2 Kho 20 - Ndebele Bible (iBhayibhili Elingcwele) 1978

Ukugula kukaHezekiya

1Ngalezonsuku uHezekiya wagula, waphos’ukufa. UIsaya umprofethi indodana kaAmozi wafika kuye wathi: INkosi ithi: Lungisa indlu yakho, ngoba uzakufa, kawuyikusila.Isa 38:1–8; 2 Lan 32:24–26

2UHezekiya wasephenduka ekhangela emdulini, wakhuleka eNkosini esithi:

3Nkosi, ake ukhumbule, ngiyakuncenga, ukuba ngihambe ngobuqotho phambi kwakho langenhliziyo epheleleyo, ngenza okulungileyo emehlweni akho. UHezekiya wakhala kakhulu.

4UIsaya engakaphumi egumeni elingaphakathi, ilizwi leNkosi lafika kuye lisithi:

5Buyela umtshele uHezekiya umbusi wabantu bami ukuthi iNkosi, uNkulunkulu kaDavida ukhokho wakho, ithi: Ngiwuzwile umkhuleko wakho, ngabona lenyembezi zakho; ngizakukusilisa; ngosuku lwesithathu uzakuya ethempelini.

6Ngizakwengezelela iminyaka elitshumi lanhlanu ekuphileni kwakho. Ngizakukukhulula wena lalumuzi esandleni senkosi yaseAsiriya, ngiwuvikele ngenxa yami langenxa yenceku yami uDavida.

7UIsaya wathi: Lethani isinkwa somkhiwa. Basiletha, basifaka ethumbeni, inkosi yasila.

8UHezekiya wasesithi kuIsaya: Yisiphi isibonakaliso esitshengisa ukuthi iNkosi izangisilisa, lokuthi ngizakuya ethempelini ngosuku lwesithathu na?

9UIsaya wathi kuye: Yilesi isibonakaliso kuwe esivela eNkosini esokuthi iNkosi izakukwenza lokho ekuthembisileyo. Uyathanda ukuba isithunzi siye phambili izinyathelo ezilitshumi, loba siye emuva izinyathelo ezilitshumi na?

10UHezekiya waphendula wathi: Kuyinto elula ukuba isithunzi siye phambili izinyathelo ezilitshumi; atshi, kasiye emuva izinyathelo ezilitshumi.

11UIsaya umprofethi wasekhuleka eNkosini eyenza isithunzi sibuyele emuva izinyathelo ezilitshumi ezikhwelweni zikaAhazi.

Inkosi yaseBabiloni ithumela izithunywa kuHezekiya

12Ngalesosikhathi uMerodaki‐Baladani indodana kaBaladani, inkosi yaseBabiloni, wathumela izithunywa zilezincwadi lesipho kuHezekiya, ngoba wayezwile ukuthi uHezekiya ubekade egula.Isa 39:1–8

13UHezekiya wazamukela, wazitshengisa yonke indlu yakhe yenotho, isiliva legolide lamakha lamafutha amahle lezikhali zakhe, lakho konke okwakukhona ezindlini zakhe zokugcina impahla; kakubanga khona lokukodwa endlini yakhe lakuwo wonke umbuso wakhe angazitshengisanga khona.

14UIsaya umprofethi wasesiya enkosini uHezekiya wathi kiyo: Lababantu batheni na? Futhi bebevela ngaphi? UHezekiya wathi: Bebevela elizweni elikhatshana, kwelaseBabiloni.

15UIsaya wasesithi: Baboneni endlini yakho na? UHezekiya waphendula wathi: Babone konke okukhona endlini yami; kakulalutho ezindlini zami zokugcina impahla engingabatshengisanga lona.

16UIsaya wasesithi kuHezekiya: Zwanake ilizwi leNkosi,

17ithi: Insuku ziyeza lapho konke okusendlini yakho lalokho okhokho bakho abakugcinayo kuze kube lamhla kuzathwalelwa eBabiloni, kakuyikusala lutho, kutsho iNkosi.2 Kho 24:13; 2 Lan 36:10

18Amanye amadodana akho owazeleyo azakuthunjwa, abe ngabathenwa esigodlweni senkosi yaseBabiloni.2 Kho 24:14–15; Dan 1:1–7

19UHezekiya wasesithi kuIsaya: Ilizwi leNkosi olikhulumileyo lilungile. Ngoba wacabanga wathi: Kakulandaba, uba kuzakuba khona ukuthula lokuvikeleka ensukwini zami.

Ukufa kukaHezekiya

20Ezinye indaba zikaHezekiya, lobuqhawe bakhe, lokwenza kwakhe ichibi lomfolo owaletha amanzi phakathi komuzi, kulotshiwe ogwalweni lwezindaba zamakhosi akoJuda.

21UHezekiya waya kwabaphansi. UManase indodana yakhe waba yinkosi esikhundleni sakhe.