1Nansi indaba kaNehemiya indodana kaHakaliya.
Kwathi ngenyanga kaKisilevi ngomnyaka wamatshumi amabili wokubusa kukaAtakisekisi, ngiseSusa emzini omkhulu,
2uHanani omunye wabafowethu wafika lamadoda athile evela koJuda. Ngababuza mayelana labaJuda ababebuyile ekuthunjweni, langeJerusalema.
3Bathi kimi: Labo ababuyayo ekuthunjweni baphakathi kokuhlupheka okukhulu lehlazo, ngoba lomduli waseJerusalema sewadilika, lamasango alo atshiswa ngomlilo.
4Kwathi ngisizwa lamazwi ngahlala phansi ngakhala, ngalila insuku ezinengi, ngizila ukudla, ngikhuleka kuNkulunkulu ophezulu.
5Ngathi: Nkosi, Nkulunkulu ophezulu, Nkulunkulu omkhulu lowesabekayo, ogcina isivumelwano lolothando olungapheliyo kulabo abakuthandayo begcina imilayo yakho,
6akubeke indlebe yakho, uvule lamehlo akho, ukuzwa umkhuleko wenceku yakho engiwukhuleka kuwe emini lebusuku ngabantu bakoIsrayeli, izinceku zakho, ngivuma izono zabo esizenzileyo kuwe. Yebo, mina lendlu kababa sonile.
7Senza okubi kakhulu kuwe, kasigcinanga imilayo yakho lezimiso zakho lemithetho yakho owalaya ngayo inceku yakho uMose.
8Khumbula ilizwi owalaya ngalo uMose inceku yakho usithi: Uba lingathembekanga, ngizalichithachithela ezizweni;Levi 26:33
9kodwa uba libuya kimi, lilondoloza imilayo yami liyenze, lanxa abachithiweyo benu besemaphethelweni omhlaba, ngizababutha lapho ngibabuyise endaweni engiyikhethele ukuba ibizo lami lidunyiselwe kiyo.Dute 30:1–5
10Nkosi, bona bazinceku zakho labantu bakho owabahlenga ngamandla akho amakhulu langesandla sakho esilamandla.
11Akubeke indlebe yakho encekwini yakho, uzwe lomkhuleko wezinceku zakho ezithanda ukuhlonipha ibizo lakho, uyiphumelelise inceku yakho lamhla, uyinike isihawu phambi kwenkosi.
Ngangingumphathi wezitsha zenkosi ngalesosikhathi.
Who We AreWhat We EelieveWhat We Do
2025 by iamachristian.org,Inc All rights reserved.
