Dute 11 - Ndebele Bible (iBhayibhili Elingcwele) 1978

Ubukhulu beNkosi

1Ngakhoke kalibothanda iNkosi uNkulunkulu wenu, ligcine ilizwi layo lezimiso zayo lezahlulelo zayo lemithetho yayo insuku zonke.

2Khumbulani lezizinto lamhla — kangikhulumi ebantwaneni benu abangazaziyo labangazibonanga — khumbulani ukulaya kweNkosi uNkulunkulu wenu, lobukhulu bayo, isandla sayo esilamandla lengalo yayo elamandla,

3izibonakaliso zayo lezenzo zayo eyazenza eGibithe kuFaro inkosi yaseGibithe, lakulo lonke ilizwe lakhe,Eks 7:8—12:13

4lalokho eyakwenza empini yaseGibithe, lasemabhizeni ayo lasenqoleni zayo, lokuthi yenza amanzi oLwandle oluBomvu abakhukhele lapho bexotshana lani, yababhubhisa, kuze kube lamuhla.Eks 14:28

5Khumbulani lokho eyalilenzela khona enkangala laze lafika kulindawo,

6lalokho eyakwenza kuDathani lakuAbiramu amadodana kaEliyabi indodana kaRubeni, ukuthi umhlaba wavuleka wabaginya bona labendlu zabo, lamathente abo, lakho konke okwabo okuphilayo, phambi kwabo bonke abakoIsrayeli.Nani 16:31, 32

7Lizibonele lina zonke izenzo ezinkulu zeNkosi.

Izibusiso zelizwe elithenjisiweyo

8Ngakhoke libogcina yonke imithetho engililaya yona lamhla, ukuba libe lamandla okungena lilithumbe ilizwe eliya kulo ukuba libe ngelenu,

9lokuba lihlale isikhathi eside elizweni iNkosi eyafunga kubokhokho benu ukubanika lona lenzalo yabo, ilizwe eligcwele uchago lenyosi.

10Ngoba ilizwe elizakungena kilo ukulithumba kalifanani lelizwe laseGibithe elivela kilo, lapho nxa lalihlanyela inhlanyelo yenu, lalisebenza nzima ukuthelela amasimu;

11kodwa ilizwe eliya kilo ukulithumba liyilizwe lamaqaqa lezigodi, elinethwa lizulu;

12ilizwe elilondolozwa yiNkosi uNkulunkulu wenu, amehlo ayo alikhangela njalo, kusukela ekuqaleni komnyaka kuze kube sekupheleni kwawo.

13Uba lilalela imithetho yami engililaya yona lamuhla, lithande iNkosi uNkulunkulu wenu, liyikhonze ngenhliziyo yenu yonke langomphefumulo wenu wonke,Levi 26:3–5; Dute 7:12–16; 28:1–14

14izakulinika ilizwe lakini izulu ngesikhathi salo, izulu elokuqala lelokucina, ukuba livune amabele enu lewayini lenu lamafutha enu.

15Izakunika inkomo zenu utshani emadlelweni; lizakudla, lisuthe.

16Qaphelani, funa inhliziyo zenu zikhohliseke, liphambuke, likhonze abanye onkulunkulu, libadumise,

17leNkosi ilithukuthelele, ivale izulu ukuba lingani, lelizwe lingabe lisathela isithelo, libhubhe masinyane lina elizweni elihle iNkosi elinika lona.

18Ngakhoke gcinani lamazwi ami enhliziyweni yenu lasemphefumulweni wenu, liwabophele ezandleni zenu abe njengophawu, lasemabunzini enu abe yisikhumbuzo.

19Lizakuwafundisa abantwana benu, liwatsho lapho lihlezi ezindlini zenu, lalapho lihamba endleleni, lalapho lilala, lalapho livuka.

20Liwalobe emigubazini yeminyango yezindlu zenu lemasangweni enu,Dute 6:6–9

21ukuba zande insuku zenu lensuku zabantwana benu elizweni iNkosi eyafunga kubokhokho benu ukubanika lona, lapho kusekhona amazulu phezu komhlaba.

22Uba ligcina kuhle yonke imithetho le engililaya ukuba liyenze, lithande iNkosi uNkulunkulu wenu, lihambe ngendlela zayo zonke, libambelele kuyo,

23iNkosi izakuxotsha zonke lezizizwe phambi kwenu, lizinqobe izizwe ezinkulu lezilamandla kulani.

24Zonke indawo lapho inyawo zenu zinyathela khona zizakuba ngezenu; ilizwe lenu lizakusukela enkangala, laseLebanoni, lasemfuleni iYufrathi, lize lifike olwandle ngasentshonalanga.Josh 1:3–5

25Kakulamuntu ozamelana lani; iNkosi uNkulunkulu wenu izakubenza abantu belizwe lonke elizakunyathela kulo batshaywe luvalo, balesabe, njengokulithembisa kwayo.

26Khangelani, lamhla ngiyabeka phambi kwenu isibusiso lesiqalekiso;

27isibusiso, uba lilalela imithetho yeNkosi uNkulunkulu wenu engililaya yona lamuhla;

28isiqalekiso, uba lingalaleli imithetho yeNkosi uNkulunkulu wenu, kodwa liphambuka endleleni engililaya yona lamuhla, lilandele abanye onkulunkulu elingabazanga.

29Kuzakuthi lapho iNkosi uNkulunkulu wenu ilingenisa elizweni eliya ukulithumba, limemezele isibusiso entabeni yaseGerizimi, lesiqalekiso entabeni yaseEbali.Dute 27:11–14; Josh 8:33–35

30Angithi zona ziphetsheya kweJordani ngasentshonalanga kwendlela, elizweni lamaKanani ahlala eAraba, maqondana leGiligali, eduze lezihlahla ezinkulu zaseMore na?

31Ngoba selizakuchapha iJordani ukuba lingene lithumbe ilizwe iNkosi uNkulunkulu wenu elinika lina. Lizakulithumba, lihlale kilo,

32ligcine kuhle zonke izimiso lezahlulelo engizibeka phambi kwenu lamuhla.