2 Lan 21 - Ndebele Bible (iBhayibhili Elingcwele) 1978

Ukubusa kukaJoramu koJuda

1UJehoshafati waya kwabaphansi, wangcwatshelwa kuboyise emzini kaDavida. UJoramu indodana yakhe waba yinkosi esikhundleni sakhe.

2Wayelabafowabo abangamadodana kaJehoshafati, oAzariya loJehiyeli loZekariya loAzariya loMikayeli loShefathiya. Bonke labo babengamadodana kaJehoshafati inkosi yakoJuda.

3Uyise wabanika izipho ezinengi zesiliva legolide lempahla eligugu kanye lemizi ebiyelweyo yakoJuda; kodwa umbuso wawunika uJoramu ngoba wayelizibulo.

4UJoramu esengenile esikhundleni sikayise eseqinile, wabulala bonke abafowabo kanye lezinye izikhulu zakoIsrayeli.

5Wayeleminyaka engamatshumi amathathu lambili ekuqaleni kwakhe ukubusa, wabusa eJerusalema iminyaka eficaminwembili.

6Walandela indlela zamakhosi akoIsrayeli njengendlu kaAhabi, ngoba wayethethe indodakazi kaAhabi; wenza okubi phambi kweNkosi.

7Kodwa iNkosi kayiyichithanga indlu kaDavida ngenxa yesivumelwano eyayisenze loDavida, lokhu yayithembise ukumnika inhlansi yena lamadodana akhe kuze kube nini lanini.

8Ensukwini zakhe iEdoma lawuvukela umbuso wakoJuda, bazibekela eyabo inkosi.Gen 27:40

9UJoramu wangena kwelaseEdoma kanye lezinduna zakhe zempi, lenqola zakhe zonke zokulwa; wavuka ebusuku, wawachitha amaEdoma ayesemzingelezele yena lenduna zenqola zakhe zokulwa.

10Ngakho iEdoma lawuhlamuka umbuso wakoJuda kuze kube lamhla. LeLibina lalo lawuhlamuka umbuso wakhe, ngoba wayeyidelile iNkosi, uNkulunkulu wabokhokho bakhe.

11Futhi wamisa indawo eziphakemeyo zokukhonzela entabeni zakoJuda, wenza abaseJerusalema bakhonze izithombe, waduhisa abakoJuda.

12Kwafika kuye incwadi ivela kuElija umprofethi isithi: INkosi, uNkulunkulu kaDavida uyihlo, ithi: Ngoba ungahambanga ezindleleni zikaJehoshafati uyihlo lezikaAsa inkosi yakoJuda,

13kodwa ulandele indlela zamakhosi akoIsrayeli, wenza labakoJuda labaseJerusalema bakhonze izithombe njengendlu kaAhabi eyenza abakoIsrayeli bakhonze izithombe, futhi ubabulele abafowenu abendlu kayihlo ababengcono kulawe,

14iNkosi izakwehlisela isifo esikhulu ebantwini bakho lasebantwaneni bakho lakubomkakho, lakuyo yonke impahla yakho;

15lawe uqobo uzakugula umkhuhlane omubi owesifo samathumbu akho, amathumbu akho aze aphume ngokuhamba kwensuku ngenxa yesifo.

16INkosi yasimvusela uJoramu amaFilistiya lamaArabiya ababehlala eduze lamaEtiyopiya;

17bahlasela koJuda, bangena khona, bathumba yonke impahla abayifumanayo eyayingeyesigodlo senkosi kanye lamadodana ayo labafazi bayo, kakwaze kwasala leyodwa indodana ngaphandle kukaJehowahazi, indodana yayo encinyane.

18Ngemva kwalokho iNkosi yehlisela emathunjini akhe isifo esingelaphekiyo.

19Ngokuhamba kwesikhathi ekupheleni kweminyaka emibili amathumbu akhe aphuma ngenxa yesifo; wafa ngobuhlungu obukhulu. Abantu bakhe kabambaselanga umlilo wokuphelekezela njengemililo eyabaselwa oyise.

20Wayeleminyaka engamatshumi amathathu lambili ekuqaleni kwakhe ukubusa, wabusa eJerusalema iminyaka eficaminwembili; wafa engakhalelwa muntu. Bamngcwabela emzini kaDavida, kodwa kungesikho emalibeni amakhosi.