili.

16Wenza futhi iziduku ezimbili zethusi elikhandiweyo, wazibeka phezu kwezinsika, ukuphakama kwaleso laleso isiduku buzingalo ezinhlanu.

17Wazenzela iziduku ezimbili ezisezinsikeni amambule amabili ngamaketane acecisiweyo.

18Amambule wawenzela imizila emibili yamapomegranati ukwembesa iziduku ezisezinsikeni.

19— Iziduku ezazisezinsikeni emkotweni zazifanana lemiduze, ukuphakama kwazo kuzingalo ezine —

20Iziduku zazisezinsikeni ezimbili langaphezu komqolo oseceleni kwamambule; kwakulamapomegranati angamakhulu amabili emizileni emibili ezizingelezeleyo.

21Wamisa izinsika emkotweni wethempeli; engakwesokunene wayibiza ngokuthi nguJakini, engakwesokhohlo wayibiza ngokuthi nguBowasi.

22Phezu kwezinsika kwakulemifanekiso yemiduze. Waphelake umsebenzi wezinsika.

23Wasesenza ulwandle ngethusi elincibilikisiweyo, lwaluyisizingelezi, luzingalo ezilitshumi kusukela kolunye ukhumbi kusiya kolunye, lezingalo ezinhlanu ukuphakama, lokhalo lwalo luzingalo ezingamatshumi amathathu.

24Ngaphansi kokhumbi lwalo kwakukhona amaqhaga ebhoda ulwandle okwengalo ezingamatshumi amathathu; amaqhaga lawo ayeyimizila emibili, ebunjwe ndawonye lolwandle.

25Lwalwakhelwe phezu kwenkabi ezilitshumi lambili; ezintathu zikhangele enyakatho, lezintathu zikhangele entshonalanga, lezintathu zikhangele eningizimu, lezintathu zikhangele empumalanga, zazifulathelene; ulwandle lwaluphezu kwazo.

26Uhlonzi lwalo lwalungangobubanzi besandla, umphetho walo unjengomphetho wenkezo, njengeluba lomduze, lwalulingana lamatanka angamakhulu amabili.

27Wenza lenqodlana ezilitshumi zethusi; ubude benqodlana babuzingalo ezine, lobubanzi buzingalo ezine, lokuphakama kuzingalo ezintathu.

28Zazenziwe ngalindlela; emaceleni zazilamapulanka abethelwe ezinsimbini;

29emapulankeni kukhona imifanekiso yezilwane lezinkabi lamakherubi. Ngaphezulu langaphansi kwezilwane lezinkabi lamakherubi kwakulemithando ekhandiweyo.

30Leyo laleyo inqodlana yayilamavili ethusi amane lama‐ekseli ethusi; emilenzeni emine kukhona izinto ezikhandiweyo zokubeka umganu, ezazicecisiwe ngemithando.

31Phezu kwenqodlana, ngaphakathi kwayo, kwakukhona into efana lomqhele, ukuphakama kwayo kuyingalo eyodwa; yayinjengesongo lokubeka isitsha, kukhona lakuyo izinto ezibaziweyo. Amapulanka asenqodlaneni ayelingana inxa zonke.

32Lawomavili amane ayengaphansi kwamapulanka lama‐ekseli amavili ehlangene lezinqodlana; ukuphakama kwevili kwakuyingalo lengxenye.

33Amavili ayenziwe afanana lawenqola; ama‐ekseli awo lamasongo awo lezipoko zawo lamahabha awo kwakukhandiwe.

34Engonsini zozine zaleyo laleyo inqodlana kwakukhona izinto zokubeka umganu zihlangene ndawonye lezinqodlana.

35Phezu kwezinqodlana kwakukhona umqolo oyingxenye yengalo ukuphakama: phezu kwenqodlana kwakulamaseko lamapulanka, konke kwenziwe kwaba kunye.

36Phezu kwamaseko lamapulanka wabaza amakherubi lezilwane lezihlahla zamalala lapho kulesikhala khona, wafaka lemithando.

37Wazenza njalo zonke inqodlana ezilitshumi, wazikhanda ngokufananayo zonke zalingana.

38Wenza imiganu yethusi elitshumi, ilowo lalowo ulingana lamatanka angamatshumi amane, uyizingalo ezine; ileyo laleyo inqodlana wayenzela umganu.