Zek 8 - Ndebele Bible (iBhayibhili Elingcwele) 1978

Kuthenjiswa ukuthi iJerusalema lizahlalwa futhi

1Ilizwi leNkosi yamabandla lafika kimi lisithi:

2INkosi yamabandla ithi: Ngilobukhwele ngeZiyone, ubukhwele obuvuthayo kakhulu.

3INkosi ithi: Ngizabuyela eZiyone, ngihlale phakathi kweJerusalema, leJerusalema lizakuthiwa ngumuzi othembekileyo, lentaba yeNkosi yamabandla izakuthiwa yintaba engcwele.

4INkosi yamabandla ithi: Amaxhegu lezalukazi bazahlala futhi endleleni zeJerusalema, yilowo lalowo ephethe udondolo ngenxa yokuluphala.

5Lezindlela zomuzi zizagcwala abafana lamankazana bedlala kizo.

6INkosi yamabandla ithi: Uba kumangalisa emehlweni alabo abaseleyo balababantu kulezinsuku, kuzamangalisa yini lemehlweni ami na?

7Ngizakhulula abantu bami elizweni lasempumalanga laselizweni lasentshonalanga,

8ngibalethe ukuba bahlale phakathi kweJerusalema, babe ngabantu bami, lami ngibe nguNkulunkulu wabo ngeqiniso langokulunga.

9INkosi yamabandla ithi: Qungani isibindi, lina elizwa kulezinsuku amazwi avela kubaprofethi, ababekhona kusukela esikhathini sokubekwa kwesisekelo sethempeli lami, ukuba lakhiwe.

10Ngoba ngaphambi kwalezonsuku kwakungelakuqatshwa umuntu lokwenyamazana, kungekho lokuvikelwa ezitheni kwabasebenzayo. Ngoba wonke umuntu ngamxega lomfowabo.

11Kodwa khathesi kangisayikubaphatha abaseleyo balababantu njengasensukwini zakuqala, kutsho iNkosi yamabandla.

12Ngoba kuzahlanyelwa ngokuthula, ivini lizathela izithelo zalo lomhlabathi wandise inala yawo, lephezulu lehlise amazolo alo; ngizabanika abaseleyo balababantu zonke lezizinto.

13Njengoba beliyisiqalekiso phakathi kwezizwe, wena Juda lawe Israyeli, ngakho ngizakulikhulula libe yisibusiso. Lingesabi, kodwa manini isibindi.

14INkosi yamabandla ithi: Njengoba ngazimisela ukwenza okubi kini ekungithukutheliseni kwabokhokho benu, ngingaliyekelanga, kutsho iNkosi yamabandla,

15ngakhoke ngizimisele kulezinsuku ukwenza okulungileyo eJerusalema lakoJuda; lingesabi.

16Nanzi izinto elizazenza. Khulumani iqiniso omunye komunye; lahlulele ngokuqotho langokuqonda enkundleni;Efe 4:25

17lingenzelani amacebo amabi enhliziyweni zenu; lingathandi izifungo zamanga; ngoba ngiyazizonda zonke lezizinto, kutsho iNkosi.

18Ilizwi leNkosi yamabandla lafika kimi lisithi:

19INkosi yamabandla ithi: Ukuzila ukudla kwenyanga yesine, lenyanga yesihlanu, lenyanga yesikhombisa, lenyanga yetshumi, kuzakuba yizikhathi zokuthokoza lezokuthaba lezikhathi zemikhosi yokujabula koJuda. Ngakhoke thandani iqiniso lokuthula.

20INkosi yamabandla ithi: Izizwe labantu abakhe imizi emikhulu bazakufika,

21kuthi abakhileyo komunye umuzi baye kwabakhe komunye, bathi: Asihle sihambeni, siyedinga iNkosi yamabandla, sicele umusa wayo; siyahamba khathesi.

22Abantu abanengi lezizwe ezilamandla zizakuza ukuyidinga iNkosi yamabandla eJerusalema lokucela umusa wayo.

23INkosi yamabandla ithi: Ngalezonsuku abantu abalitshumi abavela ezizweni zezindimi zonke bazabamba umJuda ngengubo yakhe, bathi kuye: Sizahamba lawe ngoba sesizwile ukuba uNkulunkulu ukini.