Seb 12 - Ndebele Bible (iBhayibhili Elingcwele) 1978

Ukubotshwa lokukhululwa kukaPetro

1Ngalesosikhathi uHerodi inkosi welula izandla ukuba ahluphe abanye bebandla.

2Wabulala uJakobe umfowabo kaJohane ngomhedla.

3Esebonile ukuba lokhu kuyabathokozisa abaJuda, waqhubeka wabamba uPetro laye. Kwakuzinsuku zesinkwa esingelamvubelo.

4Wambamba, wamfaka entolongweni, wamnikela kwabebutho abalitshumi lesithupha ukuba bamlinde ngabane, eqonde ukumkhuphela ebantwini ngemva kwePhasika.Eks 12:1–27

5Ngakho uPetro wagcinwa entolongweni; kodwa ibandla lamkhulekela kakhulu kuNkulunkulu.

6Kwathi ngobusuku uHerodi abezakumkhupha ngabo, uPetro wayelele phakathi kwabebutho ababili, ebotshiwe ngamaketane amabili, labalindi phambi komnyango babegcine intolongo.

7Kwasekufika isithunywa seNkosi, lokukhanya kwakhanya entolongweni. Satshaya uPetro ohlangothini, samvusa sisithi: Sukuma masinyane. Asesiwa amaketane ezandleni zakhe.

8Sathi kuye isithunywa: Gqoka, ufake amanyathelo akho. Wenze njalo. Sathi kuye: Yambatha ingubo yakho, ungilandele.

9Waphuma wasilandela; wayengazi ukuba kuliqiniso okwenziwa yisithunywa, kodwa wayesithi ubona umbono.

10Sebedlulile abalindi bokuqala labesibili bafika esangweni lensimbi elokuya emzini, lazivulekela ngokwalo, baphuma, bahamba umgwaqo wamunye; masinyane isithunywa samtshiya.

11UPetro eseqaqabukile wathi: Khathesi sengisazi ngeqiniso ukuthi iNkosi ithumile isithunywa sayo, yangikhulula esandleni sikaHerodi, lakukho konke obekulindelwe yisizwe sabaJuda.

12Sekumkhanyele lokho, wasuka waya endlini kaMariya unina kaJohane othiwa nguMarko, lapho kwakuhlangene khona abanengi bekhuleka.

13Eseqoqodile esivalweni sesango, kwasabela intombazana ethiwa nguRoda, yeza;

14isilizwile ilizwi likaPetro kayivulanga esangweni ngenxa yokuthokoza, kodwa yagijima yabika ukuthi uPetro umi esangweni.

15Bathi kuye: Uyahlanya. Yona yaqinisa ukuthi kunjalo. Bathi: Yisithunywa sakhe.

16Kodwa uPetro waqhubeka ukuqoqoda; sebevulile bambona, bamangala.

17Wasebaqhweba ngesandla ukuba bathule, wabalandisela ukuba iNkosi imkhuphe kanjani entolongweni. Wasesithi: Bikelani uJakobe labazalwane. Wasuka waya kwenye indawo.

18Sekusile, kwaba khona ukunyakazela okukhulu phakathi kwabebutho ngokuthi uPetro uye ngaphi.

19UHerodi esemdingile engamfumani, wabuzisisa abalindi, walaya ukuba babulawe. Wasesuka eJudiya, wehlela eKesariya, wahlala khona.

Ukufa kukaHerodi

20UHerodi wayebathukuthelele abaseTire labaseSidoni; beza kuye nganhliziyonye; sebevumelene loBlastusi induna yendlu yenkosi, bacela ukuthula, ngoba ilizwe labo lalifunzwa ngelenkosi.

21Ngosuku olumisiweyo uHerodi wambatha ingubo zakhe zobukhosi, wahlala esihlalweni sobukhosi, wenza inkulumo.

22Abantu bamemeza bathi: Yilizwi likankulunkulu, kayisilo elomuntu.

23Masinyane isithunywa seNkosi samtshaya, ngoba kamdumisanga uNkulunkulu; wadliwa zimpethu, wafa.

24Kodwa ilizwi likaNkulunkulu lakhula, landa.

25UBarnabasi loSawuli babuya bevela eJerusalema sebeqedile umsebenzi wabo, babuya beloJohane othiwa nguMarko.