Jobe 21 - Ndebele Bible (iBhayibhili Elingcwele) 1978

Impendulo kaJobe: ubonile ukuthi ababi bayaphumelela

1UJobe wasephendula esithi:

2Ake lizwe kuhle amazwi ami,

lokho kube yinduduzo kimi evela kini.

3Ake lingibekezelele, ngizakhuluma;

emva kokukhuluma kwami lingakloloda.

4Minake ukusola kwami kungomuntu yini?

Phoke, ngingekhathazeke na?

5Ngikhangelani, limangale,

libambe imilomo yenu ngezandla.

6Lapho ngikhumbula nje, ngitshaywa luvalo,

lomzimba wami uthuthumele.

7Ababi baphilelani, babe badala,

babe lamandla amakhulu na?

8Abantwana babo bahlala kuhle besekhona,

lenzalo yabo phambi kwabo.

9Imizi yabo kayiyikwesaba,

loswazi lukaNkulunkulu kalubatshayi.

10Inkunzi yabo iyakhwela ingaphuthi,

lenkomokazi yabo iyazala amakhonyane, ingaphunzi.

11Abantwana babo bayaphuma njengamawundlu,

bayadlala, lengane zabo zigide.

12Bayahlabela ngesigubhu langechacho,

bathokoze ngelizwi lomhlanga.

13Baqeda insuku zabo ngokuhle,

behlele endaweni yabafileyo ngokuthula.

14Bathi kuNkulunkulu: Suka kithi;

kasifuni ukwazi indlela zakho.

15Uyini uSomandla ukuba simkhonze na?

Sizazuzani uba sikhuleka kuye na?

16Ukuphumelela kwabo kakukho ezandleni zabo na?

Amacebo ababi afana lawakhe uNkulunkulu na?

17Kukangaki isibane sababi sicima na?

Kukangaki ingozi ibehlela na?

Kukangaki uNkulunkulu ebanika ubuhlungu olakeni lwakhe na?

18Kukangaki lowomuntu enjengezibi phambi komoya,

enjengomule ophetshulwa ngumoya na?

19Yebo, lithi: Ukuhlupheka kwakhe uNkulunkulu ukudlinzekele abantwana bakhe.

Atshi bo, kamphindisele khathesi, atshaywe.

20Amehlo akhe kawabone ukuchitheka kwakhe,

anathe ulaka lukaSomandla.

21Ngoba angazikhathazelani ngabantwana abeza emva kwakhe,

lapho inyanga zakhe seziphelile na?

22Kukhona ongafundisa uNkulunkulu ukwazi,

yena owahlulela lalabo abasezulwini phezulu na?

23Omunye uyafa esaphile kuhle,

ezinzile, elokuthula,

24umzimba wakhe uzimukile,

umnkantsho wamathambo akhe umanzi;

25lomunye afe umoya wakhe usebuhlungwini,

engazanga adle okuhle.

26Balala phansi emhlabeni bobabili,

lempethu zibasibekele.

27Khangelani, ngiyayazi imicabango yenu,

amacebo enu amabi ngami.

28Ngoba lithi: Ingaphi indlu yesikhulu na?

Lingaphi ithente lomubi na?

29Kalibuzanga kwabahambayo emigwaqweni na?

Kalamukelanga ubufakazi babo

30ukuba omubi uyaphepha osukwini losizi,

lokuba uyophulwa osukwini lwentukuthelo na?

31Ngubani omsolayo ngokwenza kwakhe na?

Ngubani ophindisela ngalokho akwenzileyo na?

32Lapho esesiwa elibeni elilindwayo,

33abantu abamlandelayo labahamba phambi kwakhe banengi,

lomhlabathi umnandi kuye.

34Phoke lizangiduduza njani ngeze na?

Impendulo zenu ziyinkohliso nje.