Jobe 41 - Ndebele Bible (iBhayibhili Elingcwele) 1978

1Ungayibamba ingwenya ngengwegwe,

uhitshele ulimi lwayo ngentambo na?

2Ungafaka umkhala emakhaleni ayo,

ubhoboze imihlathi yayo ngengwegwe na?

3Izakukuncenga kakhulu na?

Izakhuluma lawe amazwi athambileyo na?

4Izakwenza isivumelwano lawe ukuba uyithathe ibe yinceku yakho kokuphela na?

5Uzayidlalisa njengenyoni,

uyibophelele amantombazana akho ngentambo na?

6Abathengi bazathengiselana ngayo na?

Bazakwahlukaniselana ngayo na?

7Ungasibhoboza isikhumba sayo ngendlendla,

lekhanda layo ngengwegwe zenhlanzi na?

8Uba ungayiphakamisela isandla,

khumbula ubunzima ongahlangana labo, uyiyekele.

9Ofuna ukuyahlula ithemba lakhe liyaphela,

ngoba ephelelwa yisibindi ngokuyibona nje.

10Yeka ukwesabeka kwayo lapho isithukuthele!

Ngubani ongamelana layo na?

11Ngubani ongayihlasela angalimali na?

Kakho loyedwa emhlabeni.

12Kangiyikuthula mayelana lezitho zayo,

langamandla ayo amakhulu langesimo sayo esihle.

13Ngubani ongakhumula isambatho sayo sangaphandle na?

Ngubani ongabhoboza isigogo sayo esiqatha na?

14Ngubani ongavula umlomo wayo na?

Emazinyweni ayo kukhona okwesabekayo.

15Umhlana wayo unjengezinhlu zezihlangu ezibekeleleyo zasondelelana,

16esinye sisondele kwesinye,

kungangeni umoya phakathi kwazo.

17Zinamathelene, zabambana,

kazilakwahlukaniswa.

18Ukuthimula kwayo kuphazima ukukhanya,

lamehlo ayo akhanya njengokudabuka kokusa.

19Emlonyeni wayo kuphuma amalangabi,

kuqhatshe inhlansi zomlilo,

20Emakhaleni ayo kuthunqa intuthu,

njengembiza esemlilweni ovuthayo.

21Umoya wayo uvuthela amalahle,

lelangabi liphume emlonyeni wayo.

22Amandla asentanyeni yayo,

lokwesabeka kuhamba phambi kwayo.

23Isigogo sayo sangaphansi sinamathelene,

sabunjelwa kiyo, kasilakususwa.

24Inhliziyo yayo ilukhuni njengelitshe,

ilukhuni njengelitshe lokuchola elingaphansi.

25Ekuvukeni kwayo amaqhawe ayesaba,

bethuswe yikubhulana komsila wayo.

26Umhedla lomkhonto lembemba lomdikadika,

uba ziyihlaba, kazenzi lutho.

27Insimbi iyitshaya utshani,

lethusi ilitshaya ugodo olubolileyo.

28Umtshoko kawulakuyixotsha,

lamatshe esavutha aphenduka izibi nje.

29Izagila izitshaya izibi,

ihleke ukugenqeza komdikadika.

30Ingaphansi layo linjengendengezi ezibukhali,

ihamba odakeni njengesileyi.

31Yenza inziki zamanzi zibile njengembiza,

itshaye amanzi esiziba avubeke njengamafutha emganwini.

32Umzila wayo umhlophe ngemva kwayo,

lamanzi anjengenwele ezimhlophe emzileni wayo.

33Kakukho okufana layo emhlabeni,

iyisilo esingesabiyo.

34Konke okuphakemeyo kuyayesaba,

iyinkosi yazo zonke inyamazana eziphakemeyo.