Isa 62 - Ndebele Bible (iBhayibhili Elingcwele) 1978

1Ngenxa yeZiyone kangiyikuthula,

langenxa yeJerusalema kangiyikuphumula,

kuze kuphume ukulunga kwalo njengokukhanya,

lokukhululwa kwalo njengesibane esivuthayo.

2Izizwe zizabona ukulunga kwakho,

lamakhosi wonke abone inkazimulo yakho;

uzakubizwa ngebizo elitsha ezakukutha lona iNkosi.

3Uzakuba ngumqhele omuhle ophethwe yiNkosi,

lomqhele wobukhosi ophethwe nguNkulunkulu wakho.

4Kawusayikubizwa ngokuthi ngoTshiyiweyo,

lelizwe lakini kalisayikuthiwa ngoLahliweyo;

kodwa uzakubizwa ngokuthi yiNtokozo yami,

lelizwe lakini ngokuthi ngoWendileyo;

ngoba iNkosi iyathokoza ngawe,

lelizwe lakini libe ngelayo.

5Ngoba njengejaha lithatha intombi,

ngokunjaloke okwakhayo uzakukuthatha;

lanjengomyeni ethokoziswa ngumlobokazi,

uNkulunkulu wakho uzakuthokoza ngawe.

6Ngibekile abalindi phezu kwemithangala yakho,

wena Jerusalema;

kabayikuthula lakanye emini lasebusuku.

Lina elingabakhumbuzi beNkosi lingaphumuli,

7lingayiyekeli iphumule, ize yakhe iJerusalema,

ilenze libe lodumo emhlabeni.

8INkosi ifungile ngesandla sayo sokunene,

langengalo yayo elamandla yathi:

Kangisayikunika izitha zakho amabele akho

abe yikudla kwazo,

labezizwe kabayikunatha iwayini lakho olisebenzeleyo;

9kodwa labo abawavunileyo bazakuwadla badumise iNkosi;

lalabo abazibuthayo izithelo zevini bazanatha iwayini emagumeni endlu yami engcwele.

10Phumani ngamasango,

lilungisele abantu indlela;

candani indlela, likhuphe amatshe,

liphakamisele abantu uphawu.

11INkosi isimemezele emhlabeni wonke yathi:

Tshonini kulo iZiyone lithi:

Khangela, iNkosi iyeza ukukusilisa;

iyeza lomvuzo wayo,

lenkokhelo yayo iphambi kwayo.

12Bazakubizwa ngokuthi ngabantu abangewele,

abahlengiweyo beNkosi;

wena uzakuthiwa ngoDingiweyo, umuzi ongatshiywanga.