2 Kho 21 - Ndebele Bible (iBhayibhili Elingcwele) 1978

Ukubusa kukaManase

1UManase wayeleminyaka elitshumi lambili lapho eqalisa ukubusa; wabusa iminyaka engamatshumi amahlanu lanhlanu eJerusalema. Ibizo likanina lalinguHefiziba.2 Lan 33:1–25

2Wenza okubi phambi kweNkosi elingisela amanyala wonke awezizwe iNkosi eyazixotsha phambi kwabakoIsrayeli.Jer 15:4

3Wabuya wakha indawo eziphakemeyo zokukhonzela uyise uHezekiya ayeziqedile, wakhela uBali ama‐altare, wenza insika zikankulunkulukazi uAshera, njengokwenza kukaAhabi inkosi yakoIsrayeli, wadumisa zonke inkanyezi zaphezulu, wazikhonza.

4Wakha ama‐altare ethempelini, indlu iNkosi eyakhuluma ngayo yathi: EJerusalema ibizo lami lizadunyiselwa khona.2 Sam 7:13

5Wakhela zonke inkanyezi zaphezulu ama‐altare emagumeni womabili ethempeli.

6Watshisa umntanakhe waba ngumnikelo, wavumisa, wenza imilingo, wasebenza labalamadlozi labathakathi. Wenza okubi kakhulu phambi kweNkosi waze wayithukuthelisa.

7Isithombe sikankulunkulukazi uAshera ayesenzile wasimisa ethempelini, indlu iNkosi eyakhuluma ngayo kuDavida lakuSolomoni indodana yakhe yathi: Kulindlu, laseJerusalema engilikhethe kuzo zonke izizwe zakoIsrayeli, ibizo lami lizadunyiselwa khona kuze kube nininini;1 Kho 9:3–5; 2 Lan 7:12–18

8kangisayikuzulisa inyawo zabakoIsrayeli ziphume futhi elizweni engalinika okhokho babo, uba bezakunanzelela benze njengokubalaya kwami langomlayo wami wonke inceku yami uMose eyabalaya wona.

9Kodwa kabalalelanga, uManase wabahuga ukuba benze okubi ukwedlula izizwe iNkosi eyazichitha phambi kwabakoIsrayeli.

10INkosi yasikhuluma ngezinceku zayo abaprofethi isithi:

11Ngoba uManase inkosi yakoJuda wenzile wonke lamanyala, wenze izinto ezimbi ukwedlula wonke amaAmori ayekhona ngaphambi kwakhe, wenza loJuda ukuba one ngezithombe zakhe,

12ngakhoke mina Nkosi, uNkulunkulu kaIsrayeli, ngithi: Khangelani, ngizakuletha okubi okukhulu phezu kweJerusalema loJuda kuthi labo bonke abakuzwayo kubabande indlebe bethuke.

13Ngizakwelula phezu kweJerusalema intambo yokulinganisa yeSamariya, lentambo yokulinganisa yendlu kaAhabi, ngilesule iJerusalema njengomuntu owesula umganu, awesule awumbokothe.

14Ngizabalahla abaseleyo ebantwini bami, ngibanikele esandleni sezitha zabo, bathunjwe babe yimpango yezitha zabo zonke,

15ngoba benzile okubi phambi kwami, bangithukuthelisa, kusukela ekuphumeni kwabokhokho babo eGibithe kuze kube lamuhla.

16Futhi uManase uchithile igazi elinengi elingelacala waze waligcwalisa iJerusalema kusukela ekuqaleni kwalo kuze kube sekucineni, ngaphandle kwezono enza ngazo uJuda ukuba one, baze benza okubi phambi kwami.

17Ezinye indaba zikaManase, lakho konke akwenzayo, lezono zakhe, kulotshiwe ogwalweni lwezindaba zamakhosi akoJuda.

18UManase waya kwabaphansi, wangcwatshelwa esivandeni sendlu yakhe, esivandeni sikaUza. UAmoni indodana yakhe waba yinkosi esikhundleni sakhe.

Ukubusa kukaAmoni

19UAmoni wayeleminyaka engamatshumi amabili lambili lapho eqalisa ukubusa; wabusa iminyaka emibili eJerusalema. Ibizo likanina lalinguMeshulemethi indodakazi kaHaruzi waseJotiba.

20Wenza okubi phambi kweNkosi njengoManase uyise.

21Walandela zonke indlela uyise ahamba ngazo, wakhonza izithombe uyise azikhonzayo, wazidumisa,

22wayidela iNkosi, uNkulunkulu wabokhokho bakhe, kahambanga ngendlela yayo.

23Inceku zakhe zamenzela icebo, zambulala endlini yakhe.

24Kodwa abantu belizwe bababulala bonke labo ababenzele inkosi uAmoni icebo; basebebeka uJosiya indodana yakhe ukuba yinkosi esikhundleni sakhe.

25Ezinye indaba zikaAmoni lakho konke akwenzayo kulotshiwe ogwalweni lwezindaba zamakhosi akoJuda.

26Wangcwatshelwa elibeni lakhe esivandeni sikaUza. UJosiya indodana yakhe waba yinkosi esikhundleni sakhe.